السلام عليكم...
الملاحظ هاليومين صار اي "طفل" يجمع له فلوس و يفتح له موقع على اساس "يكشخ" فيه بس. و الغريب انك تلقى الواحد ما يحتاج يحط بموقعه منتدى , لكن بس يحطه عشان يصير مشرف و يرضي غروره او بس عشان يكبر موقعه شوي. و الاغرب من كذا ان اغرب هالمواقع تكاد تكون منسوخه من بعض من ناحية الفكره , اذا تبي تصير زيهم , كل اللي عليك تسويه هو التالي :
1- اول و اهم شي , تعطي نفسك لقب رومانسي , "البطه الجريحه" , "صفدع الليل" ... اهم شي تحاول تصير شاعري و رقيق و حساس عشان البنات يحبونك.
2- بعدين يجي وقت اختيار اسم الموقع , طبعا بغض النظر عن المحتوى و عن الهدف ,اختار لك اسم شاعري (لازم) مثلا نسايم , او مملكة الحب , او قلعة الرومانسيه (اذا كانت هذي الاسماء موجوده فعلا فاعذروني لاني توني مفكر فيها) , و السبب واضح ... انك تجذب الجنس الناعم و تخلي جو المكان رقيق و لطيف و شاعري و و و ....الخ
او ممكن يطيح لك بالصرعه "الغبيه" اللي ماشيه فيها كثير من المواقع العربيه الحين , اللي يختار لك اسم ماله معنى بس اهم شي فيه حروف و ارقام متشابهه (يحسبونه لوحة سياره) , مثلا vvvkkk.com او o1o1.com ...الخ . يعني صحيح ممكن يكون سهل حفظه , لكن ماله اي علاقه بمحتويات الموقع , حتى من الناحية التسويقيه للموقع فااااشل.
3- تبدا بالتصميم بالفوتوشوب. الواجهه لازم تستلمها "تلغيم" صور اطفال او بنات و الوان "ياي" زهري و بنفسجي و فوشي , ممكن تكون تطيق الالوان هذي بس لازم عشان البنات يحبونك. و و الواجهه معتمده بشكل رهيب على الصور لدرجة انك لو شلت الصور او ما قدر متصفحك يحمل الصور لاي سبب ما عاد تقدر تستعمل الموقع (وهالشي غلط).
(المشكله انهم يعتمدون على التصاميم المليانه صور هذي مع انه اغلب مستخدمين الانترنت في العالم الثالث (بالذات السعوديه للاسف و الفضل لشركة الاتصالات) يدخلون الانترنت باتصال dial-up يعني العادي حق فيش التلفون , و بكذا اغلب زوار مواقعهم لازم يقعدون ساعه عشان يحملون الواجهه بس.)
4- الديجي تشات !!! كيف ما يمشي الموقع بدون الديجي تشات؟ يقولون الديجي تشات اهم من السيرفر نفسه. لازم طال عمرك يصير عندك ديجي تشات تجمع لك مراهقين و بنات (طبعا) فيه عشان بعدين تدخل بينهم و لون النك حقك مختلف و مسوي شديد و مشرف و حركات و كلهم يحبونك...
5- المنتدى ! ليش افكر باهداف المنتدى او تخصصه و اتعب نفسي؟ حط شي من كل شي. دين , فن , اخبار , سياسه , العاب , اقتصاد , عالم حواء , جرجير , ملوخيه ... لا تخلي قسم الا و انت حاطه. و لا تنسى تزخرف اسم كل منتدى و تخليه بدال ما يصير "ملوخيه" يصير "-_-_- ملوخيه -_-_-" او عشان تجذب الجنس الناعم (الهدف من الموقع) تكتبه "-_-_- ملوخية الاحلام -_-_-".
بعدين افتح الوورد و ادخل المنتديات الثانيه و ابدا قص و لزق قص و لزق قص و لزق الى ما يصير عندك مواضيع كفايه.
6- دور لك عن قائمه فيها 234235452343435 بريد عربي , ثم ارسل لهم رسائل دعائيه مزعجه فيها عناوين مالها علاقه بالمواضيع اصلا مثل "فضيحة المطرب فلانه مع المطرب فلان". و لا تنسى تقفل المواضيع حقت المنتدى بحيث ما يقدر يشوفها الواحد الا اذا سجل بالمنتدى اول.
7- اسمح للاعضاء يحطون تواقيع اكبر من الموضوع نفسه. خلهم يحطون صور و ملفات صوتيه تتشغل الحالها و عروض فلاش و كل شي بالتوقيع. وش فيها اذا قعد الواحد ساعه عشان يفتح موضوع معين بسبب تواقيع الاعضاء؟ عادي وسع صدرك.
ولا تنسى توقيعك انت (المشرف) يكون في قمة الرومانسيه , حط فيه احلى الاشعار و صورة حرمه ملثمه و طفل يضحك و و و ..الخ
8- بعد ما تظبط امورك في المنتدى , روح عبي الموقع روابط و ملفات و اشياء مالها علاقه ببعض , حاول تحط الانترنت كله بموقعك ان قدرت , لازم يصير موقعك كبير ياخي حتى لو اظطريت تسرق محتويات مواقع ثانيه.
و من جفره لدحديره .. يا قلب لا تحزن..
رد مع اقتباس
المشاركة الأصلية كتبت بواسطة الغريم دوت كوم
