أصحاب شركات الإستضافه الرجاء الدخول

[UAEmirates]

السلام عليكم

ارجوا منكم المساعده في حسم هذه القضية

انا الله يسلمكم حاجز سيرفر قيمته كل ثلاث شهور 4000 درهم / ريال + قيمة الدعم الفني 300 درهم لمدة ثلاث شهور .

حجم مساحة التخزين 73 جيجا و الترافيك 2000 جيجا

المسؤل الفني الي شغلته إدارة السيرفر مخصص لنا 2 جيجا فقط من اصل 73 جيجا و مخصص 200 جيجا فقط من أصل 2000 جيجا للترافك .

سكتنا فتره طويله على اساس إن الموقع بعده ما وصل للأرقام الي وضعها الفني و المهم إن الموقع يشتغل و بدون مشاكل , لكن أمس حجم الملفات وصل للحد الأقصى و الي هو 2 جيجا فطلبت من المسؤل الفني يرفع مساحه التخزين من 2 جيجا إلى 5 جيجا مع العلم إن حجم المساحه الكلية 73 جيجا .

لم قدمت الطلب فتح معاي تحقيق !!!
ليش موقعكم مستهلك كل هالمساحه ؟ و انتوا شو تسون ؟ المفروض موقعكم ما يكون في ملفات .. إلخ

وبعد ما شرحت له الأسباب ( مع إن المفروض إنه ما يسالني ولا أجاوبه بهذا الخصوص ) رفع المساحه من 2 إلى 5 جيجا مع رساله بأني إذا قدمت طلب آخر فلازم يكون الطلب هذا هو إني استلم إدارة السيرفر بنفسي ( يعني شبه تهديد ) !!

هل تصرف هذا المسؤل الفني سليم ؟
هل من حقه تحديد إحتياجاتنا الخاصه بالموقع ؟

للأسف العقليات العربيه تجبر الإنسان على إنه ينسى التعامل معاها و يرجع للأجانب أفضل بدال هالمذله .

[AD4host.ae]

عزيزي كلش ماله حق يسوي هالشئ ( إلا اذا كان بإتفاق بينكم )
انت لك الهارديسك كامل تستخدمه بالطريقه الي تبيها وبالمساحة الي تبيها والي يحتاجها موقعك!
خصوصا ان السيرفر مو رخيص عشان يتشرط ويقولك 2 جيجا !!

انصحك تتوجه الى شركة اخرى لان مستقبلاً يكبر موقعك ويطيح الموقع تحت يده وتصرفه !!



تحياتي

[بدر نايف]

اذا عندك الروت تصرف بسيرفرك وماله شغل فيك لانه ان راح او جاء كله موظف عندك يشتغل بفلوسك

اما اذا ماخذ السيرفر منه شخصيا
اخاف مو معطيك سيرفر ؟
يعني ريسلير او اي استضافة مشتركه و الرجال توهق فيك ؟

[breem]

إعذرني اخوي بس مادري وش مخليك متمسك فيه !!!
هذا الشيء أبد مو من حقه ، واتوقع كمان ان موقعك مو على سيرفر خاص وانه حاطك على استضافه عاديه.
وترى اخوي وظيفة الفني حل المشاكل وحماية السيرفر ومراقبته ، لكن هذا جالس لك تحقيق وتهديد

نصيحه خذ باك آب و ارسل له رساله ثانيه وقله يعطيك معلومات الروت وقله انا مستغني عن خدماتك
وفيه أشخاص كُثر بسوالف أهل خبره واداره انت بس اشر واختار وكلهم ثقه ان شاء الله

[Ali Hamad]

عليكم السلام ،

العقد ، الاتفاق الاولي الي بينك وبينه وش يقول !
انا سابقا لما كنت ادير سيرفرات ، كنت اشرط على الي ياخذ سيرفر ايا كان مايخش شل ابدا ، ومقفل البورت ولايقدر يخش. ليش لاسباب خاصه فيني وبالاتفاق وكانت الامور ماشيه بيني وبينه .. واي شيء يبيه انا اعطيه ، وفي حالات نادره كنت اعطي شل بس بشرط اني ماني مسؤول عن اي خطا ينتج بعده . الخلاصه ان الشيء بناء على الاتفاق .

بس في حالتك انت ، انصحك ترجع للعقد وتتفاهم بالتي هي احسن . الشخص الي يدير السيرفر هو الشخص الي كسب ثقتك ورحت له في استضافته ، فانصحك تتفاهم انت وهو بعيد عن اي حساسية او اي مشاكل ، لانه الشخص الي كسب ثقتك في البداية اكيد بيكون محل الثقة الي انت حطيتها فيه وبيتعاون معك وبيفهمك ليش وش السبب الي دعاه يسالك هالاسئله .

بالامانه ، كنت ومازلت ادير سيرفرات عربية بشكل شخصي ، ولما يطلب مني صاحب الموقع/السيرفر ( خصوصا اذا كان غير ملم بالامور التقنيه ) اي طلب واشك فيه ، اساله اساله كثير لحد مااعرف وش السبب وفي اكثر الاحيان ابدي رأي ووجهة نظر وفي الاخير ماامنعه لان له حق التصرف في اللي يبيه بس اعترض اذا كان بيضر السيرفر في اي شيء ، ولا اعتقد ان الموضوع يكون فيه مذله ، الا بالعكس انا حريص على كل ملف يرتفع في السيرفر ولازم اعرف وش الي في الموقع لان امان الموقع وادائه من امان السيرفر وادائه . وبالمناسبة ال 73 جيجا الي تقول عليها ، ترى الي متوفر لك كمساحة ممكن مايوصل 43 جيجا لو افترضنا ان السيرفر تقسم على 10 ، 15 ، 4 لـ / ، var ، و Swap على التوالي .

في الاخير ، مثل ماقلت لك في الاولي ، الشخص الي كسب ثقتك وامنته على شغلك ، اكيد انه محل الثقه وانشاء الله يتعاون معك لكن بالتفاهم .. ولو كنت مكانك ، اول خطوة راح ارجع لها هي العقد والتفاهم !

كل الود /
علي حمد ،

[UAEmirates]

شكرا لكم جميعاً على الرد

المشكله لو عندي فكره عن إدارة السيرفرات كنت باخذ التحكم من عنده و بفك عمري من هالمشاكل , لكن مثل ما أنتوا عارفين السيرفر مب نفس البرامج و السكربات عشان الواحد يجربها في اي مكان .

انا فكرت في الموضوع و قررت أكلم صاحب الشركه نفسه و إذا شفته متجاوب و بيقف الفني هذا عند حده كان بها , اما أذا صاحب الشركه نفسه هو الي معود موظفينه على هذا الاسلوب بنغير الشركه و انا شفت اليوم شركات اجنبيه كثيره عندها مواصفات حلوه و بسعر اقل .

انا لم بدفع 4000 درهم كل 3 شهور اريد ارتاح مش أكتشف إني ادفع مقابل 2 جيجا الي ما تسوى 50 درهم

شكرا مره ثانيه و بكتب في موضوع منفصل بعض العروض الي حصلتها في شركات اجنبيه و باخذ رايكم فيها و في سعرها

[majed2002]

لا هو ولا عشره من امثاله يقدرون يتحكمون ولا يقولون رايهم عليك او يسوون اللي يبغونه والله حرام مخلنك جذه لو بدالك ما بخلي موقعي ليله عنده وبنقل الموقع وبخليه يدفع كل الفلوس مب لعبه وانا اضمن لك مليون بالميه انه الموقع مالك على استضافه عاديه .... والله قهرني رده يقولك

ليش موقعكم مستهلك كل هالمساحه ؟ و انتوا شو تسون ؟ المفروض موقعكم ما يكون في ملفات .. إلخ

:anger2:
:anger2:

سوووري انفعلت شوي بس يقهر هالانسان