السلام عليكم و رحمة الله
احب اقول قبل كل شي ان الكلام كله اللي بعد السطر هذا هو رأي شخصي، أنا متاكد ان في ناس بتخالفني او بتضحك علي او بتستسخف بكلامي بس مثل ما قلت. كل هذا مجرد رأي شخصي من نظرة عربي مغترب
الأسباب الاتي أدت الى تصنيف العالم العربي ضمن العالم الثالث و نتائجها:
الكسل و الاتكالية:
تلاقي الواحد فينا يسئل السؤال قبل ما يدور على اجابته
خلينا ناخذ مثال
عربي او عربيه ودها تغير ايميل الهوتميل او الياهو
ويش يسوي الاخ ؟
بدل ما يدور في قائمة الخيارات في الايميل او يدور في قسم المساعدة او على الاقل يدور على جواب سؤاله في القوقل يروح يكتب موضوع في المنتديات يسئل فيه كيف يغير باسورد الايميل
و النتيجة
بحث في القوقل 'كيفية تغيير باسورد ايميل'
12,300 نتيجة القوقل الى السؤال هذا
يعني في 12,300 موضوع او مقال او بلوق فيه شرح الى طريقة تغيير الايميل
طيب ما احد فكر يدور يقبل ما يسئل ؟
و في غيره كثير
هنا مثلا في سوالف انا اشوف ناس تسئل اسئله مكرره في سوالف سوفت نفسها و الكل يعرف الكلام هذا
ليش ما ننفض الكسل عن انفسنا شوي و ندور جواب سؤالنا في القوقل قبل ما نسئل ؟
لان هذا الشي يؤدي الى الاتكالية و هذا الشي فينا احنا العرب طبع
نحب نتكل على الناس اللي تفهم و نرمي عليها طلباتنا بدل ما نحاول ان نتعلم كيف نسوي الشي بنفسنا
"يا ابو محمد الله لا يهينك ممكن بنر ؟"
"يا ابو هاشم، عارف اني ثقلت عليك بس الله لا يهينك عندي xxxx ما يشتغل في الموقع ممكن تشوفه لي؟"
"يا ابو علي ودي اغسل السياره ممكن تاخذ السياره الى المغسله؟"
و ليش تروح توديها المغسله؟ يا شباب احنا لسه شباب ليش ما الواحد فينا يعبي السطل و يغسل سيارته بنفسه ؟
اكبر مثال على الاتكالية في الخليج العربي هو ظاهرت الخدامات
نتكل عليها في الاكل و في الملبس و بعض الناس يخلوها تشتري الاغراض حق الثلاجة !!!
يا عرب لو كل واحد فيكم يرتب سريره لما يقعد من النوم و يسوي اكله بنفسه و يودي سلة الغسيل الى غرفة الغسيل كنا رفعنا اقتصاد البلد و وفرنا على نفسنا فلوس و قطعنا احد اكبر مصادر تهجير الاموال العربية الى شرق اسيا
كل هذا لان احنا كسولين و اتكاليين
العمالة الهندية في دول الخليج تضاعفت 22 مرة خلال 25 سنة
القرائة و المطالعة:
معظم العرب للاسف غير مثقفين
بعباره أخرى،، ثقافتنا للأسف محصورة على المناهج الدراسيه
لو تسئل واحد سؤال خارج المنهج تلاقيه بكل بساطه يرد عليك: "ما اعرف ما درست انا الكلام هذا"
كم واحد هنا نوى يدرس اللغه الانجليزية ؟
اتوقع نصكم عندة النيه و النص الثاني يقول المدرسة كفايه
كم واحد فيكم عنده مكتبة كتب خاصه فيه (مش خاصه الى البيت) ؟
3؟ 5؟
طيب اذا عندك مكتبة كتب خاصه فيك،، كم كتاب فيهم قرأته ؟
لا احد يحسب لي الجرايد او المجلات او قصص نبيل فاروق او غيره
انا اتكلم عن كتب جادة
احنا ما شاء الله علينا نفضل طلعات البر او الجبل او السفرات على قرائة الكتب
طيب مو غلط الواحد يطلع و يتمشى او يقعد يشاهد تلفزيون
بس هل خصصت وقت من يومك لقرائة كتاب مفيد ؟
اعطيكم مثال
كتاب عن الطبخ ( ليش ما تتعلم كيف تطبخ اكلك )
كتاب عن الاقتصاد الذاتي ( ليش ما تتعلم كيف تكون مقتصد بدل ما تشتكي ان دخلك ضعيف)
كتاب عن PHP او MySQL او PhotoShop (اذا انت ودك تتعلم ليش ما تدور كتب او مجلات متخصصة و تتعلم منها)
طبعا لان احنا ناس ما نحب نتعلم نعتمد على غيرنا حتى في المدرسة و الجامعات
طلعت دراسه امريكية تتكلم عن كيف ان العرب فنانين في اساليب الغش في الاختبارات سواء في المدرسة او الجامعه
طبعا احنا ما نحتاج الى دراسه اجنبية علشان نعرف الكلام هذا
كلنا نعرفه
تصدقون هنا في امريكا و في بريطانيا كمان في الاختبارات الجامعيه
يجي المدرس يعطي ورقة الاختبار و يطلع من قاعة الاختبار
ولا احد يطالع حوله مع انهم يقدروا و بعضهم متورط في سؤال و محتاج الاجابة
لكن كل واحد يعتمد على نفسه و يشتغل على ورقته
الواسطة:
طبعا لان معظمنا نعتمد على بعض و يا كثر اللي يتخرجو بشهادات بدون علم و بمعدل مشي حالك تلاقي الخريجين المساكين مش ملاقين وظيفه
المسكين كل ما راح مكان و قدم رفضوه
و بعدين نهاجم الحكومة و القطاع الخاص او نريح راسنا و نقول ما في وظايف
و العيب تلاقيه في الخريج نفسه
كل ما قدم عرض عليهم سيرته الذاتيه اللي كلها سطرين واحد فيه اسمه الثاني منه متخرج مبعدل جيد
وين تبي الشركة او المؤسسة او او او توظفك ؟
اذا طول عمرك مستمل من الدراسه و ما لك مزاج ليها و ما لك اي نشاط في اي من النشاطات الجامعيه و لا فكرت تروح تشتغل في الصيف
و طبعا لان الانسان هذا يائس يروح يدور الواسطه
فيتامين واو
و هذا اللي خرب بلادنا
اللي يستاهل ينرفض و اللي عنده اقوى واسطه يتوظف
لا و اذا واسطته قويه تلاقيه مدير على موظفين صار ليهم 25 سنه في الشركة و كل واحد فيهم احق منه بالمنصب اللي راعي الواسطه ماخذه بس الشكوى الى الله
و اشكال الواسطه كثيرة في العالم العربي
و معظمها علشان ناس ناخذ شي غيرها احق منها به
بس الشكوى الى الله
العنصرية:
اكثر شعب عنصري على كوكب الارض
و العنصرية عندنا ليها اشكال و الوان ما يعلم بيها إلا رب العالمين
العنصرية الرياضية
احنا العرب نحب الرياضه
خصوصا كرة القدم
و اكثر العرب اللي يحبوا كرة القدم هم اهل الخليج
يحبوها الى درجة ان الاصدقاء يتخاصموا لان كل واحد فيهم يشجع فريق كرة قدم
يحبوه الى درجة ان الرجال يطلق المدام لان صار في مضاربه في البيت بعد مبارات الهلال و النصر
او البرازيل و فرنسا
ويش مستوى التفكير اللي وصلنا له
انا مره من المرات جتني دعوة غداء في بيت واحد من الكباريه في البلد
فلما سئلت راعي العزومه عن سبب الغداء قال لي لان البرازيل فازت بالمباراه قبل امس
العنصرية القبلية
هذا من القبيلة X و ذاك من القبيلة Y
و كل واحد منهم يحط في الثاني
العنصرية الاقليمية
هذا سعودي و ذاك كويتي
او هذا جداوي و هذاك حساوي
او هذا خليجي و ذاك مصري
العنصرية الجنسية
و خذ لك كلام الرجال على البنات و كلام البنات على الرجال
تلاقي اخينا في الله توه جاي الديوانيه و ما له مزاج الى احد و واحد من الربع يقول له خير ان شاء الله تلاقيه يقول "نسوان" او "الحريم الله #*%#*&# ....
او البنت رايحه الى بيت ام محمد (مكان ما يتجمعوا البنات) و ما ليها مزاج و كل شوي تقول "أوف" و وحده من البنات تسألها خير و ترد البنت "الرجال يا ربي #*%#*&# ...
طيب ليش كل هذا يعني علشان خالفتك بالراي او خالفكي بالراي خلا حطيتوا السالفه تحت عنوان رجال او حريم
طيب لو انت رجال و صارت السالفه نفسها مع واحد من الربع ويش كنت بتقول؟
رجال ؟
ولا علشانها بنت ؟
العنصرية الدينية
احنا العرب كلنا مسلمين
و اي مسيحي عربي او يهودي عربي ما نعترف فيه
لان كل العرب مسلمين !!!
طيب و العرب المسيحيين وين موقعهم من الإعراب ؟
ليش كل ما شفنا عربي مسيحي او يهودي تربصنا به
ليش كل ما شفنا مسيحي قلنا له "ثلث الثلاثه ايه؟ "
طيب يا اخي دينه خله في حاله
ربي يقول لهم دينهم و لي ديني
بما ان الانسان هذا محترم حاله و محترمك احترمه
ما يحتاج نسوي فيها استنكار و احتقار و و و و
كل واحد على دينه الله يعينه
للاسف العنصرية هذي بدينا نشوف نتائجها الان
منتديات عربية مسيحيه تهاجم العرب المسلمين و تدافع عن الدين المسيحي
و ايميلات كمان
كم واحد فينا وصله ايميل تبشير الى الديانه المسيحيه ؟
انا وصلني كثير
طبعا انا كمسلم مثل الكثيرين هنا ما بتأثر فينا الايميلات هذي
بس مش هنا الكلام
الكلام هو ان العنصرية هذي ما ليها داعي
خلاص انت مسلم مبروك انت مسيحي مبروك خلاص كل واحد يروح يفتح كتاب و يتعلم شي يفيده في حياته بدل ما نضيع وقت و نتكلم على بعض و نخرب على بعض و نحط عقبات على بعض
العنصرية المذهبية
و يا حب سوالف الى النوع هذا :app:
شوفوا الروافض ويش يقولوا و ويش يفكروا و ويش و و و
كله كلام كلام فاضي مع احترامي كل اللي تعبوا على مقالاتهم الي ماخذينها من العراق و ايران و اللي كلها مسنكره من اي شيعي في دول الخليج
انا شيعي و اعرف مذهبي زين و كل ما اشوف موضوع في سوالف سوفت اقول الى حالي"بالله ؟!!"
بس بغض النظر عن الكلام اذا كان صحيح او لا
ودي اعرف ويش القصد من التحريض هذا كله ؟
تقسيم المجتمع ؟
طيب المجتمعات العربيه مقسمه من زمان الى 500 قسم
مقسمه مجتمعات رجالية و مجتمعات نسائيه
مقسمه تقسيم ديني
مقسمه على سحب انت من اي دوله عربيه
مقسمه على حسب انت من اي مدينه
مقسمه على حسب انت من اي قبيله
مقسمه على حسب انت من اي عيله
مقسمه على حسب اي فريق انت تشجع
و كل عنصرية من العنصريات اللي انا ذكرتها
شي منه له اصل و شي ما له اصل
و شي مفهوم غلط و شي عليه بهارات زايدة
طيب ليش كذا يا اخوان
كلنا ابناء ادم و حواء ما يصير
مره قاعد انا و كم واحد امريكي و قاعدين نسولف و شوي تغيرت السالفه عن العرب اللي عندنا هنا في المدينه
كانوا مستغربين ليش العرب اللي عندنا في المدينه يحاولوا يدمروا بعضهم البعض
و يتربصوا على بعضهم البعض
و يتكلموا على بعضهم البعض
و خصام و تهديدات و و و
فلتفتوا لي و سؤلوني ليش ؟
مش كلكم ولاد ديره وحده؟
مش كلكم مسلمين؟
انا احترت ويش ارد
فقلت ليهم "that’s way we have 22 Arabian countries"
بالعربي "لهذا السبب عندنا 22 دولة عربية"
من وجهة نظري العنصريه طبع في البشر عامه مو بس في العرب
لكن مشكلة العرب ان العنصرية تأثر على احترامهم الى بعضهم البعض
من وجهة نظري اللي يعاملك باحترام عامله بأحترام
بغض النظر من يكون
او من أي دوله هو
او أي ديانه
او أي مذهب
او أي قبيله
او أي عيله
او يشجع أي فريق
اللي يعاملك باحترام عامله بأحترام
اتمنى ان تاخذوا كلامي بروح واسعه
انا عبد من عباد الله و كلنا نغلط
فإذا غلط انا اعلى احد فانا اعتذر
لكم مني اجمل تحيه
و عسى الله ان يهدينا الى الثقافه
و الى العمل
و الى الامانه
و الى الوحده
و الى احترام بعضنا البعض