السلام عليكم ورحمة الله وبركاته
انا من الناس الي ماتحب الشعر كثير ولااهواه او ادوره
ولكن بعض الاحيان اقرا اشياء تضرب بالصميم
وهذي القصيدة خلتني اقراها للأخير غصبن عني
واظن بيصير لكم مثلي
بسم الله
غثا.. وش هالغثا؟ ...كل القصايد عن غلا الاسعار
طبيعة ربعنا ..لا قال شاعر ...رددوا زيه
ترى غثيتمونا بالحكي يامعشر الشعار
وانا خابر قصايدكم ...خجوله وانهزاميه
على ثالوث الاشعار المقدس تكمن الأخطار
سياسات الدول ...والجنس... والذات الإلهيه
واشوف اكثركم اليومين هذي....صار دمه حار
غلاء الرز ولّد فيكم الروح القتاليه
نصيحة جربوا كبسة شعير مكشنه ببهار
اهي فرصه تخف كروش بعض العالم شويه
ولكنّ البلا حتى الشعير الزين سعره نار
وساوتنا البهايم في الغذا ...قيمه ونوعيه
ويمكن تسمعون من البهايم جملة استنكار
(هذي عيشه ... هذي عيشة بشر في وسط محميه )
ما دام إنا نثور بدون ما نفهم مع اللي ثار
ابفهم بس ... ليه افكارنا ضحله وسطحيه؟
ولا يهرف بما لا يعرف ..إلا واحدٍ ثرثار
يصيح بشي ما ينفع .. ولاهو ذات اهميه
تروّوا وافهموا ..ما للحكومه ذنب في اللي صار
ولا في يدّها تخفيض الاسعار الخرافيه
صحيح إن التجاره تاخذ الموضوع باستهتار
ولا لحماية المستهلك أي ادوار فعليه
ولكنّ اقتصاد العالم .. بخبرة يهود ..يدار
وهذا اللي حصل لعبة سياسات اقتصاديه
طبيعي يرتفع سعر البضايع... فرصة التجار
لأن النفط لقمة عيش ... واسعاره خياليه
انا اذكر يوم كان النفط سعره بثنعش دولار
وكنا عايشين بفضل ربي في رفاهيه
وصارت عائدات انتاجنا ضعفين للمقدار
بديهي حصة الفرد اصبحت 200%
تفاءلنا بخير وطار منا بالفرح من طار
ولكن للاسف باقي الرواتب زي ماهيه
تقسّم راتبك مصروف يومي ..ما يجيب فشار
مع فرق اتساع محيط الاشياء الاساسيه
لذا ...تحسين وضع الفرد واجب ..مطلب استقرار
لتحقيق التوازن حسب الاحوال المعيشيه
واذا ما حسّنوا وضعك .. فلا قدامك أي خيار
سوى انك تنحرف وتصير من ضمن الحراميه
أنا في رأيي إن اللي فقير بهالزمان ..حمار
مسوي لي مثالي ... خلّ تنفعه المثاليه
لو انه يفهم اصبح ما يفكر غير بالمليار
ولا يبغي لها مجهود ... شغله بهلوانيه
بسيطه ... كل مافي الامر يفتح شركة استثمار
يقدم للتجاره بانشطه واوراق وهميه
ويستعرض بمكتب كل قطعه فيه (سفن استار)
ويغري هالغلابه بالعبارات الدعائيه
يلاقي بالهبل .. هبلان زيّي .. معسرين افكار
يجونه ينفضون جيوبهم ... ياحي هالجيه
يلم من الدراهم لين ما يشبع ..بسطر إقرار
وتحت السطر .. دمغة ختم تعكس طيبة النيه
يحط لهم سكرتير اجنبي يعرف يجيب اعذار
وهو يجرد بهم ... واللي ورط ياكل ملوخيه
وحتى لو يفكر يشتكي .. ماغير اكل مشوار
لأن وريقته لمؤوسسه ماهي نظاميه
يقولوا له... تصوّر جنبها ياحلو.. للتذكار
ترى القانون ما يحمي المغفل يا افنيديه
ينقّعها ويشرب مايها ع الريق سبع مرار
مناعه جيده ضد الدلاخه وبـفعاليه
ويرقب كل يوم اثنين وش تحمل له الاخبار
ولا ينسى يقول الله يعزك يالسعودية
صح لسان كاتبها
الحقيقه مااعرف من كاتبها وانا نقلتها من ايميلي لسعادتكم
وفقني ووفقكم الرحمن وتقبل منا جميعا
رد مع اقتباس
