تطوير تطبيقات facebook باستخدام المنصة f8 وال PHP

[Hawy PHP]

بسم الله الرحمن الرحيم
للاسف الوقت فعلا صعب و سيف حاد فعلا لازم تخلص عليه قبل ما يخلص عليك

النهاردة هنتكلم ان شاء الله فى تطبيقات الفيس بوك facebook Apps وازاى نبدا نعمل تطبيق على الفيس بوك خطوة بخطوة عن طريق ال API الى هما وفروها وبصراحة شغل رائع جدا من مارك ومعاونيه الكلام الي جاى كله من موقع دعم المطورين بالفيس بوك وياريت تلقوا نظرة على الفيديو F8 Keynote

اول حاجة لازم تعملها انك تضيف التطبيق الخاص بالمطورين علشان تقدر تضيف تطبيق جديد وتاخد الرقم الخاص بيه
وهتضيفه من هنا Add Developers App

وبعد كده فى درس خفيف بيشرح خطوة بخطوة ازاى تاخد رقم خاص للتطبيق بتاعك وازاى تقدر تسجل التطبيق بتاعك
انا كنت هشرح الدرس بالعربي ولان مفيش وقت فقولت احط لينك الدرس وان شاء الله هو سهل جدا

مارك ومطورين الفيس بوك وفروا API اكثر من رائعة وده الشرح بتاعها
الى عجبتني اوي ال FQL - Facebook Query Language علشان تقدر تستعلم عن بيانات العضو او المجموعة او اى بيانات فى الفيس بوك و تقدر تطلع تطبيق يتفاعل مع المستخدم و هي مماثلة لل SQL والشرح بتاعها من الرابط السابق ايضا

بردو هتلاقي ال FBML - FaceBook Markup Language هي مماثلة للHTML مع بعض التعديلات على العناصر الداخلية واضافة البعض للتوافق مع منصة الفيس بوك - الشرح بتاعها من هنا

بصوا هتعيشوا هتعيشوا هتعيشوا بجد عالم تاني
لا وخشلي هنا بقي وتشوف العجب
دي اداة تختبر فيها التقنيات السابق الحديث عنها وتقدر تطلع الخرج اما بال XML او JSON [قوية جدا - كان عرفني عليها احمد ابو النصر] و PHP

انا عملت تطبيق صغير بيجيب اخر عشر تدوينات واخر عشر مقالات من مدونتي

ومكنتش عارف اضيف الصورة الخاصة بصفحة التطبيق منين .......
والى عرفني عليها اخي عمرو صبحي صاحب تطبيق امساكية رمضان 1428 هـ فى الفيس بوك طلعت بتتضاف من جوه تطبيق المطورين Developers وبعد ماجيب التطبيق بعدل على ال About Page بتاعت التطبيق

درس اخر عنجليزي بس جامد جدا لDavid Mytton ( صاحب برنامج iono الشهير ) بيشرح فيه مقدمة الapi بشكل مبسط

حاجات تانية اعرفها ان شاء الله هقولها فى مرة تانية بس دلوقتي مفيش وقت خالص لاني بتكلم من سيبر جنب المدرسة ولازم اقوم دلوقتي قبل البوابة بتاعت المدرسة ما تتقفل

ادعولي يا جماعة بالله عليكوا لو استفدتوا
او حتي لو مستفدتوش

محمد ،،

[أحمد أبو النصر]

ماكنتش اعرف انك بتتكلم بجد لما قلت انك هاتنزل درس عن الموضوع ده بغض النظر ان الدرس اكتر من رائع
مش عارف يمكن مش يكون له اهميه كبيرة !!!
مستني رأيك

تحياتي

ملحوظة : اوعي تاخد الكلام ده علي محمل شخصي انت عارف ان انت زي شريف<-اخويا الصغير

[abu_eldahab]

السلام عليكم ورحمة الله وبركاته
مع إن عمرو مركب الإمساكية علي موقعي بس مكنتش فاضي أعرف منه التقنية دي
إن شاء الله الواحد يلاقي وقت ويطلع علي التقنية دي
جزاكم الله خيراً

[Hawy PHP]

@ sBForum

جزاك الله كل خير يا احمد

بالنسبة لاهميته

اذا كنت قريت الدرس الانجليزي التاني الى انا حطيت لينك ليه

هتلاقي كاتب فى اول الدرس ( لماذا عليك الاهتمام بهذا الدرس )

وكانت الاجابة

وفقا لاحصائيات اليكسا ففيس بوك من اول 20 موقع وله العديد من الاحصائيات مثل :

• الموقع ينمو بنسبة 3 % كل اسبوع اى تقريبا 100,000 اعضاء جدد كل يوم
  50% من الاعضاء المسجلين بيزوروا الموقع بصفة يومية
  ده غير تفوقه فى الترافيك على موقع eBay بنسبة 50 صفحة لكل مستخدم لكل يوم

ويمكنك الدخول هنا وتري كمية التطبيقات المنتشرة بكثرة
Facebook | Application Directory

فالدرس مهم جدا لمرتادي FaceBook ومحبيه كونه اكبر موقع Community فى الوقت الحالي
وتحاول مايكروسوفت وجوجل شراءه بملايين ولكن مارك يرفض لانه يريده حرا للجميع

وبعد كل هذا اذا وجدت الدرس غير مفيدا فهذا رايك وانا احترمه جدا ولكني اتمسك ايضا برايي فى كو ن الدرس مفيد لمشتركي ال Facebook المبرمجين او مطورين المواقع

ويمكن استخدام الدرس بصورة احسن مثل عمل التطبيقات الاسلامية ومثال على ذلك

تطبيق امساكية رمضان لاخي عمرو صبحي وقد ذكرته فى الموضوع من قبل

وستجد هنا بعض التطبيقات الاسلامية للقران الكريم Facebook | Login

ودي صورة علشان لو محدش مسجل دخول ومش عاوز يسجل دخول دلوقتي ( بالمرفقات )


وطبعا انت زي اخويا الكبير والاختلاف فى الراي لا يفسد للود قضية ولا ايه رايك

@ abu_eldahab
وعليكم السلام ورحمة الله وبركاته

جزاك الله كل خير على استضافة تطبيق الامساكية جعله الله فى ميزان حسناتك

وان شاء الله التقنية سهلة وبسيطة

اخوكم محمد ،،

[أحمد أبو النصر]

الموقع ترتيبه دايما بيلعب بين رقم 7 و رقم 8 عالميا طبعا الموقع لا خلاف عليه انا عن نفسي مسجل عليه <- من قريب بس
بس اللي انا عايز اقوله ان الهدف من الدرس ده هوه تعليمنا استخدام الapi
يعني مش لقيت غير الfacebook اللي تعلمنا الapi بتاعته !!!
يعني في مليون موقع غير الfacebook اشمعني هوه
مثلا كان ممكن نتعلم نستخدم الapi الخاص بجوجل او كده مثلا مش لازم الfacebook يا رب اكون قدرت اوصلك وجهة نظري
ملحوظة : لو هاتخرج يوم الجمعة <- النهاردة اتصل بيا احتمال نخرج انا و محمد حمدي

[Hawy PHP]

@ sBForum

يعني مش لقيت غير الfacebook اللي تعلمنا الapi بتاعته !!!
يعني في مليون موقع غير الfacebook اشمعني هوه

شكلك مقرتش الرد بتاعي كويس

بغض النظر عن ترتيبه واحصائياته ، شوفت التطبيقات ؟؟؟

لو كنت شوفت اخر الفيديو الى قولت عليه فى اول الموضوع هتلاقي ان فى شركات كبيرة جدا بتعمل تطبيقات للفيس بوك لكونه اكبر موقع Community زي Slide و RockYou وغيرهم

وكمان مش معني اني قولت احط لينكات عن تعليم API Facebook تبقي هي احسن من بتاعت جوجل :looking:
لا طبعا API جوجل لا غبار عليها :1power:

ممكن مثلا نعمل تطبيق لسوالف بحيث ان العضو فى سوالف يقدر يشوف كل المواضيع الجديدة فى قسم معين او فى سوالف كلها وهكذا :app:

عالعموم انا كنت فاكر ان مفيش اى حد عربي اتكلم عن الموضوع ده

ولكني وجدت اخ عزيز سبقني فى التحدث عن تطبيقات الفيس بوك وبرمجتها وهو الاخ محمد بشير جزاه الله كل خير :nice:

وقد قام هو ايضا باستخدام الAPI بصورة رائعة بعمل تطبيق لموقع الجزيرة توك لانه فى فريق العمل الخاص بالموقع

ساتركك تري تصنيف الفيس بوك فى مدونة الاخ محمد بشير ربما تقدر اهمية الAPI الخاصة بالفيس بوك

يارب انا الى اكون قدرت اوصلك الفكرة

وياريت لو تقرا مقدمة الدرس ده Developing with the Facebook Platform and PHP انا كنت اشرت اليه فى اخر الموضوع وربما لم تاخذ بالك منه


اخوك محمد

[mezoo]

جميل المقال
أهم ما فيه أنك مكتبتش كتير ولكن دليتنا عن ناتج بحثك في الموضوع وده شئ جميل

بالنسبة لجوجل وفيس بوك فأعتقد أنكم بتتكلمو عن الـ API بتاع جوجل الخاص بالبحث
وانا شايفه مش بقوة فيس بوك أو بمعنى أصح عشان محدش يدخل فيا شمال فأنا شايف ان الأقرب لمواقعنا هو FaceBook ﻷنه أعمق طرق المشاركة بين فريق الموقع والمطورين !! يعني أنك تقدر تضيف على الموقع نفسه ده شئ قوي وأنه عمل لنفسه مجموعة من الأساليب توفر عليه لعب السكيوريتي زي FQL و FBML ﻷنه محتاج يترجمهم بس ومش محتاج يفلتر اوي ﻷنه وبساطة مش هيترجم ألي ميعرفوش وبالتالي مش هيكون ليه تثير قوي.

المهم أنا يهمني كمبرمج الخوض في الجزئية دي لكسب طرق جديدة أشارك بيها زوار موقعي وعشان كده انا شايف أن الـAPI بتاع الـFaceBook أفضل في شرحه ومفيد أكثر لينا.

"انا شايف أن في عشم شوية من ناحية أحمد أبو النصر في الكلامو حدة سنة في الكلام من ناحية هاوي"

[Hawy PHP]

نورت الموضوع يا حازم

فعلا زي منتا قولت تقدر تستفاد منه فى انك تشارك زوار موقعك المشتركين فى فيس بوك

وومكن مثلا تعمل تطبيق بيعرض اناشيد عشوائية من مسلم تيوب او اخر عدد من البومات او اناشيد من مسلم تيوب

"انا شايف أن في عشم شوية من ناحية أحمد أبو النصر في الكلامو حدة سنة في الكلام من ناحية هاوي"

لا والله مافيش حدة ولا حاجة احمد اخويا الكبير

وانا بحب المناقشة ووجود راي اخر علشان بيخلي الواحد يطلع كل الى يقدر عليه علشان يثبت صحة رايه

وزي ما قولت الاختلاف فى الراي لا يفسد للود قضية ولا ايه يا احمد

[SLASH]

سكربت مماثل تماماً للفيس بوك

حتي تقريبا بنفس الستايل

Social.Engine.v1.8.0.Nulled Scripts

[Developer.]

السلام عليكم,,

موضوع جميل يا محمد وتشكر عليه ..

انا كان ليا تجربة لا بأس بيها مع الأبلكيشن بتاعت الفيس بووك والـAPI بتاعه قوى جداً ... وانا من رأى ان افضل مكان تتعلم منه تعمل ابلكيشن على الفيس بووك هو الWiki بتاعه لانه جميل جداً ... والمطورين مهتمين آخر حاجة مافيش مرة راسلتهم واتأخر الرد بتاعهم عليا .. غير ان قاعدته انتشاره واسعة جداً (على الأقل فى مصر إدمان للفيس بووك)

ومعلش مافيش وقت اتكلم بشكل اكبر من النحية البرمجية .. وشكراً مرة تانية يا محمد ..

[Hawy PHP]

@ SLASH :
جزاك الله كل خير

@ Developer :
وعليكم السلام ورحمة الله وبركاته

ربنا يكرمك يا احمد والموضوع جميل بردودكوا

وفعلا مطورين الفيس بوك مش بيتاخروا فى الرد على اى سؤال بس مشكلتي معاهم ان الرد دايما يجي تاني يوم معرفش ليه

والويكي طبعا رائعة و فيها شرح لكل وسم Html مدعوم داخل ال FBML

وكويس ان انت معايا فى ان فى ادمااااااان للفيس بوك فى مصر يعني مقابل كده فرصة انتشار التطبيقات العربية كبيرة جدا ويارب احمد ابو النصبر يفهمني

[أحمد أبو النصر]

:anger1::anger1:
مش قوي

انا اللي هافهمك بكرة في كويس <- في المييت :anger2:

[Wael is the winner]

بالتوفييييييييييييييييييييييييق ان شاء الله

[Developer.]

وفعلا مطورين الفيس بوك مش بيتاخروا فى الرد على اى سؤال بس مشكلتي معاهم ان الرد دايما يجي تاني يوم معرفش ليه

والويكي طبعا رائعة و فيها شرح لكل وسم Html مدعوم داخل ال FBML

وكويس ان انت معايا فى ان فى ادمااااااان للفيس بوك فى مصر يعني مقابل كده فرصة انتشار التطبيقات العربية كبيرة جدا ويارب احمد ابو النصبر يفهمني

مجرد ان يجى فى خلال 3 أيام ده معدل رائع جداً لموقع كبير فى حجم الفيس بووك

الويكى على فكرة فيه حاجات مهمة زى ازاى تعمل invitations للابلكيشن بتاعك وده مهم جداً

ويا احمد الفيس بووك منتشر اكتر ما تتخيل لكن رغم كده فيه ناس كتير رافضينوا جداً جداً بسبب انه بياخد وقت كبير جداً من التصفح اليومى للناس وده فى حد ذاته تضيع وقت ..
ولكن الأغلبية العظمى عندهم Facebook Mania .. وفيه أبلكيشن عربية واخدة حقها بشكل حلو
(وهى معظمها الأبلكيشنز الإسلامية) ..