[الرياض] تلقيت صفعتين في عز الغبار (للعوائل فقط)!!!

[Farasan.org]

خل معك كيس في السيارة , حط فيه اي شي وادخل على ان بترجع غرض .

صراحة فكرة حلوة وموقتة !!!! الظاهر الكيس طوّل في صندوق سيارتك

صراحة أنا مع السماح وتشديد الرقابة! وكم أتمنى أن يكون العقاب في نفس اللحظة وأمام الناس :court:

[mad921]

يارجال عندهم بشر ما تدري وش يفكرون ما ادري وش تبي ليتها تتوقف على انك تدخل وبس


معلومة ياشباب لا احد يتوهق ترا لو دخلت بمخرج طوارئ ومسكوك سكرتية يحق لهم حولونك

اقرب قسم شرطة و بمسمى دخول غير مصرح به

غير الي يمكن يجيك على ادنى سبب فوق راسك

الله يستر بسس

* ^ اذا بغيتو تروحون اسواق ولا تتقضوون برا السعوديه واتركو الساحه العائية قصدي الداخلية

[Abu Fahd]

خلو بناتنا للأجانب!!! ، وكارفور من الاسواق الفرنسية!

[NaT-Server]

للأسف الموظف (السيكيوريتي) غير مؤهل للتعامل مع مثل هذه المواقف
وبنظرته هو يجد نفسه مدير ويحاول يمارس سلطته بمنع الشباب
وتجد أكثرهم غير مكترث بسبب قدوم الشاب للسوق

لكن بمثل هذه الحالات قم بطلب السوبر فايزر واشرح له سبب دخولك (بالعادة يكونون مسؤولون ومتفهمون جداً)

[Farasan.org]

أخي على فكرة أنا طلبت مقابلة السوبر فايزر في كارفور قال حارس الأمن الكل كثيرين طلبوه ورد الكل!!!!!!!!!!


ما علينا من هذا كله تتوقوا أيش الحل في مثل هذه الموقف!! وين الواحد يشتكي؟

[سليمان عبدالعزيز]

انا مايرفع ظغطي بالسعوديه كثر هالنظام

نظام منع دخول الشباب بشكل عام

ياخي والي يرفع ظغطك اكثر

الي يشبك سكيورتي ويدخله ..

اعرف خوي ليـ مشبك له واحد بالمملكه .. متى مابغى يدخل اتصل عليه ودخل ..


بس اخوي لكل سوق طريقه تدخل فيها ..

عندك المملكه انزل من المواقف فيه موظف " سكيورتي " قله اهلي منزلهم من تحت ولا يعرفون الا هذا المخرج .. وراح يخليك تدخل وقف سيارتك بالمواقف وادخل السوق


عندك الفيصليه " مع الفندق "

حياة مول .. < هالسوق عليه زحمه رهيبه .. والطريقه الي ادخل فيها دائماً من بين العالم .. ولا امش جمب وحده < ماله داعي يوم تسويها وتتصفق .. وراح يحاسبها امك ولا اختكـ ..


صحاري .. < السكيورتيه بهذا السوق تمام .. سولف معه 5 دقايق بعدين ادخل .. ماراح يقول شي سويتها كذا مره

ولكل سوق .. تقدر تدخل معه بس فكر وراح تعرف تدخل ...

من ناحيتي ماقد رحت سوق ومادخلوني صح راح تواجه صعوبات وإن خلاص قفلت معك وعيا يدخلك تهاوش معه .. كثيرين من السكيورتي اذا تهاوش معه قمط .. ودخلكـ ...

وقبل كم يوم كنت بالبحرين شفت مناظر للشباب سعودين .. مو واحد ولا اثنين كثيرين بـ " السيف "

عرفت وش سبب منع الشباب من دخول الأسواق .. السبب يخافون ان يوصل الاسواق مثل السيف ..

[ABU WSAM]

والله العزاب من جد مظلومين بالسعوديه .

اول شي الاجانب اللي يدخلون هذولا يشتغلون بالمحلات والمطاعم وغيرها وعمال نظافه الله يكرمكم لازم يدخلون اوكي

ثاني شي يابعدي ليه من اول ماقلت كيف ادخل ياشباب ؟ كان عطيناك الحل .. . . جاي معصب وحالتك حاله

اسمع اذا تبي تدخل اي مجمع بالسعوديه او اسواق للعوائل فقط خلك رلكس وانتظر بعيد عن البوابه لين تشوف حرمه كبيره يعني معاها ولدها الصغير وخلك ملبق وراها بس لا تلصق لها مره على شان ما تخاف المره او تنتبه وراح تدخل وتدعيلي بس هاه اذا دخلت لا تناظر للحارس او السكيورتي كنك خايف لا تناظرله ابد وخلك طبيعي .

اذا انتم ثلاثه او اكثر اتفقو على كيذا وكل واحد يدخل من بوابه وتجمعو داخل المجمع طبعاً اذا تمشيتو داخل المجمع مع بعض صعبه وراح تلاحقكم الهيئه ههههههههه .


اتمنى لك تمشايه هنيه .

[سليمان عبدالعزيز]

ثاني شي يابعدي ليه من اول ماقلت كيف ادخل ياشباب ؟ كان عطيناك الحل .. . . جاي معصب وحالتك حاله

اسمع اذا تبي تدخل اي مجمع بالسعوديه او اسواق للعوائل فقط خلك رلكس وانتظر بعيد عن البوابه لين تشوف حرمه كبيره يعني معاها ولدها الصغير وخلك ملبق وراها بس لا تلصق لها مره على شان ما تخاف المره او تنتبه وراح تدخل وتدعيلي بس هاه اذا دخلت لا تناظر للحارس او السكيورتي كنك خايف لا تناظرله ابد وخلك طبيعي .

اذا انتم ثلاثه او اكثر اتفقو على كيذا وكل واحد يدخل من بوابه وتجمعو داخل المجمع طبعاً اذا تمشيتو داخل المجمع مع بعض صعبه وراح تلاحقكم الهيئه ههههههههه .


اتمنى لك تمشايه هنيه .

حركه حلوه بس إن سويتها وقفطك السكيورتي خلاص حفظ شكللك .. وماراح تدخل مره ثانيه ...

احسن طريقه قد سويتها ... رحت للبنت يمكن 27 سنه

وقلتله يا خاله < مسوي مؤدب :$

ممكن تدخليني

ودخلت
بس هذي يبيلها واحد وجهه قوي

لان قبلها تسفل فيني مرتين ...

يعني انت وحظك

[ram2009]

نظام المنع نظام فاشل و غير مجدي المفروض يكون مراقبة للمعاكسات او الخروج عن المالوف من تصرفات بعض الشباب أما ان تمنع لماذا و المنع في الاسلام للنساء أن يقرن في بيوتهن ( للعلم أن شايب و صاحب عائلة لكن هذي هي الحقيقة)

[عبدوو]

اعتقد المنع موجود فى الرياض فقط ولا انا غلطان ؟

[Abdullah Alhoshan]

امس رحت لجايتكس .. الصباح طالع قلت خلني امره قبل ما يخلص ..
وقلت الصباح اكيد بيكون خفيف مافيه زحمه ..

اول ما جيت توه بيفتح .. قالي عوايل .. قلت موب الخميس قوايل قالي الاربعاء عوايل الصباح وبالليل رجال

قلت طيب انا لحالي ومافيه احد عدني عارض وخلني ادخل .. انا متخصص في هالمجال ولا جايك احد في هالصبح .. قالي معليش تفضل لو سمحت لا تزعجنا هذا النظام ومن هالكلام

وانا طالع اشوف باص مدارس الرواد حقين الثانوي .. وينزلون ومشاء الله يدخلون مسموح للزيارات المدرسيه بس للشباب رافضين والمشكله قل انا شباب ممكن امشيها بس الغريب والله رادين ناس كبار وبعضهم لحاهم بيض ياخي والله لو انا عند الباب ما قدرت اردهم احتراما ً لهم .. وناس عارضين من اجانب وسعوديين مسموح لهم يدخلون يعني العارض غير عن الزائر !

الاسواق ممكن تكون مكان للمغازل ويجيها شباب يبون هالشي وفيه بنات يجون عشان هالشي

بس معرض كمبيوتر يعني ما يجي في الغالب الا لهدف مهم

مع اني شفت بنات يدخلون ،، اقص ايدي اذا هي تعرف تشغل الكمبيوتر ،،

بس وش تقول .. الشكوى لله ،،

[Farasan.org]

أنا لا أرى أن العزاب مظلومين ولكن هناك سوء في التخطيط والتطبيق والفهم!!!!

للأخوان الذي يريدون شرح طريقة الدخول على غفلة من حراس الأمن (ليس هذا موضوعي) وأنا أصلاً داخل للشراء فقط !!!

الموضوع كيف يسمح للأجنبي الدخول وما هي الأسباب!!!

لا يطلع أحد يقول هذول أجانب وفي بلادانهم الموضوع عادي!!! ترون أحنا في بلاد الحرمين والقانون يجب أن ينطبق على الكل.

[ملفى الأجاويد]

والله مشكله يبيلها حل كل مكان ممنوع واخرتها الشباب وين يروحون ؟؟؟؟؟؟؟؟؟؟؟؟


مشكورين

[Farasan.org]

والله مشكله يبيلها حل كل مكان ممنوع واخرتها الشباب وين يروحون ؟؟؟؟؟؟؟؟؟؟؟؟
مشكورين

المنع ليس حلاً بالتأكيد وأنا مع تشديد الرقابة :court: وضد السماح لفئة معينة حيث أن ذلك يورث الضغينة في مجتمعنا :court::court::court::court::court::court::court::court::court:

[Domain]

خلاص تعودنا وصرت اذا بغيت شي اروح الصباح اشتري الاغراض اللي ابيها وامشي
بشكل عام اكره الاسواق المغلقه والمجمعات خاصه بالمساء زحمة وقلق