أبحث عن وظيفة صغيرة بالدمام..

[متصفح سعودي]

طيب لو رحنا الدوام 6 ساعات يوميا ؟

انا اخلص كليتي 3 الظهر كيف بيكون الدوام ؟

اعذرني ازدي

[أزدي]

انا ما اقدر احدد لك شيء .. هذا يعتمد على الجهة اللي راح تتشغل معهم هم يحددون الوقت و المدة

بالتوفيق

[متصفح سعودي]

طيب وين برأيك ممكن ادور والاقي ؟

[AD4host.ae]

طيب وين برأيك ممكن ادور والاقي ؟

لو الاجابة بهذي السهولة ، ماكان في بطالة في الوطن العربي

<< آسف على المداخلة ولكن مجرد وجهة نظر تحتمل الصواب وتحتمل الخطأ !

[ماجيك اعلان]

تبي رأي
روح بنده - كارفور
او روح جرير او ايكيا
ذي الشركات لانهم يقدرون وقتك في الكليه
وممكن تحصل فيها شغل مناسب لك ومريح
والله يوفقك

[elnaif]

دوام جزئي بـ 5000 ريال

اخوي انت سعودي وعارف الوضع لو واحد ثاني ممكن نعذره

الوظايف هذي يالله تلاقي بـ 1500 ريال واذا حظك زين بـ 2000 ريال

وبالتوفيق

[متصفح سعودي]

فهمتوني غلط يا جماعة

انا كنت احسب الدوام الجزئي مثلا من الساعة 4 الى الساعة 11

ما كنت احسب الدوام الجزئي 3 او 4 ساعات فقط


اعذروني

بالنسبة لمكان الوظيفة..وين ممكن تنصحوني اروح فيه ؟

[أزدي]

جرب الشركات الي توظفين سعوديين هالايام
بنده - اكسترا - جرير - كارفور - ايكيا - العثيم و غيرها .. دور انت ما بتلاقي وظيفة ترا وانت مقابل هالصفحة و تنتظرها تجيك ^_^

[متصفح سعودي]

جرب الشركات الي توظفين سعوديين هالايام
بنده - اكسترا - جرير - كارفور - ايكيا - العثيم و غيرها .. دور انت ما بتلاقي وظيفة ترا وانت مقابل هالصفحة و تنتظرها تجيك ^_^

اكيد حبي ما بتجي..بس حبيت تكون عندي خلفية قبل لا ادور عشان لا اتعب وانا ادور واكون عارف وش ابي

تسلم والله ازدي على مساعدتك القيمة انت والاخوان

[M H J O L]

قبل 4 سنوات كنت اشتغل بإيكيا الرياض
كان الدوام 8 ساعات براتب 3500 تقريباً بزيادة سنويه ايضاً
وكنت مضبط وضعي مع مديري عشان الجامعة
والحمد لله
ايكيا الصراحة اتمنى ارجع له الان ، لكن بحكم ان مافيه ايكيا الان عندنا
نظام الصراحة فخم ، انواع البدلات
قدم عليهم وما جات علي
طبعاً الدوام مافيه جزئي ، فيه فتره صباحية وفتره مسائيه
فيه دوام من 8 الى4 و فيه من 4 الى 12
هذا غير الخصم الي يعطونك اياه عند شراء اي شي من منتجاتهم

[M H J O L]

ايضاً لا انسى ان جرير يطلبون موظفين سعودين
وبالنسبه للجزئي عندهم ، الظاهر تجيب لهم الجدول حق الجامعة تبك ويعطونك جزئي
والظاهر الراتب 1300 ، على حسب ما اذكر
وان قبلوك ونادوك ، الله يعينك على المقابله حقتهم ينرفزك نرفزه مو طبيعيه

[متصفح سعودي]

4 - 12 ! شي غير طبيعي

يعني مافي وقت مذاكرة ولا اي شي ثاني

والله مشكلة..

[ماجيك اعلان]

والله يالغالي
لازم تصبر وايش تسوي
رتب جدولك وشوف كيف ممكن تنسق
لاتقول صعب
جرب اول اسبوعين ولو حسيت ماتمشي الوظيفه معاك
قدم استقالتك
لاتقول من الان صعب
ممكن العمل يكون سهل وتقدر تاخذ بعض من الكتب وتذاكر
والله يوفقك

[سيڨيل]

السلام عليكم
الله يوفقك أخوي متصفح سعودي

لي وجهة نظر يمكن تفيدك
اجلس قليلاً لبعض الوقت وفكر في التكلفة الشهرية المتوقعة لك شهرياً أثناء فترة الدراسة, ومدة الدراسة بالفصل, وخلال العطل هل ستكون في الدمام أم ستعود لبيتك.

بعد حساب التكلفة (مع وضع نسبة أمان) احسب عدد الفصول المتوقعة إلى حين التخرج بمشيئة الله.
المبلغ لن يكون قليل ولكن لا أتوقع سيكون كبير إذا اقتصدت وضغطت على نفسك قليلاً (سيكون أفضل من ضغط الدوام الجزئي).

لنفترض أنك وجدت أن المبلغ الذي ستحتاجه 100 ألف ريال لتغطية مصاريف الدراسة + السكن والمعيشة.
في هذه الحالة يمكنك أخذ قرض سواء من الأهل أو عبر أحد من الأهل. وسيكون ذلك أفضل لتحصيلك الدراسي, بحيث أن همك الوحيد سيكون للدراسة, ووقت فراغك لن تضيعه في المحاسبة على كيشر. بل ستبذله في شي مفيد لك سواء يتعلق بدراستك أو بالترفيه عن نفسك أو على الأقل بأخذ قسط كافي من الراحة (وهو شي مهم لتجنب الإصابة بالإحباط أو اليأس).

100ألف ريال وأكثر يأخذها الكثيرون قروض سيارات بحثاً عن الفخامة والرزة المصطنعة إن صح التعبير. فإذا أخذتها لدراستك (مستقبلك) فلن يكون ذلك عبث.

عمل 8 ساعات بالإضافة لدوام الجامعة = انتحار وتدمير لتحصيلك الدراسي.
حتى لو 4 ساعات يمكنك الاستفادة منها في شي أفضل لك.

أرجو أن تفكر جيداً بهذا المقترح وإن شاء الله لن يكون المبلغ كبيراً.

[متصفح سعودي]

كلامك عين العقل اخوي سيڨيل

وشكلي بمشي على اقتراحك

الله يوفقك يارب