السلام عليكم و رحمة الله و بركاته،
أفا: لو مشرف: عدل الموضوع لـ قصتي مع محاولة لتحسين أداء مدونة (Litespeed، CloudFlare, memcached). موضوع طويل
مقدمة:
طيب، أغلبكم ما يعرفني. و اللي يعرفني يعرف اني اهوى السيرفرات و اللعب فيهم. صح الواحد يقدر يلعب بجهاز وهمي، لكن الأجهزة الوهمية مالها IP في الانترنت.
المهم، قررت قبل يومين فتح مدونة تقنية، لأنه نوعية المواضيع اللي أقراها بالانكليزي ما أشوفها مترجمة. فقلت أضرب عصافير بحجر.
1) أحسن مهارات الترجمة
2) يمكن تكون سبب إني ابدأ اقرا أكثر
3) أحسن مهارات الكتابة
4) التعلم على تعديل الووردبريس
و الحمد لله، المكسب مهو من الأهداف. لأنه الحمد لله الأمور متيسرة.
بداية الرحلة:
فـ قررت احط المدونة على أحد السيرفرات الوهمية اللي عندي.
عندي سيرفر وهمي من شركة 123systems.net (و هذا العرض اللي حطيته هنا http://www.swalif.net/softs/swalif65/softs307074/)
جهزت عليه Ubuntu 11 بنسخة 32 بت عشان ما تزيد المكتبات. و برضه لأنه الرام 1 جيجا، فـ 32بت و 64بت ما بيكون بينهم فرق ملحوظ. بالعكس، 64 يمكن يسيطر على رام أكثر.
بعد ما اتجهز السيرفر في خلال 10 دقائق. حملت عليه الأباتشي و php و mysql.
الاحباط:
بعد ما خلصت، نزلت الووردبريس العربية من موقعهم و شغلتها في دقائق.
لأنه المدونة فاضية، و مافيها إلا موضوع "أهلا بالعالم". شفت الموقع سريع و مناسب. لكن للأسف، حكمي الأولي كان في لحظة الخادم الرئيسي المستضيف لخادمي الوهمي فاضي.
بعد تقريبا ربع ساعة من الفرحة و إنه سرعة سيرفري الوهمي ممتازة. جاني احباط لأنه الخادم الوهمي صار بطئ بشكل غريب. قررت بس أدور على استضافة حقيقية. (استضافات bluehost و hostmonster اسميها استضافات مسخرة)
و هذه بعض من نتائج Firebug للمدونة على السيرفر الوهمي البطئ
يعني، 513 ميلي لصفحة فاضية. ما عرفت أقيمها. قلت أجرب مرة ثانية.
جربت و ....
اسوأ، صارت ثانية كاملة... قلت جرب مرة ثالثة، و جربت...
ما عرفت أحكم... فقلت أدور على استضافة مشتركة لها سمعة و ما تتبع overselling
البحث:
طحت على شركات، و هذه بعضها:
http://www.aspirationhosting.com/
http://www.medialayer.com/hosting/application-hosting.html
هذه الاستضافات المشتركة مالقيت أحد يشتكي منها أبدا. كلهم يقولوا الخدمة سريعة، و الشبكة ممتازة، و متعاونين، و يعطوا خبر إنهم بيقفلوا الاستضافات عشان تحديثات.
لكن لو تشوفوا الشركتين فوق. كاتبين عن تكنولوجيا ، يمكن بعضها جديدة عليكم.
اشياء جديدة:
لكن مثلا:
Kslice: خدمة بسيطة ،شهدتها وقت ما بدأت بس ما جربتها. تسمح بتحديث نواة اللينكس و استعمالها بدون أي ريبوت.
CloudLinux: سمعت عنه بس ما جربته.
Litespeed: هذا الشئ كان بالنسبالي غريب. فقررت البحث عنه.
اكتشفت إنه خيار آخر للأباتشي. يمتاز بسرعته في معالجة ملفات الـ PHP. و برضه أثبت سرعته في الملفات الثابتة static. و لأني ملقوف، قلت أجربه.
دخلت موقعهم و لقيت نسخة standard مجانية بس لها قيود. و محدودة القدرات. قلت أجربها و ما أتوقع استعملهاو يا ريتني ما قلت الكلمة هذه
من أول ما استعملتها، اكتشفت سرعتها، حتى في السيرفر الوهمي البطئ. و ما ياخذ رام. بس المشكلة إنه الـ Override اللي يسمحلك تعدل على الروابط بالـ htaccess ما يشتغل.
الفكرة الجهنمية:
خطرت في بالي فكرة، قلت أبغى أجرب نسخة مدفوعة. دخلت موقعهم و لقيت في نسخة مخصصة للسيرفرات الوهمية، و سعرها 14 دولار. طبعا السعر ما يشجع. و خاصة الأباتشي ببلاش.
قلت أجرب و مني خسران. دخلت على مواقع مخصصة بالسيرفرات الوهمية و يوفروا litespeed.
لقيت عند medialayer بس سعرهم غالي، 150 دولار على أرخص خطة.
وجدت مرادي
دورت و لقيت الشركة اللي من زمان و انا أتمنى أكون زبونهم، Knownhost. و برضه يوفروا الـ litespeed للسيرفرات الوهمية بـ 12 دولار. بس ناقص شئ دحين، ايش الخطة؟ اقل خطة 192 ميجا رام.
بصراحة ما حبيت أخاطر. دخلت السيرفر الوهمي البطئ و شفت استهلاك الموارد، تقريبا كان أكثر من 100 ميجا، بدون أي اتصال و بس شكل.
قلت أجرب الخطة الثانية، و بتكلف 35 دولار. بس لقيت كوبون في WHT يعطي تخفيض 75% لأول شهر. يعني نزل السعر لـ 9 دولار.
اتوكلت و أخذت شهر مع litespeed.
المفاجأة:
من زمان أستخدم خوادم وهمية، و كنت أواجه مشكلة بطء في سرعة استجابة الـ terminal. بس مع خادم knownhost، ما شاء الله أحسه جنبي
و برضه معتبر. جاني و الـ litespeed جاهز. طيب؟ قلت اسمي و أتوكل و أحمل الووردبريس
رحلة مليئة بالمعرفة:
لأني قاعد أجرب الـ litespeed لأول مرة، واجهتني مشاكل. و اضطريت اسوي compile للـ php أكثر من مرة. بس كل مرة أسوي فيها compile، كنت أشيل كم صح. و منهم (memcached، eAccelerator، و غيرها). الأشياء هذه اعرفها بس ما عمري اهتميت فيها.
و اللي عجبني في الـ litespeed إنه لوحة تحكمها عبارة عن موقع. مو زي الأباتشي و لوحات التحكم اللي لازم تدفع عليها مبلغ و قدره بس عشان "لوحة"
تركيب الووردبريس:
و ركبت الووردبريس و بصراحة شفت فرق واضح في سرعة التصفح. بس قلت، "أنا اخذته تجربة. أبغى اتهور.". اتذكر زمان قريت عن الـ caching في الووردبريس، حملت W3 Total Cache. بس للي جربها، يلاحظ إنه يقوله فين تبغى تحفظ الـ cached files. أحد الخيارات memcached و APC و eAccelerator و على الهارد ديسك
لحظة التعمّق:
قلت "لا لا يا رائد، شد حيلك". حاولت أحمل الـ eAccelerator في البداية لأنه ماله daemon زي الـ memcached و يشتغل بخفة. بس للاسف ما قدرت. أتوقعت بعدها memcached أسهل، بس طلع نفس الشئ. اكتشفت إنه فيه مشكلة في المسار الموجود في php.ini اللي يقول للـ php فين الاضافات موجودة. شغلتها و اشتغل الـ memcached معايا.
شئ يعلمك شئ ثاني:
من خلال لوحة تحكم الـ W3 Total Cache، لقيت خيار لـ Cloudflare. وجهي قلب. دخلت و قريت عنه و عجبني. اتوكلت و اشتركت في الخدمة المجانية. و أخذت تقريبا 6 ساعات عشان الـ DNS يتغير لهم.
لحظة الحقيقة:
هذه أول مرة:
النتائج أخذتها بعد ما اعتمدت السيرفر الوهمي. بس شوفوا تحميل الصفحة لحالها صار في 300 ميلي (أول وحدة), اختلاف جذري. الباقي أساسا حقت google analytics و twitter API. طيب نجرب مرة ثانية؟
في 91 ميلي. ما شاء الله. الـ cache اشتغل.
طيب مرة ثالثة؟
92 ميلي
الخلاصة:
* إذا الشئ متداول، مو معناته صح. جربوا شئ جديد و قيموا كل شئ قبل ما تقولوا "ابغى أستخدم هذا المنتج"
* لا تتوقع أداء الرخيص ينافس الغالي. الغالي سعره فيه.
* اقرا، اقرأ، اقرأ و اتعلم على أشياء جديدة، و لو كانت كتجربة. السيرفرات الوهمية الرخصية موجودة في كل مكان. (بعضها على 15 دولار في السنة مع ذاكرة 192 ميجا)
* المنتجات اللي تطلع كل يوم، تطلع لأنه لها هدف و زبائن. يمكن انت تكون من الزبائن
و هذه نبذه بسيطة عن الخدمات اللي استعملها حاليا:
* Litespeed: ينافس الاباتشي في سرعة معالجة ملفات php و التعامل معاه سهل. أخذ وعايا وقت لحد ما أتأقلم مع متطلباته، كومبايل للـ php مع مكتبات mysql. مشكلة الlitespeed يسوي كوبايل للـ php مع mysqli, بس الووردبريس تشتغل بس مع mysql.
* Cloudflare: يستخدوا شبكتهم الموزعة في كم منطقة في العالم عشان تحمي مواردك. و بنفس الوقت تحميك من كم نوع من الهجوم بحيث إنهم يوقفوه. و برضه يسووا cache خفيف و يمكن حتى لو موقعك طاح، يحاولوا يخدموا زوارك من نسخ محفوظة قديمة.
* memcached: هذه بس اللي جربتها، ما جربت eAccelerator و الـ APC. بس مستواها حلو و ميزتها إنها تقدر تكون موزعة على أكثر من خادم. و توفر caching سريع لكل شئ.
* خادم وهمي ممتاز من Knownhost <3
الخطوة الجية إن شاء الله أجرّب Percona MySQL و Hiphop php. لأنه في المدونة الجديدة ما أبغى أحط جافا سكريبت هدفها زينة
اخفيت الموقع على الخادم الوهمي الجديد لأنه لسه جديد و ما أبغى أسويله دعاية. و أرقام الـ Ip في الصور الأخيرة، هذه أرقام سحابة CloudFlare اللي توجه الترافيك للخادم الوهمي
و المقارنة بين مدونتين مالهم إلا موضوع واحد بس. الاختلاف في المنتجات المستخدمة و الخوادم الوهمية بس.
و لو فيه أي سؤال
رائد
رد مع اقتباس
المشاركة الأصلية كتبت بواسطة hussein.shy 
