السلام عليكم ورحمة الله وبركاته
زوار موقعك

اعرف ان هذا الموضوع دائماً محل تساؤل فى المنتديات والمواقع وسيستمر محل تساؤل لكل مبتدء فى هذا المجال لذا اردت ان اكتب هنا بعض الحلول التى تساعد فى حل هذه المشكلة واعلم ان الكثير منكم ربما يكون على علم بها ولكن دائماً مايجد صعوبة فى تطبيقها لذا دعونى أقول لكم كيف تطبقونها وازودكم ببعض الطرق التى ربما لم تعرفوها

بالصلاة على النبي كدة قبل مانبدأ اللى حيجبلي سيرة مواقع تبادل الزيارات
حقولوا
ارحمنى الله لايسيئك ومسمعكش تقول الكلمة ديه تانى ابدأ
(هذه الطريقة يلجىء لها المبتدئيين الذين ليست لديهم خبرة فى المجال ذي انا وانت كدة لما كنا لسة فى بداية الطريق وكنا نلجأ لها على إعتقاد انها ميزة حلوة إنك بيدخلك زوار بالمئات لا بل بالألوف والأمر سهل وذي الفل امال الناس ديه معقداها ليه )...بإختصار هذه الطريقة تعتبر بلاك هات والبلاك هات ده جوجل ومحركات البحث مش بتحبه بجانب إنها ملهاش 30 مليون لزمة لآن زوارها غير مستهدفيين بالمرة + إنها تجعل البونص ريت بتاع موقعك كبير جداً مما يؤثر على أرشفته فى محركات البحث يعنى من الأخر كدة سواد سواد ياعم الحج


طيب كفاية رغى وخلينا نشرح بعض المصطلحات الأول
زوار مستهدفيين = زوار مهتمة بمجال موقعك (هؤلاء يسمون عملائك)
ترافيك= إزدحام زوار

مش بيدخلك زوار وعاوز تجيب زوار لموقعك بطريقة شرعية وسهلة
او بيدخلك زوار وعاوز تزودهم !!
بسيطة ركز معايا يابرنس
اول حاجة لو مش بيدخلك زوار اساساً خلينا نشوف السبب ايه (إذا عرف السبب بطل العجب) صح كدة !.....تمام
موقعك غير منظم - كله داخل فى بعضه كدة
لايوجد محتوى حصرى فى موقعك ..سعدتك مقضيها كوبي وبست
موقعك ثقيل وبيفتح بالعافية
موقعك مش مؤرشف ومش عامله خريطة
موقعك غير موجود بمحركات البحث (جوجل-ياهو-بينج) باشا
معملتش باك لينكس ليك....حبيب قلبي
موقعك ذيه ذي باقى المواقع المنافسة ليك فى مجالك ومافيهوش أي إختلاف
لايوجد جديد من المقالات او المواضيع بموقعك منذ فترة
فى أسباب تانية أكيد بس ديه ابرز الأسباب
الحلول :- حل بقى يامعلم


بص ياسيدي شايف الحاجات اللى فوق ديه كلها أعمل عكسها يعنى ايه ؟
نظم موقعك- احصل على محتوى حصري لموقعك- شفلك قالب خفيف وخفف من فتح موقعك- ارشف موقعك -ضيف موقعك فى محركات البحث وابعتلهم خريطة- زود باك لينكس لموقعك- حاول تختلف عن منافسيك- دائما ضيف محتوى جديد لموقعك
لآ أفادك الله الحقيقة فى حاجات من اللى انت قلتها ديه انا عارفها وفاهمها وفى حاجات تانية ميح
اه تقصد الأرشفة وخرايط الموقع وكدة
ايون هى ديه

الأرشفة : هى جعل عناكب محركات البحث تقرأ محتوى موقعك وتؤرشفه بسرعة عشان يظهر فى محركات البحث

خريطة الموقع :هى خريطة تساعد محركات البحث على ارشفة أسرع

الباك لينك: عبارة عن انك انت مثلاً بتدخل على منتدى كبير او موقع معروف او مدونات مشهورة بيتكلموا عن نفس المجال بتاع موقعك وترد رد منطقى على موضوع معين هناك مثلاً وفى أخر الرد ممكن تضيف لينك لموقعك بأسلوب لايظهر كإنه سبام وبكدة انت بتستفاد من اللى يدخل يقرا التعليق بتاعك إنه لو ردك عجبه ممكن يدخلك موقعك ومش شرط ردود بس ايه المشكلة لما تكتب موضوع فى منتدى ذي مانا بعمل دلوقتى وتوقيعك فى المنتدى فيها ايه لو حطيت فيه رابط موقعك كل ده بيساعدك على الحصول على زوار وزيادة ترتيب موقعك وارشفته اسهل واسرع مابالك بقى لو عملت الكلام ده فى كذا منتدى او موقع شوف الزوار بقى ياحلو وادعيلي لو كل يوم 5 باك لينكس بس حتلاحظ فرق فى الزوار وكل ماتتعب أكتر كل ماتجيب أكتر و أكتر

الطريقة الثانية :
عارف جوجل وياهو ؟!...عندهم حاجة كدة إسمها إجابات جوجل وياهو ..بتبقى فى ناس مش بتعرف تعمل بحث اه اه متستغربش فعلاً فى ناس مش بتعرف تعمل بحث على الإنترنت او خلينا نقول ممكن تكون بتكسل الناس ديه بقى بتروح لجوجل والياهو ويحطوا أسئلة والناس تجاوبلهم عليها
هنا بقى يجي دورك فى الأسئلة الخاصة بمجالك كل ماتجاوب وتساعد الناس ديه أكثر بتاخد سمعة اكثر وحسابك بيبقى معروف وكل لما حد يدخل السؤال فى محرك البحث إجابة حضرتك تظهر فى أوائل النتايج مابالك بقى كدة انت جبت زوار قد ايه !!
بس بالنسبة للياهو فهو إجابات إنجليزية فقط فهو له إستخدامه مع المواقع التى محتواه إنجليزي
طيب ايه تانى ممكن اجيب بيه زوار

الطريقة الثالثة : اليوتيوب
ومش اليوتيوب بس أي موقع ذيه وفيه كتير جداً ذي فييمو وغيره وغيره بس اشهرهم هنا عندنا اليوتيوب .... اعمل فيديوهات خاصة بموقعك وبمجالك وارفعها عليه اليوتيوب بيدخله ملايين كل يوم لو فيديوهاتك حلوة ومفيدة كله حيعملها شير ولايك وحتجيب زوار ياما جداً
الطريقة الرابعة :
المواقع الإجتماعية(الفيس بوك- جوجل+- تويتر- انستجرام- لينكد إن،.....إلخ)
ركز على 2 او ثلاثة بالكتير من المواقع ديه واعمل فيهم صفحة وكبرها وهاتلها فانز المواقع ديه برضوا بيدخلها ملايين كل يوم يعنى مسألة التكبير ديه سهلة وحتجبلك زوار بالحبطرش كل يوم وخليك اكتيف فيها على طول مواضيع جديدة وافتح مواضيع واتناقش مع متابعينك
الطريقة الخامسة :
القائمة البريدية حط قائمة بريدية فى موقعك مش قادر أقولك بتفرق قد ايه لآن الناس اللى حيسيبه إميلهم مرة خلاص شكراً حيدخلولك كل مرة لإنهم مهتمين اول لما حتبعتلهم موضوع جديد حيبقوا عاوزيين يدخلوا يشيفوه

الطريقة السادسة : اعمل مسابقات فى موقعك
ياعم انا لاقى أكل
ياسيدي اسمع منى هو معنى انك تعمل مسابقى إنك حتدفع من جيبك انت مش حتيجي جمب جيبك خالص انت ممكن بمنتهى البساطة تعمل مسابقى اللى حيعمل شير للموضوع ده مثلا ويجيب أكثر عدد من الزوار حتديله مثلاً 20دولار او مجموعة كتب خاصة بمجالك مجانية وديه سهلة إنك تجيبها بس المقصود إن يبقى فى تحفيز ومش لازم كل مرة نفس المسابقة غير وكل مايدخلك زوار أكثر زود قيمة المسابقة مانت عارف إنها حتبقى مغطية تكاليفها ^^ ...بس ماتعملش الحركة ديه غير لما يدخلك 1000 زائر على الأقل
إحنا وصلنا لغاية الطريقة الكام
اه
الطريقة السابعة :
جينا بقى للمدفوع عاوز تنجز الكلام اللى انا قلتهولك ده كله ادفع يامعلم إعلاناتك بقى عند عمو ادوردز والفيس وحسوب وشوف انت وزوقك بقى اللى حيريحك اتعامل معاه بس من جهة الإنجاز هو إنجاز إنما من جهة الفلوس فهو ....... كدة يعنى
الطريقة الثامنة:
بنراتك ياكبير فى سواء مدونات بقى منتديات مواقع المهم يكون بيدخلها زوار ياما روح على المواقع اللى ذي موقعك واطلب منهم انك تأجر مساحة إعلانية وحط فيه بنر ليك يكون متصمم كويس وجذاب وشوف بقى الدنيا حتبقى ماشية معاك ذي السكينة فى الحلاوة إذاي

أكيد فيه طرق تانية كتير والطرق ديه كمان مش مشروحة بشكل تفصيلي انا عارف بس عشان انا حسيت إن رغيت كتير قوى ومش عاوز أتقل عليكم بس أي مساعدة إحنا فى الخدمة وحتلاقى كمان هنا

أي حاجة خاصة بعالم الربح من الإنترنتإن شاء الله

لو الموضوع مش فى قسمه الصحيح ارجوا نقله لقسمه وشكراً