السلام عليكم ورحمه الله وبركاته
كلن له قصته ومشواره في هذي الحياة وشقا وتعب فمنا من جمع الدراسه والعمل في وقت واحد ومنا من ترك هذا لاجل هذا وساسرد لكم قصتي من اول عمل اشتغلت فيه ( فصيح خخخ ).. طبعاً اول شغله بحياتي بعد الشهاده الثانويه كانت موظف بمحل مبيعات مواد غذائيه فقط كرسي جنب المحل وجالس فيه طول الوقت عشان لو جات البلديه يعرفون ان صاحب المحل مطبق السعوده خخخخخ كنت اخذ بالجلسه بالشهر ١٥٠٠ ريال ووقتها كان عمري ٢٠ وكانت ممله وتركتها ورحت دبرت لي واسطه واشتغلت بكباين تليفون وكنت اخذ ٢٠٠٠ ريال وجلست فيها تقريبا سنتين وكانت ممتعه بالفعل لاسباب خاصه لول وبعدها عزلت الشركه وقالوا يالله كل واحد يضف وجهه وخذوا حقوقكم وتوكلوا.. بعدها بسنتين اشتغلت بسوق الخضار البس باكستاني وابيع خضار وكنت اكسب منها خير كثير لولا الاحزاب او الاصح العصابات اللي كانت بسوق الخضره ونكدوا علي وحاربوني لين ما زهقت وتركت لهم الجمل بما حمل. وجلست كم شهر بدون عمل وجتني نفسيه واكتئاب حاد وكنت اتضارب مع الذبان وبعدها جا الفرج من رب العالمين وتوظفت بمستشفى براتب ٣٠٠٠ الاف ريال واقعد فيها لحد ما جا مرسوم بترسيم كل اللي ع البنود لمراتب وترسمت ع المرتبه الرابعه وكنت اخذ ٤٩٠٠ ريال تقريبا على ما اذكر واتزوج والراتب ما يكفي طبعا بعد الزواج والاولاد واكمل تعليمي واعيش انا والحرمه بكساد كم سنه واخذ دبلوم فني صحي وبعد كم سنه يجيني رقم فني على الكادر الصحي ويقفز راتبي من ٥٠٠٠ وشوي الى ٨٩٠٠ ريال والحمد لله بعد ما شفت الاولاد جاني الخير من كل جهه والآن الحمد لله راتبي ١٣ الف ريال بعد حصولي على اخصائي واعيش حياه كريمه ما كنت احلم فيها وانا صغير.. اعتبروها فضفضه اعتبروها فش خلق اعتبروها اول مساهمه من ضيف جديد
رد مع اقتباس
