ابحث عن مستضيف asp+php

[همّام]

السلام عليكم ورحمة الله وبركاته

يا اخوان انا ابحث عن مستضيف يكون السيرفير يدعم البي اتش بي والاسب

اذكر قبل فتره من الزمن انني قرأت عن مستضيف اماراتي اعتقد ان اسم الشركه الديوان (( ارجوا ان الذاكره ما خانتني))

فهل اجد من يعرف احد مزودي الاستضافه لديه ذلك

[ArabS-MiX]

تحصل هنا www.taibahost.net

واذا تبي اكثر انا حاضر

[alotaiby]

السلام عليكم

اخوي انا اقدر اوفر لك استضافه زي ماقلت ..

ومستعد اعطيك الاستضافه تجربها وعقبها ب يومين كحد اقصى تدفع لي

هذا الايميل للمفاهمه

al_otaiby14@hotmail.com

[code4arab]

رد مقتبس من alotaiby
سلم لي على اللي ثاني مره بيتعامل مع شركات عربيه وهميه (( مستضيف .. كويت تن .. رواد .. سعودي فور هوست .. الاستضافه الملكيه .. رونا .. ابو فهد .. عالم الاستضافه ..عرب هوست .. عرب فور هوست ..مواقعكم .. امارات هوست .. بحرين تن .. شامل نت ..((والشله الباقين))

انا ادري اللحين بيجي من احد من اصحاب القعول الفارغه بيقول انا مضمون وانا عندي زباين وانا وانا .. ويقعد يهايط علينا ويبلشنا اولهم اخونا السوري (( احتفظ بالباقي))
وثانيهم واحد يتسمى بانه سعودي وهو اساسا ماله اي صله بالسعوديه مجرد وكيل ووكيل مثل قلته ..
والثالي بيقول لنا مكتب بالديره الفلانيه واذا قلت له بجيكم قال جالسين نغير بالديكور

واللي يقول لك ..

انت من اهل الرياض ..
تقول انت ايه
عاد يقول يا خساره تمنيت تزونا بمكتبنا اللي بالمدينه الفلانيه ..
تقول له انا دايم اطلع لذيك الديره وين مكانكم يقولك اذا جيت دق علي
واذا قلت عطني رقمك يقول اذا عزمت يصير خير

يا عرب استحوى على وجيهكم هذي امانه مهوب اي واحد يفتح له حساب ريسلر ويجلس يبلع من هالقروش ثم اذا شبع قام وطفى السيرفرات وقال (( باللعنه تلعن السيرفرات من ناضر يمها ))

وبعد كذا يقولون حنا وحنا عندنا مميزات ..
والله العظيم استضيف عند يهود ولا استضيف عند ناس بالشكل هذا ناس حقين ادعاءات واباطيل مالها صحه اللي يقول انا رسمي ومصرح لي ..
طيب انت رسمي ورنا صوره من السجل التجاري ..

بعدين انا بنصحكم نصيحه وامري لله ..

اللي بيهمه السعر حق الاستضافه اقسم بالله انه اكبر مخفه على وجه الارض .

يا حليكم يا الالياف والله قمه بالتعامل وفوق عن كذا تحس انك متطمن لما تستضيف عندهم لانهم عارفين شغلهم وماسكينه زين لو يموت واحد تلاقي كثره اربع مرات يخدمونك

اما الشركات الثانيه .. عفوا اقصد اللي تتدعي انها شركات وهي اساسا مجرد فرد واحد احذ سيرفر ويقطع ويبيع .. هذا بنقرى عليها السلام ..

والمشكله الاكبر انك لما تطلب عنوان شركه اجنبيه للاستضافه يقولون تعال عندنا حنا خدماتنا توب ومدري وش وهم قسم من جنبها ما عندك احد اذا خسر طفى كل شئ وقال السلام عليكم
ويقولون ليش انتم كذا ما تحبون العرب ومدري ايش وتفيدون اليهود والكلام هذا وهم اساسا اول من بيفيد اليهود لاني اتحدى اي شركه وهميه تكون السيرفرات ملك لها بغض النظر عن خليفه لاني اتوقع انه جاد بعمله لاكن ينقصه المصداقيه اكثر من ناحيه يكون له مكاتب وزي كذا ..

اذا كان اللي يستضيف موقعه عند واحد عربي اول تقريبا ثلاث اشهر تلاقي السيرفر زي الحلاوه مافيه احسن منه .. لاكن اصبر عليه شوي وشف وش بيصير !!
انواع الاعطال انواع المشاكل انواع المصايب
واقربها طويل العمر ابو احمد الله يذكره بالخير فاتح شركه وهو نايم ولا يندرى لو بيصير بن قبوس ثاني بعد كل شئ جايز بالزمن هذا ..
اما اللي يقولون انه كريم واخلاق ومدري ايش ..
بقول ::
انت تعرفه شخصيا .. قابلته ..
بتقول لي اسلوبه
بقولك انثبر طس وراك الماسنجر ما عمره حدد شخصيه احد هذا مجرم ولا هذا مطوع (( اسف يالمطاوعه باني وضعتكم كمثال للتشبيه مع انكم اكبر من اني اشبهكم بمثال زي كذا ))
(( الله يعينه اذا كان في ضروف ويجزاه خير ويخفف عنه البلاء .. والله لا ... اذا كان ناوي يفركش ))

خلوني اقول مثلا بضرب مثال عن نفسي اولا ..
انا بالمسانجر اقدر ما تكلم الا الله يهديك والله يسعدك والله يرزقك . انت بتتصور اني ملتزم وانا اساسا العكس ..
واقدر كذلك ما اتكلم الا بالمنكرات والكلام هذا وتتوقع اني زااااااحف وانا العكس !!

يعني الانترنت ما عمره حدد شخصيه احد ..

والمشكله الاكبر ان بعض الشركات .. اتاسف ثاني مره واصحح العباره واقول (( الافراد اللي عندهم ريسلر او سيرفرات مستاجره )) تلاقيه يكلمك براس خشمه ويقعد ينفخ كانك تشحد منه استضافه واذا قلت له عندي الشئ الفلاني قال ما لي دخل ومدري وش هو وهرج فاضي كانه متبرع لي باستضافه او اني اشحده باستضافه .. وتلاقيه قبل لا تستضيف عنده .. ياااازين الاخلاق ويازين الالفاظ ..
بس ربي يستر من بعد ما تعطيه قروشك وش بيسوي فيك ..؟

بتقولون وش بيسوي ..
انا بذكر قصتي مع شخص والله المستعان وهذا الشخض يشارك بالمنتدى وعنده سيرفرات والوكاد انه اخذها من فاست سيرفر .. (( اللي بيقول تقصدني انا بقول له .. اللي في بطنه ريح ما يستريح !!))
انا اخذت عنده مساحه صغيره بالدومين وبعدها بفتره قررت اني اطلع من باب التغير مع العلم اني مستضيف عنده سنه كامله وواصله حقها كاش .. قلت عطني معلومات لوحة تحكم الدومين قال ما نعطي لوحات تحكم .. قلت طيب حول لي الدي انس على هذا الدي انس .. وعطيته اياه
وجلست فتره ورجعت الا ماصار شئ .. يا ولد وين الدي انس .. يقول ياخي فيه مشكله بيننا وبين شركه التسجيل (( قوددادي )) وارسلنا مندوبين لهم (( وهو حده السعوديه وتخب عليه ))
عقب شهر .. قلت له الدومين حلال عليك .. تقولون وش كان الموقع بقولكم .. انا من عادتي اني ما تطلع شركه جديده الا اشترك معها واشوف خدماتها وكل شوي ناقل والموقع اساسا ما فيه الا كم من ملف وكم من برنامج والمفضله حقتي مضغوطه في ملف (( zip ))

لو بتكلم والله لين الصبح ماني بمخلص ..

زبده الكلام او خلاصه القول او بمقوله (( زبدة الهرج ))

طبعا لا حد يتوقع اني بكلامي هذا اتهم كل المستضيفين العرب بانهم فاشلين وهمهم الفلوس وبس ..!

كل كلامي قصدت منه فقط التذكير بشئ مهم جدا الا وهو ..

يجب على كل صاحب سيرفر او ريسلر ان يكون فريق للعمل مكون من اقل شئ شخصين وكل الطرفين عندهم المعلومات نفسها وعندهم الخبره نفسها ..
بحيث لا قدر الله لو حصل لشخص ما مكروه ... يكون الثاني مكانه (( الاعمار بيد الله ولا اعتراض على قدر الله ))
لاكن من باب (( اعقلها وتوكل ))
واللي بيقول اني اقلد المرور اقوله غلطان اخي الكريم ..
هذا حديث ورد عن الرسول عليه الصلاه والسلام (( توقف اذا كنت رافضي فلا تصلي على النبي عليه الصلاه والسلام لانه ارفع بان يصلي عليه رافضي عليك من الله ما تستحق ))

ساكتفي بذكر معني الحديث .. ({ اتى الى النبي رجلا يسوق ناقته او بعيره وخاف عليه ان يضيع فسال الرسول عليه السلام وقال له { اعقلها وتوكل })

اعلم ان لهجتي كانت حاده .. واعلم ايضا انني ربما جنيت على نفسي من الاثام ما جنيت .. واعلم ايضا انني ربما اتيت بشئ ممنوع ذكره بالمنتدى .. واعلم ايضا ان ردي ربما يتعرض لبعض التعديل من قبل مشرفنا الكريم ..

لاكن ارجوا من المشرف الكريم ان يبقي ردي كما هو حتى وان كان خارجا عن النظام ..
لان كل من ركز في كلامته وابدع في تفسير مفرداته لعلم من قولي مالم يعلمه من يقرا بسرعه البرق

على العموم ..

يبقى هناك اشخاص صنعوا الابداع بانفسهم وكونوا لهم سمعه طيبه بين المجتمع (( مجتمع استضافه المواقع ))

وهم كثير والله واكتفى بذكر شخص

حاتـــم الغامدي ... صاحب شبكة مواقعكم سابقا والذي بالفعل كان محقا بان يسمي نفسه شبكة وليس شركه ولم يتلفظ طوال فتره تواجده في عالم الاستضافه بانه شركه او ان لديه مكتب انما كان يقول .. اذا ربي افرجها ان شاء بحط مكتب ..! كان صريح لابعد الحدود

فعلا رجل في قمه الاخلاق .. يتحلى بصفات حميده

جزاه الله عن الجميع كل خير واثاب الجميع من اصحاب شبكات الاستضافه وفتح الله عليهم باب رزق لا يغلق ابدا الا وهو باب طاعه الله تعالى بالمعروف والانتهاء عن ما نهى عنه وزجر
وان يوفق الجميع لما يحب ويرضى وان يهدي ضالة المسلمين وان يوحد صفوفهم وان يجمع كلمتهم
وان ينصر المسلمين في كل بقاع الارض ..
انه هو القادر على ذلك وهو السميع العلم ..

وا ستبيحكم عذرا اخوتي الكرام
وارجوا ان لا يحمل على احدا ذره من حقد

وصلى الله على محمد وعلى اله وصحبة اجمعين

سبحان الله العظيم اشوفك انضميت للشلة

[alil998]

بصراحه في الصميم

[jassim33]

عتيبي اذا بتوفر للرجال على الاقل شيل توقيعك

اريد سيرفر باسرع وقت

وبعدين اذا بتقولى مجرد عمولة عط الرجال الموقع يعرف يتفاهم مباشرة مع المواقع

تحياتي للجميع

[alotaiby]

اخوي code4arab

سبق وذكرت اني ماعندي سيرفر ..

الشي الثاني ..
اخوي jassim33 مب شرط يعني يكون عندي توقيع بالشكل هذا ولا يكون عندي سيرفر ..

يمكن عندي ميه وابي ميه وواحد (( لاحد يصدق اني عندي سيرفرات ))

الشركه امريكيه وانا لازم استفيد لان سعرهم رخيص