إلى من يهمها أمري ... حبيبتي

المقالة هذي كتبتها من كم شهر وكانت بسبب اني اعرف لي شخص رمى أمه في دار العجزة في وقت هي امسّ الحاجه له لابارك الله فيه ….. واللي جدّ انه من يومين رفض دعوة من دار العجزة يبلغونه إن أمه تعبانه كثير وتحتاج انه يكون جنبها ويردها . لكن اسود الوجه رفض . المهم انا كتبت رساله باسمه لأمه من هنا والرسالة يقول فيها : إلي أمي الحبيبة تحيه طيبه وبعد اليك ابعث برسالتي هذه وانا على علم بأني لن اوفيك حقك ولكن مهما عملنا أو تعبنا في حقك فهو ناقص أمي الحبيبة تعلمين لماذا أنا مقصر في حقك لان انا هيسن أربد يمه !!(( صدقت ))مانيب كفو تضحيتك وصبرك علي عطيتيني وانتي في رجا اني اصير رجال واكون لك سند يوم تضيق بك الدنيا طلعت مااسوى نعالك الله يعز نعالك ويكرمه مني ، أمي وربي أنا سربوت !! مانيب كفو الحليب الي رضعتيني اياه والله يمه مانيب كفو أدنى شي في هالدنيا عندك يمه …..يمه أنا قليل أدب مع انك ربيتيني احسن تربيه أمي انا كل الزين عندك يوم اكون اشين خلق الله عند الناس تعبتي علي وضحيتي وسهرتي الليل بطوله في رجا راحتي وقمتي الصبح من أوله في رجا خدمتي وزوجتيني وساعدتيني على الزواج بيّعتك ماوراكي ومادونك عشان توفرين لي المهر وترحميني من الدين والسلف وقطت الوجه لكن طلعت قليل خاتمه فضلت الزوجه عليك وجالسن انا ووجهي اتميلح عندها وتاركك بالاسابيع مااسئل عنك ، يوم تقول الزوجه أبغى كذا قلت لبيه ويوم تقولين ابغى كذا قلت وش قلتي يمه مااسمع .. جعلني الصقه !!(( آمين)) …..امي يا من هلت دموعها يوم مرضت يامن اسهرت جفونها يوم تعبت .يامن اشغلتها ثلاثين عام وماذكرتها فيها ولا عام يامن ضاقت يوم ضاقت بي الوسيعه .ويوم ضقتي مالقيتي اخفيتي ضيقتك وانتي في رجا الرحمن يفكها من ضيقها .امي تجي الايام وتروح مانذكر فضلك بشي ويوم تزعلين تطوف ايام مانرضيك وكن حنا نقول في خاطرنا هذي امنا وماردها بترضى. ويوم تزعل الحرمه تربح محلات الذهب لابارك الله فيني !!((آمين)) …..امي .حلاوة الروح تنبعث منك يوم انا اكون في نشوة، وتعاست الروح تنبعث مني يوم الحرمة تصير في زعل ،، امي لو تهل دمعه من عيوني تهل دموع من عيونك في رجا تلحق دموع عيني لكن من قباحتي اني قبيح معك اجمل ماكون مع زوجتي ((نذل !!)) .مع ان زوجتي ماطلبت مني اكون بهالنذاله ، وعند الحرمه ان العاقل خصيم نفسه طيب وين العقل وانا اسوي بك كذا تدرين ليش يمه لاني قليل أصل يمه لو اني اصيل ماسوي كذا .. يمه اخاف اوصف نفسي بالحقير واظلم الحقرا ، واقول انا حقير لأن الحقير حقير مع الناس رحيم مع امه انا مدري وش اسمّي عمري … يمه ادري لو بجيك واقول سامحيني بتسامحيني ..لكن السئوال يمه انا استاهل رضاك ؟؟ .ادري في حشاشة جوفك تقولين لو ما يشيل القلب تشيلك اجفوني وغطاها ملحفك يا نور عيني يالي لو جاك المرض قلت يا ليت فيني .لكن انا يمه ..ظنك بصير رجال أقوم .بجزء من مليون جز من فضلك … يمه هذا سؤال مايجاوب عليه غير رجال ثمر فيه تربيتك ويرده اصله الطيب اللي للأسف ماهوب فيني يمه ((صدقت )) … يمه ادري انك جنتي وناري وادري ان رضاك من رضى ربي وغضبك يغضب الرحمن لكن مع هذا انا قبيح متبجح متجبر ومستقوي ولا كني بيجي يوم بقابل رب كريم بيحاسبني على مثقال ذره فما بالك ..بانتهاك .حرمته …امي راحتك دقايق وعذابك معي اشهور يوم ترتاحين تكوني في هم يوم.. ويوم اضيق تركبك اهموم الدنيا كلها .ادري يمه اني لو اجحدك العمر كله وأجي على فراش الموت واقول سامحيني يمه بتقولين: عمري مازعلت منك يا سليل الروح عمري مازعلت منك يا ولد بطني عمري مازعلت منك عشان اسامحك …… امي مدري يمديني الحق عمري وارجع لحضنك الصادق الدافي ولا الدنيا بتاخذ معي دورها في نكران جميلك وجحودك …. أمي ..تكفين ادري انك كف الدعاء لي قاعده قايمه لا كليتي ولا مليتي لكن ادعي لي بحسن الخاتمه اللي ماهيب باينه !! … من عصياني لان من حبه ربي وفقه في خاتمته وكيف بيحبني وانا مغضبه ..امي انا برجا الله وثم في رجاك تسامحين ولو انه ماعندي شك لكن ادعي الله انه يردني لك قبل فوت الاوان لانه كنوز الدنيا ماتعوضني عن لحظه اكون ابها بعيد عن رضاك .امي وربي لو اجلس اذكر فضلك بينشف ريقي وتذبل اجفوني وبينخسف وجهي وانا للحين ماذكرت طفولتي وتعذيبك ابها بس يمه سامحيني تكفين قبل ماصير في قبر لاانيس ولا ونيس غير عملي الصالح والي اهو ماراح يحصل وانتي غاضبه علي امي فدوتك الزوجه والاولاد والمال والحال وربي ماوفيك لو قطعت لحم اولادي قدامك لك طعام .لكن وش اقول غير اني قليل اصل ماثمر فيني حليبك قطره من حليبك في الحقيقه هي الحياة هي العطا هي كل شي والله سبحانه جعل حليبك في صدرك وهو نفسه الي تضميني فيه يوم تضيق الصدور ......... اللهم اني اسئلك بكل اسم هو لك سميت به نفسك او علمته أحدا من خلقك ان تغفر لنا زلاتنا وان ترحمنا برحمتك .اللهم من طغى بوالديه فرده ردا جميلا او خذه اخذ عزيز مقتدر..اللهم من اراد في والديه خير فبارك له واوسع له في وماله واولاده ابسط له الدنيا وارحمه في الاخره اللهم ومن طغى بهم فرحمهم برحمتك .واره من عجائب قدرتك ماتحول به بينه وبين عقوقه اللهم ،، اني اسألك الفضل كله واعوذ بك من العقوق حتى قليله واسألك حسن البر متبوعه بحسن خاتمه ،، واعوذ بك من عقوق متبوعه بسوء عاقبه ..اللهم انك رحيم بعبادك فرحمنا برحمتك تحول بها دون عقابك .هذا وصلى الله عليه وسلم وعلى اله وصحبه اجمع .
--------------------------------
موضوع كاتبه محرر في فواصل الا ماخانتي الذاكره فهو الشحيتان
لأن العنوان تكرر قلت أحط لكم هنا موضوع ثاني

[b]<small><small>[ تم تعديل الموضوع بواسطة &nbsp; صميدع &nbsp; يوم &nbsp; 25-05-2000]