ظاهرة غريبة ؟ غلا حلا دلع + بوب اب = موقع ناجح !!

[Net Hunter]

السلام عليكم

بصراحة انا ماني محضر موضوع بشكل كامل او شي من هالقبيل
انا فقط لفت انتباهي شي غريب جدا حالياً يحدث في المواقع العربية ..
وخاصة المواقع المعروضة في ادلة المواقع "ام صفحة " و سباقات المواقع المعروفه و مواقع الاغاني ..

صار شي اعتيادي انك تدخل موقع من مواقع سباقات المواقع العربيه ويطلع لك بوب اب "المسنجر " وبوب اب بعد اغلاق الصفحة
وبوب اب لو انتقلت من صفحة و كود اضف للمفضلة و و و و و الخ !!

الملاحظ ان المواقع الي تفتح في البوب اب غالباً صارت نسخ كربونية حتى في الاسماء
غلا
حلا
دلع
لولو
فوفو
كوكو
وغيرها من الاسامي الي ماعندهم سالفه فيها

وفوق هذا المحتوى ..
ديجي شات + شات صوتي + اذاعات اف ام + حركات مسنجر + منتدى طبعا


كلها بصوب و المنتدى بصوب عدد الاعضاء 5000 و المواضيع 100 موضوع

ولاحظت شي >> مكثر ملاحظاتك اليوم :funny:
ان كل ما تسكر موقع يفتح لك موقع بوب اب على واحد من ربعه نفس الشي ولو سكرت الثاني رجعك للاول كأنك في دوامه ممله جدا و بايخه لاقصى الحدود ..
وللأسف .. في المراكز الاولى لسباقات المواقع ! رغم انها مواقع مهجوره ..
فهل المبالغ الماديه ال تدفع للاعلان في بعض السباقات صارت تسمح بان هالمواقع تتبوء << ركز على تتبوء .. مراكز متقدمه وهي ما تستحق انها اتكون على الانترنت حتى ؟؟
او اني بعض مصممين التمبلتات الجاهزه بدئوا فعلا ينصبون على سذج الانترنت الي في نظرهم الانترنت شات و منتدى !!
لان فعلا انا احتكيت ببعضهم وكان بودهم الاعلان في احد مواقعي وسألتهم .. بصراحة يدفعون دم قلبهم و الموقع ماله لزمه ف الاساس

فايش رايكم بالي قاعد يصير ؟؟؟ مواقع كربونية 100%
حتى التصاميم تمبلتات جاهزه نسخة طبق الاصل اللهم البانر و اللون المختلف !!


طبعاً ,, ما يفوتني التنبيه لنقطه ان هناك من الادله و السباقات للمواقع العربيه الي تنحط على الراس ولا بحاجه لمن يزكيها مني او من غيري ولها مجالها الطويل و نزاهتها سواء بالاعلان او بالسباق نفسه .. لكن البعض الاخر ؟؟؟؟


تحياتي للجميع

[eltawoos.com]

ظاهرة غريبة ؟ غلا حلا دلع + بوب اب = موقع ناجح = عذاب فى الدنيا و ربما قلة الرزق و ضيق الصدر = عذاب فى الأخرة

[Smart Solutions]

أخي الغالي Net Hunter

بالفعل ما نراه شئ غريب ... لا ادري هل كانت بدايات الغرب في عالم الإنترنت هكذا ثم ارتقت اهتماماتهم و مواقعهم ام ماذا ؟؟؟

اقابل في عملي كمسؤول عن مؤسسة تصميم مواقع عينات كثيرة من هذه النوعية ...

على سبيل المثال ...

يأتيني احدهم و يقول لي العبارة التالية ::

" أبغى اصمم موقع فيه كل شئ " !!!

اقول له : " طيب يا الغالي كل شئ مثل ايش حدد ؟؟ "

يقول : " ما ادري انا ابغى كل شئ تحطونه لي ؟؟ "

اقول له : " المشكلة انه ما فيه شئ بالإنترنت اسمه كل شئ ، انت قل لي بتصمم موقع عن ايش و انا اصممه لك بإذن الله "

يقول : " ما اعرف ابي كل شئ ممكن يكون في الإنترنت تحطونه بموقعه " !!

طبعا بعد هالكلام قلت لازم افهمه انه فيه اشياء مو فاهمها في الإنترنت ويحسب الإنترنت (حسب ظني) :: منتدى + تشات + بطاقات + مجلة

قلت له :: " طيب كل شئ ، تبي مثلا نسوي لك متجر الكتروني ، او تبي مثلا نركب لك نظام ادارة محتوى !!! "

طبعا هو بهالحاله انصعق و تنح ( وهذا الي ابيه )

قال لي : " لا لا ما ادري وشو هذا بس انا ما ابي كذا "

قلت لنفسي دامك عارف وش يبغى اخلص عليه وقل له

قلت له :: " انت تبغى منتدى و بطاقات و تشات و مجلة .. صح ؟ "

قال :: " ايوووووووووووه و يا ليت سباق مواقع بعد ، شف لي كم تكلف وعطني السعر "

( حشا داخل بقاله على هالجملة )

طبعا كان يبي تشات بـ 600 يوزر و منتدى عجيب غريب ( الظاهر ابرجع ابرمج الـ VB على ذيك الطلبات )

قلت له بالأخير : " الموقع يكلفك 12 الف "

ما نطق غير بـ " طيب شكرا "


هذي بس عينه بسيطة من الناس الي نقابلهم .. كثييييييييير غيره و اغرب منه بالطلبات

مثل واحد طلب مني موقع ما يطلع منه الزائر ؟؟ يقول ابي الزائر ما يحتاج شئ اذا دخل موقعي كل شئ بالإنترنت يلقاه بموقعي ، حتى لو ضغط على ارتباط لموقع ثاني يفتح له في اطار جوا موقعي لا يطلع الزائر ابدا ( وش ذا التحجير )

المشكلة ان هذا الأخير صاحب موقع معروف جدا جدا جدا ... وصار له شهور و شهور في قائمة افضل المواقع حسب احصائيات مدينة الملك عبدالعزيز


يعني الحال من سيئ الى اسوء ... الله يعين بس

[Jobran]

والله انا معاك يا نت هنتر في كلامك

انا اتمنى ادخل داخل مخ واحد منهم اشوف اش راسم عليه قدام

بس ما دخلت

لانه باين من الموقع ان خطته مو انه يقدم شي جديد يفيد الناس

او حتى ولو فكره مستهلكه بس منها فايده

وباين من الفلوس اللي عنده استعداد يدفعها ان هدفه من الموقع مو مادي واعلانات وشغل

لذلك بدون تفكير زياده.....الهدف هو الفخفخه
ويحب يكون مدير وفي ناس تحت سلطته

مدير منتدى او سوبر فايزر في الشات :funny:


هذا الهدف

واهداف اخرى على طاري البوب اب

بوب اب حق كود المسنجر طالع لي وفيه صورة متحركه لبنت تخلع قميصها !!!!!

وتتحرك الصوره وتنعاد وعباره تنور وتنطفي
تعال ياقلبي تعال سولف ويانا في دردشه ......!!

اييي سولف ياحمزه :anger2:

بعد هذي هانت مصيبة اصحاب مواقع الأغاني احس اصرف خخخخ

تحياتي لك نت هنتر

واسف على الاطاله

[eltawoos.com]

و يبقى سؤال : كيف نحل هذة المشكلة ؟؟

[it.7]

Net Hunter .. سلمت يمينك يالغالي ;

و بخصوص المواقع اللي تتكلّم عنهاا فوالله راح يتعب الواحد لو قعد يكتب عنهم :anger1:

اأنا أتكلم عن جميع أدلّة المواقع إلا ما رحم رّبي ..

فأصبحت الأدلة إجبارياً لازم تحتوي على

1- إعلان الماسنجر .. ولا تنسّى العبارات المضيئة في المنتصف

2- البوب آب اللي في الزوايا ; و أكيد كم صورة لكم بنت و عبارات " ملتقى البنات .. تعال دردش و شغّل السماعات في جهازك :eek2: "

3- المواقع اللي تكون إعلانتها نشيطة .. كل ما كانت الزيارات و الترشيحات أكثر كل ما كاان الإعلان أقذر و أوسخ :anger1: و الله المستعان

4- اأكيد عنوان الموقع " دليل مفضّلة العرب "

5- عشرين ألف مليون مدخل للدردشة .. و لو كان عندّك أطلق إتصاال راح تجلس الصفحة معااك على الأقل خمس دقاائق :looking:

6- لمّا تسكر الصفحة تطلع لك وحدة ثانية .. تسكّرها ترجعك لنفس الصفحة اللي سكرّتها في البداية :deal: في النهاية تطّفي النت و تمشي


و فوق كل هذا و هذا أخي الكريم .. تجد دائماً أيقونة إستمع إلى الأغااني و إختر الإذاعة

و أسفلهاا على طول .. إستمع إلى القرآن بصوت القارئ " ........ "

و بالنسبة لطول الصفحة .. تجدّهاا ممتدة إلى غير نهاية دائماً :funny:


; لن أتكّلم أكثر يالغالي .. عشاان ما يرتفع الضغط بس

و هذي كانت مداخلة بسيطة منّي :shy:
و جزّاك الله ألف خير على موضوعك !!

[isader.com]

السلام عليكم و رحمة الله و بركاته...

بصراحه المشكله أكبر من ما كثير من الناس يتوقعونها، باختصار لإن أمثال هذه المواقع أعدادها يتجاوز الالاف...

بالنسبه للحل فعندي فكرة سأقوم بطرحها بموضوع خاص ان شاء الله، و سيكون بإمكان جميع الأعضاء إبداء رأيهم فيها....

و شكراً لكم..
عماد الصدر

[MoTaZ]

لا و قلة الحيا لما تطلع لك

( تعال ياعمري ) , ( تعال ياقلبي ) وجنبك اهلك !!

قمة الاحراج بكل صراحه


و قمت التخلف من البعض وقمت الوقاحه منهم


هكذا يجلبون زوارهم بالطريقه السافله المتنديه


سبحان الله

اعتذر عن الاطاله في الرد لحين وجود الوقت الكافي للرد و وضع بعض الحلو لعمل موقع لما قد يحصل وحصل .. !


تحياتي

[random_X]

فعلاً أمر مخزي ...

لكن أمثال هذه الفقاعات الصابونية لا يطول بها العمر ...

لا يؤلمني الا الأشخاص الذي سمحوا لقدراتهم ( و لو اني واثق من انه الناس الي تؤسس مثل هذه المواقع لا قدرات لها اصلاً ) ، ترضى أن يكون نتاجها يذهب لمثل هذه المستويات المنحطة !!


اللهم إرحمنا برحمتك ...


السلااام عليكم

[Net Hunter]

يعطيكم العافيه جميعاً يا اخوان ..
Smart Solutions
اخوي والله هذي المشكله هذي النوعيه
الي تجيك فجأه اتقول ابي اسوي موقع فيه كل شي .. وهم تعريفهم لكل شي انه فيه منتدى + شات هو سوبر احمر فيه يعني ملك الدنيا الاخ
Jobran
خخخ و الله صادق حب التسلط في بعضهم .. بس وين سالفة ام قميص ما قد شفتها .. عطني العنوان برايفت خخخ امزح معاك لا تسويها صج ترى احذف نفسي من على الكرسي


الأولى
والله ابدعت بالوصف لدرجة اني بديت اشك انك عندك موقع من اياهم خخخخخ امزح معاك يالغالي ومعاك حق والله الماوقع صارت نسخ من بعضها .. بس نسيت منهم شي هابيين فيه هالايام .. تعال ثقف نفسك جنسيا قبل الزواج ومادري ايش .. ياخي ناس فاصخه الحيا


isader.com

في انتظار موضوعك و حلك يالغالي

MoTaZ
الله يعين شنقول بس الشكوى لله ..

random_X
والله انا معاك
لان هالمواقع مالها اساس وفتره واتعدي
اتحصل واحد حصله اجازه شهرين قال اسوي موقع نطقطق فيه
والفلوس زايده للمصمم وللشات وصار صاحب موقع !!




تحياتي للجميع

[gladiator]

ميدعين

ياجماعة خلوهم بكيفهم والله شي يهبل الواحد

أنا أبي أكون صريح
لكن أسمعوا أنا مو مستغرب من اللي يبون كل شي لأن أغلبنا أول موقع لنا كل شي للتعلم فقط لكن بعد فترة بسيطة تتغير الأفكار ويبدأ التخصص حتى إن اغلبنا مصممين ومبرمجين ويصممون للناس ويعملون بهذا الشي ولكن ليس لهم مواقع لماذا لأنه ماكو فكرة لكن اللي مجنني
اللي يبقى كل شي اللي موقع من 5 سنوات كل شي اللي محجر مايبي يغير يبي كل شي وعسى مايهب أحد بشي جديد الا تلقاه راصه لك بالصفحة الأولى ( أخر المواضيع - بوب اب - سكربت اهداءات - كل شي وهذولا مو بس بالإنترنت لا حتى بكمبيوتراتهم من واقع تجربة لاجاك يفرمت جهازه

قال أبي تحطي لي كل البرامج اللي عندك ابي كل شي
تقوله بس البرامج كثبير شنو تبي بالضبط شنو تستخدم
طبعا هو مايستخدم إلا المسنجر والشات
تقوله تبي الفوتوشوب تبي الفيجوال شنو تبي طبعا مايعرفهم يرد يقولك حط لي كل شي
وربي أقول للفني أبيك تدفني لي الجهاز أحط له من البرامج لحد ما أيقونات البرامج اللي بجنب الساعه توصل إلى ستارت ويصير جهاز وانتم بكرامة تقول جحشياله يتحرك طبعا ماراح يجيك ثاني مرة وأكثر كلمة عنج اللي يبون مواقع هي نبي مثل الموقع الفلاني

( زين إمنت ادخوتنا سولفت كثير شنو الحل )

الحل إنه

1. العيب مننا نحن اللي كناقدين لهذه المواقع تركنا شوية مغفلين يحطون سباقات مواقع ويقيمون المواقع ليه مافكر واحد فينا إنه يحط موقع سباق مواقع يكون فيه التقييم حقيقي ولايوضع فيه إلا موقع متخصص ويتم فحصه قبل إدراجه يعني مواقع ماختارة بعناية إلي حتى موقعنا سوالف يكون فخور إنه يكون في هذا السباق

2 . حنا اللي نصمم مواقع لهم ولا هم مايعرفون حتى يضيف ايميل بالمسنجر ليه مانتركهم يتعلمون يصممون صحيح راح يحطون مواقع كل شي لكن بعد فترة من التعلم سوف يتركونها ليذهبوا إلى التخصص

3 . هاهم متروسه سوالف منهم لماذا نعطي كل صاحب موقع من أمهات كل شي أجابات على اسئلته

أطول موضوع كتبته لأني لا أحب الكتابة
والسلام ختام

[Al Zeeny]

أولا .. تعليقي مختصر ولا ازيد على الشباب

شباب فاضيين +بعد عن الدين وضياع الهدف من الحياة + فلوس + اريد موقع لي على الانترنت وخلاص = مواقع مثل هذه

[Only dream]

ليتها وقفت على حلا و دلع و كوكو

المشكلة في المحتوى

تلقى البانر فيه صور غير لائقه

الشات كله ترقيم و غزل

و المنتدى كله مواضيع خفه دم و نكت و هي في الاساس ملطوشه

بس تبون الحق

اللي يسوي مثل هالمواقع .. ينشهر بسرعه .. لأنه اغلب الشباب الله يهديهم مايبحثون غير عن الترقيم


تحياتي لكم

www.awrag.com

[abu abdalazizz]

وما الضير في ذلك !!

اعلان مقابل مال .. شروط واتفاقية بين طرفين

يعنى لو الموقع ماشي بالطريق الصحيح دون الانحراف عن طريق الهدى الاسلامى وقام بوضع اعلان بطريق البوب اب .. ما الضير في ذلك !!!


على العموم شكرا على الموضوع والجهد الرائع اخي Net Hunter

[أبـو خــــالــــد]

دق جرس الفسحه
طلع من الفصل
محمد وفهد وخالد ولؤي
قال محمد للشله شباب انا دخلت مقهى حصلت شات فلان والله شي فيه بنات وولكمو ويسلمو بس قهر
قال واحد من الشله ليش قهر حمودي
قال ياخي البنت الفلانيه ملحطتني وتكلم واحد مراقب احمر وش الحل
قال واحد من الشله افا عليك بس نتقاط من فلوس الفسحه ونحجز مساحه عشره كيلو بايت والباقي نروح ندفع رسوم اشتراك شات كلنا مراقبين حمر
وما فيه احد احسن من احد
ويطمر من بينهم لؤي الشقردي ولد العز يقول اجل خلو علي الاعلانات
ويروح يعلن
-------------------------------------------
الشاهد:
الأعمار : 15 =-----> 20
المهنه: طلبه يتقابلون في الفسحه (عاد لحد يقول شي ذولي اصحاب الموقع)
الخبرات:
منح اسم صلاحية مراقب 100%
تعارف وتنكيت وصرف فاتوره 100%
تصميم جرافيكس 0%
برمجه 0%
--------------------------------
هذي هي الخلاصه