فجأه قلب عليك أغلب مشرفين منتداك.. وش تسوي

[شفاف]

السلام عليكم ..
تخيل تدخل منتداك وتلقى الرسائل الخاصه حقتك مليانه من الاعضاء بان مشرفين او ثلاثه او اربعه يدعون لمنتدى آخر وينادون الأعضاء هناك بالرسايل الخاصه ويتهمون منتداك بالخمول وانه انتهى طوره ؟؟

بقولكم القصه من طأطأ للسلام عليكوو

انا ادير موقع من أكثر من سنتين وتقريباً ماسويت له اعلانات وهو متخصص ووصل عدد أعضاءه 1400وكسور .. ثم فجاه تجيك ضروف وتترك المنتدى .. متوقع ان المشرفين بيشيلون الحمل ..
ثم ترجع للمنتدى عقب ست أشهر تقريباً وتلقى المنتدى شبه منتهي ..

انا رجعت ولقيت بلااااوي تمنيت انه ماقد سويت منتدى .. أبد ..
المشرفين اغلبهم تخلى عن المنتدى .. كلهم تخلو موب اغلبهم

كان فيه اعضاء يتسمون بالأخلاق العاليه ومواضيعهم فوق 1000 لقيتهم ينوهون عن منتدى لهم ويحطون بالمنتدى صور جنس علشان الموقع يتقفل ..
وصار منتداي مورك لصور جنس .. انا اول ماشفتها على طول قمت امسح واعدل ..
صح كان خطأي لكن خلوني اكمل

المهم مدينة الملك عبدالعزيز الحمد لله انهم قفلوا المنتدى فقط ولم يقفلو الموقع كااامل .. والا كان مشكله والله
المهم علىطول قفلت الموقع وغيرت رابط المنتدى وعدلت عليه
طبعاص قفلته أكثر من شهرين
عدلت عليه وزبطته وغير الرابط ثم سويت دعوات للمشاركين
ليتني ماسويت للمشرفين

رجع المنتدى يشاركون فيه قله من الأعضاء .. والحمد لله المنتدى شبه تحرك ..
واحد من المشرفين ماقصر معي يحاول يطور معي لأنه كان مشرف تطوير المواقع عندي ..
وثلاثه من المشرفين الباقين صارو يشاركون لكن بالرسايل الخاصه يكلمون الاعضاء النشيطين ويقولون وش تبون بهالمنتدى .. ميت .. منتهي .. خلااص راح طوره ... هذا منتدى قديم خلوكم منه تعلوا عندنا

المشكله المنتدى اللي يدعون له عدد الأعضاء هناك مايتجاوز 5 اعضاء .. بس بصراحه كنت انا من أول خايف لاني اول ماعدلت على رابط المنتدى شلت كل أبو أبو المشرفين كان قلبي حاس انه بيصير شي ..
عطلت الرسائل الخاصه للاعضاء اللي كانو سابقاً مشرفين ..

بهالحاله وش تبون تسوون لو كنتوا مكاني ؟؟؟

يعني انت الحين مادخلت على موضوعي او مادخلت على هذا القسم الا انه عندك منتدى ...

تخيل منتداك قلبوا عليكم المشرفين ونكبوك ؟؟؟ وش تبي تسوي ؟؟

لازم ناخذ احتياطنا دااااايم ...

قهر صح ؟؟

لا الغريبه واحد عنده موقع ومشارك عندي بصراحه منتداه نشيط وانا منتداي يمكن اللي يكتبون فيه فقط 20 شخص الحين .. ومنتداه يكتبون واجد .. طلب مني تبادل اعلاني .. رغم ان موقعه مقارنه بموقعي موقعه انشط بكثير ..
انا رفضت قلت هذا بيسحب اعضائي علشان موقعي فيه فتره خمول بسيطه ...

هل تعتقدون ان الحل الاخير اللي هو التبادل الاعلاني صالح لموقعي ؟؟؟
انا لجأت لكم بعد الله ابي اشوف هل توافقون لو انتم محلي على التبادل الإعلاني ؟؟ مع انه هذا العضو يشارك بمنتداي .. بس ماااادري والله متلخبط شوي

تحياتي لكم ...

اتمنى بدون لووووم اللي فيني كافيني

[جوهر النت]

اللي يباك بيلس وياك
ومافيه عضو مجبور يكون في منتدى محدد
العضو مافتح يهازه الا وهو يريد مكان يفضفض فيه ويرتاح بيه
انت لو كانت سياستك تمام وادارتك حلوه فمافيه مشرف بيتخلى عنك ولاعضو وكلم بيدورون رضاك
اخويه لاتزعل بس انت على خطا
والخطا مو منك بس
من اغلب اصحاب المنتديات
كل شخص فتح له منتدى يحسب نفسه ملك او رئيس دوله ويامر وينهي
انت فاتح منتدى يعني ملزوم تدور رضى مشرفينك اللي يحركون منتداك وملزوم تدور رضى الاعضاء وتوفر لهم سبل الراحه

[مغرور]

انت لو كانت سياستك تمام وادارتك حلوه فمافيه مشرف بيتخلى عنك ولاعضو

كلام سليم واعذرني اني اتفق معاه لكن هذي الحقيقه ومافيه شي اكبر من انك تقول لمشرفينك جزاكم الله خير كفيتو ووفيتو المنتدى رجع من الصفر وما برجع افتحه ويصرون عليك الجميع انك تفتحه ويتعهدون انهم يردونه مثل اول بعد ما خسرت كل الي فيه وتعب سنين


ليه قالو كذا وليه مستعدين يتعبون تعب بعد ما تعبو سنين وضاع كله بالهوا

اكيد كان لسبب

راجع حساباتك

وراح تعرف الخطاء وين

[wesaal.com]

السلام عليكم يالغالي

تبي الصراحه

3 ارباع الغلط عليك

لانه اللي صار مثل لو ملك ترك مملكته وخلاها تمشي على هواها

اكيد بيصير في انقلاب ... الخ

لانه رب البيت ماهوو موجود

فغلطتك الاولى انك تركت منتداك لفتره ماهي بسيطه

6 اشهر

فكل اللي صار لازم تتحمله انت

هذا شئ

الشئ الثاني

حاول تعلن عن موقعك

صعبه سنتين ولا فكرت تصرف عليه شئ

كان لازم تحسس الاعضاء انك تسوي جهد عشانهم

.
.

بالنسبه للنقاط الثانيه وهم حقدهم عليك ما ادري ليه

العاده الناس تطلع من المنتدى بهدوء

لكن غريبه حقدهم عليك

حاول تمسك واحد فيهم وتفهم منه السالفه

ومساله انك شلت الاشراف عنهم

انت ما غلطت ،،، لانه المشرفين دعوا لمنتديات ثانيه


هذا اللي عندي

و اتمنالك التوفيق


مع تحيات

الفارس

[شفاف]

الأخ جوهر النت
مشكور على صراحتك ..
لكن انا ماجبرت الأعضاء ..
ولا كنت ملك بمنتداي بالعكس حاط شخصين نائب لي يعني بنفس مستواي سوا انهم مايقدرون يدخلون لوحة التحكم ..
كل مايطلبون شي اقدمه لهم دون استثناء
طلبوا شات وقدمته لهم بالعكس المشرفين اقدرهم وآخذ برايهم لكن ماااادري ..
مشكور مره ثانيه على صراحتك
بس ماجاوبت على فكرة التبادل الإعلاني
------
الاخ مغرور
مشكلة المشرفين انهم يحسبون ان المنتدى اذا كان نشيط ثم خمل خلااااااص مستحيل يرجع نشاطه انتهى .. قطن .. انتههت مدته ..
خلااص لازم تصلح منتدى من الصفر علشان الجميع يشارك لين يوصل عدد معين ويخمل خلااص ينتهي ويقطن وتروح تسوي منتدى ثالث .. وهذا خطأ ..
منتدى خمل لازم يعود لنشاطه .. ياما منتديات خملت ثم رجعت بنشاط أكثر وأكثر ..

مغرور مرورك أسعدني .. بس ماجاوبت على فكرة التبادل الاعلاني
------

الاخ wesaal.com

الغلط علي انا متفق معكم كلكم فيها ..
لكن دايم تأكد بان المشرفين هم جزء لا يتجزء من المدير او المشرف العام .. .. منتدى سوالف وين الأخ سوالف ؟؟ لكن فيه مشرفين شايلين الإشراف والمنتدى كل يوم في نجاح ونجاح ..
انا صابني شي اضطرني ابعد عن المنتدى واتركه غصب عني موب بيدي ..
لذلك انا ابي حل الحين وش العمل ؟؟

بالنسبه للإعلان انا الحين جالس افكر بإعلانات قويه شوي وادري انها بتكلف جهود اعلانات ما قد اعلنت عنها سابقاً لكن لحين انتهي من أجزاء كبير بالموقع بحيث يكون كامل والكامل الله علشان لمن يجي الزاير يقدر يقعد بالموقع ويسجل عن قناعه موب عن اعلان ..
هذا ما أرغب فيه

اخوي الفارس مرورك اسعدني كثيراً ..

مع تحيات
ـفاف

[X-43]

الحمد لله ان المنتدى ما تقفل ويا اخي فعلا مشكلة كثير منا انه يفكر الشغلة سهلة صدقوني المنتديات مسؤولية في الدنيا والآخرة الله يحفظنا .. وتذكرني اخي بالمثل الي يقول اعلمه الرماية كل يوم فلما اشتد ساعده رماني والحمد لله جات على خير هالمرة

[Whisper]

مصيحتي لك ..

قفل منتداك نهائيا ..

او بيعه بالف ريال ..لان فيه اعضاء ..

وشارك بمنتديات ثانية ..

الى ان تدخل جو المنتديات من جديد ..

اسحب لك كم عضو من الاعضاء النشطين في منتديات خاملة ..وانشأ منتدى معهم

ترى هذه حال الدنيا .. احيانا لازم تسوي مثل الجميع

وبالتوفيق ...,

[شفاف]

الاخ Whisper
انوااااااع التحطيم

لا ان شاء الله انا جالس احسن منه وازبطه وان شاء الله بيعود الموقع والمنتدى ..
لكن ماقهرني ان احد المشرفين بعد ماوقفت خاصية ارسال الرسائل الخاصه .. دخل بأسم جديد وقام يرسل ..
هو موب حقد ولا شي لكن منتداه مافيه غير 10 بس .. زادو .. يعني ماعنده لا اعلانات ولا شي عشر اعضاء ..
يعني فقط بيسحب الأعضاء ... تدري ليه ؟؟
لأنه فتح موقع نفس تخصص موقعي يعني مايبي غير اعضاء موقعي علشانه متخصص ..
يقهررررررك

ههههههههههههههههه والله بلشه ..
صدق من قال مشاااااااااااااااااااااكل

طيب فكرة الإعلان مع موقع ىخر زي اللي قلته لكم فوق .. ماجاوبتوو عليه

تحياتي لكم ..

[كويتي]

الله يعينك والله ..

والخطأ منك أنت بصراحة .. رحت وخليت المنتدى ..

والخطأ الثاني : ماحطيت مشرفين ثقة وكفؤ ..

والثالث: ماحطيت نائب مشرف عام .. شخص ثقة ويعز عليك ويخاف عالمنتدى مثل مانت تخاف عليه ..

على العموم أخي الكريم إقبل بتبادل الإعلان .. فهو من صالحك ..

وأنت وكيفك ..

تحياتي

[شفاف]

اخوي كويتي ..

مشكور جداً على مرورك ..
وان شاء الله اباخذ برايك ..

شفاف،،،

[oO(الباسل)oO]

انا ابي ارد عليك بعد قبل مااطلع وراي اختبار الساعه 10 الصبح

الله يعين دعواتكم المستجابه

اخي ... لا تسوي اي شئ .. الا لمن يكون المنتدى 100% من التعديلات وافتح اقسام جديده روتينيه تشجع بالمشاركه
واعمل مسابقات ...بس لا تكون الجوائز عاليه يعني بشئ بسيط في كل قسم ... حاول وحاول بدون اللجوء للمشرفين السابقين وعين مشرفين جدد يستحقون الكفاءه .. ولا تنسى الاعضاء السابقين اكيد بعضهم يتمنى يدير قسم من اقسام منتداك وابدا من الصفر
واخذ جميع الايميلات المسجله عندك بالمنتدى القديم وراسلهم باسمائهم وكلمات السر الجديده .. لان البعض اكيد نساها بسبب المده الطويله ,, وبنسبه للاعلان .. اكيد هذا من صالحك ومن صالح اعضائك وقد يهدي بعض مشرفينك السابقين ويرجعون واكيد في راس مدبر يخرب عليك الشغله .. بس احقره .. اذا كنت واثق من نقسك وبتسعه الى النجاح من جديد

هذا شئ بسيط اعبر فيه ... واسمحلي بروح اصلي الفجر .. وننام ورانا دوام الصبح واختبار ... وفي الاخير ربك يعين

[شفاف]

يالله يارب ان تسهل عليه الاختبار وان توفقه وتنجحه .. وتيسر أمره وتبعد عيال الحرام عنه
<<دعوة عجز
اول مره اشوف كلام يواسيني ويهدي من خربطتي ..
بصراحه هذا اللي مخطط له انا الحين

أني اعين مشرفين جدد ولا اسوي اي اعلان الا بعد الانتهاء من كل شي علشان الزائر يلقى سبب يجلس فيه بالمنتدى

جزاك الله خير على هالنصايح ..دعوه صايم ان شاء الله مستجابه .. ربي يوفقكم كل ابوكم ووالديكم دنيا وآخره ..



شفاف