السلام عليكم اخواني ...
انا اليوم حابب نفتح نقاش تقني حول ترميز utf-8 في قواعد البيانات والسبب اني حابب استفيد اكثر واعرف اكثر عن هالترميز مع ان قرأت الكثير الكثير عنو لكن بالاخر التجربة خير برهان ...
انا اليوم عملت قاعدة بيانات فيها جدول ... خليت ترميز الجدول utf8_general_ci لاني اعتقد انو من غير المنطقي تبني موقع فيها قاعدة بيانات بترميز معين وتقوم باعطاء ترميز مختلف بصفحة عرض البيانات يعني ما بسير اعمل قاعدة بيانات ترميز الحروف فيها
cp1256 ولما بدي اعرض البيانات اعرضها بصفحة ترميزها utf-8 اعتقد هالشي قمة المخالفة للمعايير القياسية !!
اكيد البعض منكم يعتبر انو المعايير القياسية يجب انو تداس بالاقدام على اعتبار انو احنا بنقدر نفكر ومش بحاجة لشخص يحطلنا معايير نمشي عليها ... يا سيدي حلو ممتاز بس بالاخر لازم تعرف انو شغلة المعايير القياسية شغلة عالمية واذا بدنا نصل للتميز خلينا نمشي عليها ... على كل حال مش مشكلتنا المعايير القياسية .
المهم بدي اكمل شو صار معي ... لما عملت القاعدة وكلشي تمام عملت ملف صغير وظيفته يدخل قيم معينة للجدول في القاعدة والقيم باللغة العربية ... والله عمل هالملف واجبو ودخل القيم وظهرت القيم باللغة العربية في القاعدة نفسها يعني في phpmyadmin وهاشي حلو ...
لكن المشكلة ظهرت لما عملت كمان ملف يستخرج البيانات وللأسف كانت البيانات عبارة عن علامات سؤال ؟؟؟؟؟؟؟
طيب السؤال حاليا ... واول سؤال للاخوة بادارة سوالف ... ممكن نعرض من حضرتكم شو ترميز قاعدة البيانات في سوالف ؟؟ انا اعتقد انه utf-8 ...
السؤال الاخر للاخوة المطورين في برنامج wordpress ... انا اعرف انو ترميز البيانات في القاعدة بهالبرنامج هي ايضا utf-8 ولما يقوم البرنامج باستخراج البيانات تظهر باللغة العربية وكلشي تمام !! طيب وين المشكلة !!! ولي ما ظهر عندي بالملف عربي ... انا بعرف انو اكيد في كم حاجة لازم اعملها لكن !!
شفت بموضوع للاخ العندليب عن برمجية لتحويل ترميز القاعدة من utf-8 الى الترميز العربي cp1256 وشفت هجوم كاسح من قبل الكل على ترميز اليونيكود وسبب عدم صلاحيته ومن جملة ما قيل من عيوب انه يضاعف الحجم الى 3 مرات وايضا تصبح مشاكل بالحروف والتباس !!
طيب يا اخوة ترميز utf-8 هو عالمي ... طيب ليش وورد برس يعتمد على هالترميز !! وشو المشكلة لو كان حجم القاعدة كبير ... المهم الكيف لا الكم ... المهم جودة البيانات وجودة عرضها .
انا بدي من الاخوة حاليا وكل واحد حسب تجربته وليس رأيه الشخصي ... بدي جميع الآراء بناء على تجربة لكن الي يحب يشاركنا باي فكرة حول الموضوع مش مشكلة ايضا ...
بدي حدا يقنعني ليش الترميز cp1256 افضل من utf-8 وبدي اعرف هل من الممكن ان يجمع الموقع بين كون ترميز قاعدته cp1256 وبين كون صفحة عرض البيانات بترميز utf-8 >>> هل هذا يتناقض مع المعايير القياسية ؟؟
ومن جهة اخرى بدي من مناصري الترميز utf-8 ان يعطوني دفعة معنوية بآرائهم حول هذا الترميز عشان ما يكسحونا فريق ترميز cp1256
وشكرا الكم اخواني وبتمنى الكل يشارك ...
سلامات .