مراحب
الحساب اللى انت فتحته فى بنك مصر ايا كان نوعه (سواء حساب توفير او حساب جارى)
تقدر تستقبل عليه فلوس من اى بنك فالعالم
متسألش موظفى البنك لأن أغلبهم ميعرفوش اى حاجه
اول ما فتحت الحساب عقدولى الدنيا وحسسونى ان الحساب ميستقبلش من اى حته
ويفضل يسألك عايز الحساب بالجنيه ولا بالريال ولا بالدولار
الفرق بين الحساب اللى بالجنيه او بالريال او بالدولار هو سعر الصرف
يعنى مثال عملى:
لسه واصلنى من قريب 3000 ريال سعودى من صديق فى السعوديه بحساب فى بنك الراجحى على حسابى فى بنك مصر
لو حسابى بالريال كان المبلغ هيدخل 3000 ريال
لو حسابى بالجنيه المبلغ بيدخل بما يعادل ال 3000 ريال فى اليوم ده بالجنيه المصرى
يوم ما روحت اصرف المبلغ كان سعر الريال أصاد الجنيه المصرى إختلف عن اليوم اللى صديقى حول فيه المبلغ فصرفت مبلغ غير اللى كنت متوقعه
------------------------------
يعنى خلاصة الكلام حسابك أيا كان نوعه (ماعدا bm card ) وأيا كانت عملته
تقدر تستقبل عليه مبالغ من اى بنك فالعالم
بس الحسابات المحليه ليها أسلوب والدوليه ليها أسلوب
يعنى انت لما فتحت الحساب فبنك مصر ادولك كارت ابيض فيه رقم حسابك واسمك وشوية بيانات تانيه
رقم حسابك اللى مكتوب فالكارت ده مش هو الرقم الصحيح
ده رقم حسابك محلياً
لكن عشان تدى الرقم لحد مش فمصر لازم تضيف للرقم شوية اصفار
فلازم تتصل بخدمة عملاء بنك مصر عشان تتاكد رقمك الدولى كام
رقم خدمة العملاء 19888 على ما اذكر
تانى حاجه لازم تعرف الـ swift code الخاص بالبنك بتاعك
دى برضه تعرفها من خدمة العملاء او من البنك بتاعك نفسك
يعنى لما تيجى تدى رقم حسابك لحد فأى دوله عشان يبعتلك فلوس هتديله المعلومات بالشكل ده:
إسم صاحب الحساب باللغة الانجليزيه:
إسم البنك باللغة الانجليزيه:
رقم حسابك :
سويفت كود للبنك بتاعك:
---------------------------------------
بالنسبة للفيزا
فى كذا نوع من الفيزا
فى نوع بتحط الفلوس الاول عشان تدفع بيها على الانترنت
وده اسمه فيزا إنترنت
مصاريف إستخراجها عشره جنيه من بنك مصر وبتطلع خلال اسبوعين وبيطلبوا منك اى وصل مرافق سواء كهربا او غاز وصوره من بطاقتك الشخصيه
الفلوس بتدخل فالفيزا دى من خلال الايداع المباشر فى البنك فقط
يعنى لازم تروح البنك كل ما تحب تحط فيها فلوس ويكون معاك كارت الفيزا وتدفع وبعدها ب48 ساعه الفلوس تبقى فالفيزا وتقدر تدفع بيها على الانترنت
لكن مينفعش حد ليه حساب فأى بنك يحوللك فلوس وتدخل مباشرة فى الفيزا دى
------------------------------
عشان تعمل فيزا الناس تحوللك عليها فلوس من بنوك خارجيه لازم تكون فيزا مع الحساب
يعنى هتروح البنك وتقولهم عايز اطلع فيزا على الخساب بتاعى , لو عقدك فهمه انك فاهم لأن موظفى بنك مصر يموتوا فالتعقيد ولازم يحطلك اى عقبه عشان ميشتغلش هو
الفيزا دى بقى ياسيدى الفاضل تقدر تدفع بيها على الانترنت بحد اقصى 80% من المبلغ اللى فحسابك فعلياً
يعنى لو فحسابك 1000 جنيه تقدر تدفع بالفيزا دى على الانترنت لغاية 800 جنيه
بالتالى لما حد يحول فلوس لحسابك تقدر تستخدمهم (او تستخدم 80% منهم) بالفيزا مباشرة
ملحوظه اخيره:
شغل الخدمه الصوتيه وانت فالبنك بالمره : دى اللى بتخليك تقدر تستعلم عن رصيدك(يعنى تعرف بقى فيه كام فالحساب) من خلال التليفون طوال ال 24 ساعه بواسطة رقم سرى
بدل ما تروح البنك وتتبهدل فالطوابير وخلافه
لو محتاج اى معلومات تانيه قولى
اتمنى اكون افدتك