السلام عليكم ورحمة الله وبركاته

بطلب الاخ ابو مايد عن طريقتي لترك التدخين في هذا الرد تحديدا في هذا الموضوع

بشرح لكم الطريقة باختصار

بالبداية .. الي يبي الكيف ، الروقان ، خسارة الفلوس (خمس ريال يوميا) ، خسارة الصحه ، ريحه نتنه ، اذية الملائكة بالريحه في الصلاة ، والي يبي الناس تتقرف منه ومن براطمة السوده يسكر الموضوع ويطلع .. بصراحه

اما الي يبي الريح الطيب .. ويبي توفير الدراهم ويبي النظافة والملابس (الغير محروقه)
يكمل بقية الموضوع وان شاء الله يستفيد

اول شي

انا الان ولله الحمد والمنه كملت 3 اسابيع و 4 ايام مادخنت ولاسجارة
مع العلم اني كنت باليوم ادخن بكت ونصف الى بكتين يوميا
مع العلم ايضا ان والدي يدخن وثلاث ارباع اصحابي يدخنون .. ولكن الحمدلله تمكنت من تركه غصبن عن امه الي جابته

وش رايكم طيب اني ادخن؟
نعم ادخن ولكن مو بسجارة
وادخن بطريقة ماتضرني لاصحيا ولانفسيا ولا (ريحيا) يعني روايح

والطريقة باختصار عبارة عن لبان

وظيفت هذا اللبان كالتالي :-

1 - يشبع دمك بالنيكوتين الطبيعي.
2 - يكرهك كره عظيم برائحة التدخين (بحيث اذا شميت ريحت دخان احتمال يجيك غثيان من القرف).
3 - الي يدخن بكتين باليوم يكفية ياكل 4 لبانات فقط .. لان كل لبانه تحتوي على 4 ملي غرام نيكوتين
بحيث ان سجارة المارلبورو تحتوي فقط على نصف ملي غرام نيكوتين

طعم اللبان موب حلو طبعا ولكن مايقارن بطعم السجارة ..

انا صراحه مالقيت هذا اللبان الا في جدة تحديدا في صيدلية الحمرا بسوق المحمل بالبلد .
قيمت الكرتون 154 ريال فيه عشرة اشرطة الشريط الواحد فيه حوالي 12 لبانه.
تكفيك لمدة 5 اشهر بالراحه.

طبعا اعرف واحد الان كمل 12 سنة مداوم على اللبان .. واعرف واحد اخر استعمل هاللبان لمدة سنة واحده وبعدين بطل اللبان وبطل التدخين ولله الحمد

الطريقة :

الطريقة سهله للغاية وثلاث ارباع العلاج نفسي ..
واقدر اثبت لكل مدخن هالمعلومه ..
اي مدخن يدخل غرفة ويولع سجارة .. حلو .. الان طفي اللمبات بحيث تكون الغرفة مظلمة تماما ..
دخن. الان ... هل تذوق اي طعم بالتدخين او تحس انك مدخن؟
صدقوني لا وانا جربته .. لكن ماكنت اتلذذ بالتدخين الا لما اشوف خشمي يطلع الدخان كانه عبارات جمس هذيك الساعه انسبط بالسجارة ..

الدكتور عطاني طريقة لكن مانسابتني .. وبقولكم وش الطريقة ..

اول شيئ ابعد عن الاكل الدسم بس الفترة الاولى يعني اول اسبوع او اول اسبوعين
لان الذ سجارة تذوقها بعد الاكل الدسم مثل الكبسة.
ثاني شي اشتري مكسرات وشيبس وحاول تشغل ايدينك فيهم عشان ماتشتاق للسجارة.
ثالث شي حاول تغير نظام غرفتك بمعنى اذا السرير وسط الغرفة غيره وحطه بركن الغرفة .. الزبدة غير شكل الغرفه عشان نفسيا ماتتذكر التدخين .. طبعا احذف الطفايات وكسرها هي والولاعات ..

داوم على عصير العنب الاسود والفراولة تبع نادك لانه هو الوحيد الي اخذت شهادة ISO على مااظن اسمها كذا .. هذا العنب الاسود ينقي الدم من القطران الي يذبح الادمي بحيث ان القطران مايخرج من الجسم اساسا اذا بطلت التدخين الا بعد 6 اشهر .. لكن مع العصير اذا داومت عليه بيطلع القطران من جسمك خلال 3 اشهر تقريبا

طبعا اصعب شيئ بالموضوع هو اول ثلاث اشهر بهذي المدة تتشاق للسجارة كثير بالذات اذا تنفرزت .. بمعنى ان الصبور والقوي الي يقدر يتحمل الثلاث اشهر هذي يظمن بعدها بإذن الله انه مابيدخن ابدا .. (اذا له ارادة ورغبة) ..

وانا اتبعت طريقة ثانية ناسبتني اكثر

وهو اول شي سويت حجامه
والحجامه هي اخراج الدم الفاسد من الجسم
تقدر تسويها عند اي مستشفى بس اسئل اول عن المستشفى لان بعضهم يسويها بطريقة غير نظيفة ..
بعد كذا نذرت .. اني لو دخنت سجارة بعد الويم علي صيام 3 اشهر متتالية واطاعم 100 مسكين كل مسكين دجاجه كاملة (سعر الدجاجة المشوية 12 ريال) بمعنى لو دخنت بدفع مبلغ وقيمته 1200 ريال عشان سجارة! لا والله تخسى

بعد كذا مسكت اللبان .. كتعويض تدريجي لترك التدخين وارتحت يوم صرت اعرب على الناس وادخل المسجد ونا واثق من ريحتي .. عاد هذي طريقتي وكلن يسوي الي يناسبه

وهنا تفاصيل عن اختفاء (قرف السجارة) من الجسم باول من اول دقيقة الا اكتمال سنة :-

خلال 20 دقيقة من آخر سيجارة :

أ-ضغط الدم يصبح طبيعياً
ب-معدل ضربات القلب يصبح طبيعياً
ج-درجات حرارة الكفين والقدمين تقترب من الدرجة الطبيعية .

بعد 8 ساعات :

أ-اختفاء مادة أول أكسيد الكربون في الدم .
ب-تزيد نسبة الأوكسجين بالدم إلى المعدل الطبيعي.

بعد 24 ساعة:

أ- يبدأ تكيف الأعصاب على اختفاء مادة النيكوتين
ب_التحسن في حاستي الشم والذوق.

بعد أسبوع إلى ثلاثة شهور:

أ-اختفاء النيكوتين تماماً من الدم.
ب-تحسن وظائف الرئة إلى أكثر من 20 %
ج-عدم الإحساس بالتعب أثناء المشي.

بعد شهر إلى تسعة شهور:

أ- زيادة طاقة الجسم.
ب- اختفاء الكحة وعدم الشعور بالتعب.
ج-اختفاء مادة القطران من الرئة.

بعد سنة:

أ-يقل معدل حدوث سرطان الرئة والفم والحنجرة والمرئ والمثانة ويصبح نفس المعدل الذي يحدث عند غير المدخنين.
ب-يقل احتمالات الوفيات بسبب أمراض القلب.


.........................

الي يحب يشتري اللبان هذا اسمه

nicortte
اطلب الي يحتوي على 4 ملي غرام
وان ماعرف الصيدلي اسمه او حصل اي اشكال .. قوله ابي لبان نيكوتين

ادري ان موضوعي غير منسق وبالعامية .. وهدفي فقط اني اكون سبب بإذن الله لو على الاقل لشخص واحد ترك التدخين ..

اي استفسار اي سؤال انا تحت امركم

وعيش حياتك بلا تدخين
اعذرونا على القصور
اجمل تحياتي

www.psdsky.com