طوال الأسبوع نعمل نحن الفري لانسرز بكل جد وجهد، لذا قد حان الوقت لبعض المرح !
كتير من الفري لانسرز كانوا بيتمانوا وجود بعض الأدوات التي تساعده على إنجاز عمله بشكل افضل.. وكمان تبقى لذيذة وغريبة.
كل الفري لانسرز بيشتركوا في حبهم لإنهم يكونوا في حالة متميزة عن باقي المجتمع – بيتنطط عليهم يعني– وعلاوة على كدا انهم بيتعاملوا وبيفكروا بشكل يخلي اغلب الناس تنظر إليهم نظرة “العالم دي مجانين”.
عشان كدا حنتكلم عن الحاجات “المجنونة” اللي كل فري لانسر إتمناها.
1. نسخ كتير مني:
كتير مننا كان بيتمنى يكون في منه نسخ كتيرة.. نسختين تلاته للشغل، نسخة تنام وترتاح، وهو يخرج يتفسح براحته ويشوف حالة
2. موقع للبحث عن التوافق الوظيفي:
طبعاً زي ما كلنا عارفين ان في مواقع توافق عاطفي – من اللي بتستخدم مبدأ يا بخت من وفق راسين في الحلال – كمان الفري لانسر كان نفسه في واحد زي دا بس لفريق العمل، انه يلاقي شريك يتوافق معاه وينجز معاه الشغل وعلى قدر من المسؤولية برضه.
3. جهاز توقع لمحتملات تغير السوق:
يبقى عنده جهاز كده بيقوله ان زوق العملاء حيتغير وعاوز الحاجة الفلانية، او الموضة الجديدة اللي ظهرت في المكان الفلاني حتصبح هي السائدة في السوق بدل ماهو بيتبهدل كدا وبيتعلم ويجرب في حاجات وتطلع مالهاش لازمة في الأخر
4. جهاز ترجمة زبون/فري لانسر .. فري لانسر/زبون:
يا الله.. كان حيكون رائع جداً انك تقدر توصل للي في دماغ العميل، لأن اغلب العميل ما بيبقاش هو عارف عاوز ايه، تجيب جهاز الترجمة وتحطله كلام العميل ويقوم هو بترجمة ما يريد بالضبط، بدل ما بتعذب نفسك انك تفهم منه حاجة
5. تنبيه بالفرص التي ستتاح:
أكيد كان نفسك فيه دا، ان يوصلك على البريد تنبيه بالفرص التي ستتاح غداً، تبقى مجهز نفسك وعروضك وتخش ترد على العميل وتكون أول واحد “شقط الزبون”
6. مانع إزالة الحقوق:
أي اداه تقوم تدور في الشغل اللي عملته وعليه حقوقك، ويبعتلك تنبيه ان الحقوق تمت إزالتها، ويرفع دعوى قضائية، ويبعت رسالة بريدية للزبون يقوله “كدا عيب”
7. آله إيقاف الزمن:
حاجة كدا زي ساعة الإيقاف “ستوب واتش” بس مهمتها إيقاف الزمن نفسه، عشان تقوم ترتاح “حبتين” لما تكون في عجلة وإقتراب موعد التسليم.
8. المساعد الآلي:
ياسلام!!، إذا كان موجود مساعد آلي يقوم عنك بأعمال النظافة والترتيب، ويكون يد مساعدة في مناولتك بعض الأمور، وإذا كنت تعيش بمفردك فسوف يقوم بإعداد الطعام أيضاً
9. مكتب قابل للطي:
تخيل لو متوافر مكتب قابل للطي، حتلم عدتك كلها وتاخدها معاك مكان ماتكون، المكتب كله بقى لابتوب كبير شوية
10. مسؤول مبيعات هولوجرامي:
مسؤول مبيعات وتسويق هولوجرامي، يخرج للزبون في اي مكان كدا من الشاشة ويتكلم معاه.. ويقنعه، ويجيبلك عميل.. حتبقى سهله وحتخليك أوسع إنتشاراً
الخيال مفيد جداً عشان تعرف تشتغل، وكتير من المشاريع العملاقة حالياً كانت مجرد خيال أو فكرة مجنونة ينظر لها الناس بسخرية، عشان كدا جه دورك انت بقى، تخيل وقولنا كنت تتمنى ايه يكون موجود يساعدك كفري لانسر؟
منقول - الأصل : 10 حاجات أي فري لانسر كان يتمنى وجودهم في الحقيقة
رد مع اقتباس
