قبل سنة راجع من المسجد ووقفني ولد الجيران عمره 13 سنة وقالي عبدالله انت تعرف كمبيوتر صح ؟ قلت ايه ، قال سجل بالمنتدى حقي واذا صرت فعال <<<< ( متشرط الرجال بعد ) بخليك مشرف على قسم الكمبيوتر ، ماحبيت احطم الولد وقلت طيب عطني عنوان المنتدى وابشر بسجل فيه ، فتحت المنتدى طبعا كان مجاني ولقيت عيال الحاره كلهم مشرفين ومراقبين وقاطين في المنتدى والرجال المؤسس ومدري ايش ومنزلين جدول مباريات الكوره في الحاره ، اعجبني حماسه بس كأني داخل على مجلس وزاري على المسميات اشوف الاسماء وصورهم والمراقب والمشرف وكبير المراقبين ويحذف ويشيل ويتحكم ! كل ما تذكرت هالولد جلست اضحك الصراحة . حاولت ادور المنتدى بشوف وش صار عليه بس شكله ملّ وحذفه كعادة 80% من المواقع العربية.