بسم الله الرحمن الرحيم
وبه نستعين
بخبركم كيف كان اللقاء .. مو من اول شيء ... لا من يوم ما حط بوخليفة الاعلان
في تاريخ 23/6/2006 حط بو خليفة الاعلان في موقع سوالف .. ويوم شف الاعلان قلت يا بو الشباب هذي فرصة تساعد عيال بلادك و تعاونهم مثل ما يقولون الشيبان عندنا (( ربعٍ تعاونوا ما ذلوا )) طبعا ارسلت معلوماتي لبوخليفة وطلب منه ان يختار موعد يكون فيه اجازة علشان نقدر نحظر والريال ما قصر كان متعاون ويانا وحط الموع يوم الخميس 29/6/2006 مثل ما تعرفون .. المهم يوم الخميس الساعة 2 ظهرا عندي امتحان وعلى اقل تقدير الامتحان يبي ساعة ونص يعني صارت الساعة 3.30 يعني لين اظهر من العين و اوصل دبي بكون اللقاء خلص .. فكرت فكرت .. قلت في خاطري ما فيه حل الا اني احل نص الامتحان واظهر بعد نص ساعة علشان الحق .. لاني بصراحة اضيع دايم بدبي من غير زحمتها ... وفعلا خليت الورقة فاضية " الدكتور بكون فرحان ما بيتعب بالتصحيح " ...
ودقيت موتري سلف ووصلت قرية المعرفة " مكان اللقاء " الساعة تقريبا 6 مساءً طبعا كان بيني وبين الحبوب جدا واللطيف سليمان الانصاري اتصال علشان نكسب الوقت .. ويوم دخلت قليتهم ما ابتدوا باللقاء " طبعا حمدت الله على اني لحقت عليهم " كان فيه جانب من الحضور " رجال وسيدات " ؟؟؟ انتظرنا قليلاً بدأت المعدة للبرنامج بالقاء الكلمة والترحيب بالضيوف وهم ( ان ما خانتني ذاكرتي وبار علي حفظي ) :-
*- السيد وحيد البلوشي مدير جمعية البحرين للانترنت
*- الاخ عبدالله المهيري سردال شخص من شرطة دبي ادارة الجرائم الالكترونية
*- نايف ابو صيدة مذيع بشبكة قنوات اوربت
*- السيد احمد الملا رئيس علاقات المجتمع في تمكين
وبعد ذلك قام الاخ عبدالله المهيري "سردال" بسرد تاريخ الانترنت بشكل مختصر ثم قام بالتحدث عن اهم الفروقات بين web1.0 , web2.0 وثم تلقي الاسئلة بخصوص الموضوع الذي قام بشرحة ....
ثم قام حضرات الضيوف الى المسرح بداء النقاش بخصوص مواضيع عدة و في مامور متنوعة .. تارة في في ادارة المحتوى ... و حقوق الحفظ والملكية والفكرية تارة اخرى ... فعلا كان نقاش هادف وفعال .. والوقت كان يمر اسرع من الضوء..
بعد ذلك تم توزيع شهادات تقدير للضيوف ....
وتم صور جماعة ( اكيد بنزلها بو خليفة قريباً .،، والله اللي قاهرني ان كيمرتي كانت وياي بس استحيت اصور .. قلت بقولون متطفل ولا مو من اختصاصك )
وبعد ذلك اتجهنا للفوالة << الله يعين غير الامارتيين ما بيفهمون معناها على فكرة ترى هذي الكلمة مالها تعريب يعني لازم تقبلها جذيه ..
وبعدها دقيت السيارة سلف واتجهت للبيت علشان اكتب موضوعي هذا .. والحمد الله على سلامة الطريق <<< 3 رادارات مسكته على الخط .. يطالب المجموعة بدفع النص على الاقل
همسة " هذي الكلمات مجرد تعبير عن اللي بخاطري اكيد بو خليفة بنزل موضوع متكامل بالصور بس كنت ابي اقول رايي في بعض الاشخاص .. طبعا ما تعرف عليها بشكل كامل بس من النظرة الاولى وطريقة الكلام والترحيب حكمة عليهم ..
سردال :: متواضع وذكي وفاهم ... حبوب جداً
بو خليفة :: حركي نشيط تجده بكل مكان فعال ... لطيف للغاية
سليمان الانصاري :: اول من التقابي و كان فعلا خدوم ... هو اللي دلني القرية
يسمحلي الباقين يمكن ما ركزت عليهم او ما لاحظت عليهم شيء واذا اسعفتني ذاكرتي بشيء جديد بكون له ان شاء الله حظاً من الردود
سبحانك اللهم وبحمدك اشهد ان لا اله الا انت استغفرك واتوب اليك