واخيرا......قدرت اكتب على راحتي..!!
طبعا يمكن تستغربون هل هذي صورة ..؟؟ معقوووول..؟؟ هيه معقول واللي مايصدق النتجاتيف عندي ..وقصة الصورة اني مرة من المرات شفت انعكاس اضاءة احد الجسور على سطح البحر..فكانت الالوان
( impossible ) وقلت هذا وقتك يافلان...وبالفعل من كثر الفرحة والوناسة يبت عدة التصوير ويلست اصور واصور لمدة ساعتين..فيلم ورى فيلم..المهم...وعلشان الفرحة تكمل سرت اقرب استوديو وكان على وشك انه يسكر المحل...قلت له: حد خبرك انك بتطلع من المحل قبل لاتحمض الفيلم...وأنا ادعو يالله تطلع الصورة مثل مااتخيلها...وتميت مثل اللي حرمته بتولد وما باقي الا اقول ( ولد والا بنت..هاهاهاهاها) وبعد شوي رجع راجو زعلان..وقال لي بكل حزن: بابا ...فيه فيلم بس مافي يمشي زين)..عرفت انه الفيلم ماكان يلف..!! والنتيجه..انه كل الصور والأماني ضاعت..وكان الوقت متأخر شوي ..والا بسير اصور مرة ثانية وبرجع لراجوه بس خفت انه (يسكر المحل كليا لو شاف رقعة ويهي مرة ثانية في نفس اليوم..!!)
في اليوم التالي ..رجعت نفس المكان وييت من وقت ..وصورت نفس اللقطة...لا وكنت يايب من كل شيء اثنين اثنين..احتياطا..واخيرا..سرت عند راجوه (من وقت) ورجعتله بعد فترة وشفته فرحان بالصور..وقال لي..ارباب ..الحين زين..!! وبالفعل..الصورة كانت على مستوى الطموح..وهذا الدرس علمني اشياء واشياء..والحمدلله..اني استفدت منها..
ملاحظة: بعد مرور كم شهر ( اغلق ) محل راجوه بس مش بسببي طبعا..لانه حصل مكان أحسن من اللي كان فيه...وقال لي بعد..تعال دكان جديد..صورة مافي خربان..!!(*__*)
