مساعدة من الاخوه السعودين بخصوص الاتصالات السعودية

[qtr4all]

السلام عليكم

اخواني في السعودية
ابي استفسر
انا عندي رقم جوال سعودي طلعته من الاتصالات السعودية ولكنه بدون اسم

هل اقدر اجي السعودية واحول الرقم باسمي عن طريق البطاقة الشخصية الي عندي ؟
علما البطاقة الشخصية صادرة في قطر

واسف على الازعاج

[بلسم الحياة]

صعب إذا كان الجوال غير مسجل بإسم

فكيف يثبت أنه لك ؟؟


ممكن تخرج جوال بإسمك وبنفس الهوية إذا كانت من دول الخليج وبكل يسر وسهولة إن شاء الله




تقبل تحياتي
باسم

[أبن مكه]

ماتسطيع تغير اسم المالك الا بحضور المالك وحضورك انت ساعتها تقدر تغير الاسم

[Ameen Al-Harbi]

إذا سوا , تقدر , ولكن يجب أن يكون عندك المغلف اللى جت معه البطاقة وعليها أرقامها

[سلطان الجالي]

اخوي بامكانك تغير الرقم باسمك اذا كان صدر بدون اسم او باسم بنجلاديشي ( طبعا يستخدمون اسماء البنقاليه للاحتيال وعدم مطالبتهم قانونيا من هيئة الاتصالات )

خذ شريحتك وتوجه لاقرب مكتب خدمة الاتصالات السعودية روح لموظف الاستقبال وصور صورة بطاقتك قبل ماتجيهم وقوله ابي احول رقم باسمي وهذا الرقم موجود معاي يعطيك ورقة تعبيها وخلال 24 ساعة يتحول باسمك واذا تطلع رقم باسمك اسهل لك في الاجراءات

[qtr4all]

اشكركم على سرعه ردودكم..

بخصوص المغلف انا عندي اياه

وابشوف اذااطلع لي رقم جديد
بس اهم شي ابي اعرف ان هل البطاقة الشخصية الي عندي اقدر اطلع رقم باسمي عن طريق بطاقتي
اشكركم على ردودكم ..

[سلطان الجالي]

ايهه اخوي تقدر وفيه نقطه للأسف قليل من الخليجيين يعرفها حتى بعض الموضفين للأسف لا يعرفونها الخليجي في دول الخليج يعامل معاملة المواطن يعني اعتبر نفسك سعودي بالسعودية وكويتي بالكويت واماراتي بالامارات بغض النظر عن الجنسية لك نفس المعاملة مع بعض الاستثناءات المتعلقة بالامن

[qtr4all]

بالفعل
للاسف في السعودية ماقدرت افتح حساب بنكي ببطاقتي الشخصية
طلبوا جواز السفر
فالحين بجرب اسجل رقم باسمي عن طريق البطاقه الشخصيه

[Ameen Al-Harbi]

بطاقتك الشخصية القطرية ؟

أكيد ما يقبلون اي تعامل رسمي معك

ما يقبل أي تعامل رسمي معك إلا بجواز السفر طالما انت أجنبي

[qtr4all]

S.Wanderer

اي اخوي انا قطري وبطاقتي الشخصية قطريه

بخصوص اعتقد ان الخليجي مايعتبر اجنبي في اي دولة من دول الخليج

وفي الامارات انا طلعت لي رقم بواسطة بطاقتي الشخصية القطريه

[y7ool]

دائماً الأعتماد يكون على الجواز

لأن البطاقات تزور

[سلطان الجالي]

شفيكم شباب ع الرجال يقبلون بطاقتك الشخصيه اخوي خذها مني بس قول الموضف مايفهم اصلا في النظام

[Naif2php]

احتياطاً.. خذ الإثنين معك البطاقه والجواز

[qtr4all]

مافي الااني اخذ الجواز والبطاقه

اشكركم على تفاعلكم بالموضوع

[oO(الباسل)oO]

مافي الااني اخذ الجواز والبطاقه

اشكركم على تفاعلكم بالموضوع

سؤال خارج الموضوع ! انت مري؟ << القبيله
لان الاحظ كتاباتك عن السعوديه .. واكثر الي يحضور الحسا هم آل مره
مجرد فضول وودي اتعرف على اهل قطر ,, ممكن افيدك باشياء من داخل السعوديه