السلام عليكم رحمة الله وبركاته ،
قبل ما أبدا الكلام أحب أنوة اني الحمد لله شغال مع أدسنس من أكثر من ستنتين وحسابي شغال.
بس انا لاحظت انقسام كبير جدا ولم يحسم حتي الان حول هل أدسنس تغلق الحسابات ظلما أم فعلا كما يدعون أنهم يراعون المعلنين ويخافون عليهم من الناشرين الوحشين
المشكلة ان أي واحد يكتب موضوع عن أن ادسنس ظلمته وقفلتله الحساب بدون سبب يلاقي سيل من الردود اللي بتهاجمه عن أن ادسنس مبتظلمش حد وأنه حرامي ويستاهل اللي جراله ويدولوا درس في الاخلاق
وطبعا لما الدور ييجي علي حد من الواعظين بعده ويتقفل الحساب بتاعه برضو ما بيلاقيش حد يصدقه.
المهم وعلشان نكون موضوعيين تعالوا نفتكر مع بعض شوية حاجات مهمة:
1- حضرتك موافق مسبقا ان ادسنس ليها الحق في تغيير سياستها في أي وقت وبدون ما تعلمك .
2- كمان سيادتك موافق مسبقا ان ادسنس ليها الحق في أي وقت انها تقفلك الحساب لو هي حست انك مخالف وطبعا بدون سابق انذار وبدون ابداء اي اسباب ( وممكن تزود عليهم كمان انهم مش هيردوا علي ايميلاتك الا لما تتذل شوية )
3- يا ريت برضو نلاحظ أن ممكن واحد يكسب من أدسنس بطريقة واحدة لمدة 6 شهور وفي الشهر السابع يتقفل الاكونت وبنفس الطريقة اللي كان بيكسب بيها ( في الحالة دي مدعي الخبرة هيقولوا اصل ادسنس مكانتش واخدة بالها أو هيقولوا أصل ادسنس كانت رحيمة وسايباك بمزاجها )
4- من الحاجات المهمة جدا جدا اللي لازم نلاحظها انهم دائما بيقولو في رسالة اغلاق الحساب انك خطر علي المعلنين وان الفلوس هترجع للمعلنين اللي اتأثروا
( أاحب اقولكم اني عندي حساب ادوردز وشغال بية في الافيليت من سنة تقريبا ودائما باختار طريقة عرض الاعلان في جميع المواضع يعني إعلاني بيظهر في مواقع اختصار الروابط اللي دايما بتتقفل وعمري عمري ما جوجل بعتتلي حاجة -- مش بس كدة انا عمري مقابلت حد جوجل رجعتله فلوس - ولو في حد معلن جوجل رجعتله فلوس يا ريت يعرفني اني غلطان في النقطة دي )
5- أهم حاجة لازم نلاحظها - إن في حاجة اسمها كوبونات جوجل أدوردز ودي جوجل بتصدرها بسخاء شديد جدا جدا وبالذات لشركات الاستضافة وحجز الدومينات - يعني جوجل بتديهم الكوبونات دي علشان يدوها هدية لاي حد هيشتري دومين او استضافة
وطبعا زي ما حضراتكم عارفين ان اللي هيعمل حملة بالكوبون رصيد الكوبون هيقل وبالمقابل في ناشر رصيده هيزيد - يعني لما جوجل تصدر كوبون ب 100 دولار مجاني ، المروض انها هتدفع 50 دولار كمان تقريبا للناشر اللي هيظهر عنده اعلانات الكوبون دة.
طيب بزمتك جوجل هتفضل تدفع كوبونات مجانية وكمان تدفع للناشرين من غير ما تكسب؟ ( طبعا في ناس هتقول ما هي ممكن تكسب عميل هقولك أيوة بس ممكن برضو العميل ميكملش أو يفضل يشتري في كوبونات ويعلن بيها بحسابات وهمية )
طيب واية الحل يا أدسنس باشا ؟ هنجيب الفلوس دي منين ؟؟؟
الحل واضح وسهل طالما في ناشرين موافقين علي شروطنا - قفل الحسابات
لا ننكر ان ادسنس من أسهل طرق الربح من الانترنت
ولكن الهدف من هذا المقال الطويل العريض انك لما تشتغل مع أدسنس متعتمدش علية اعتماد كلي توقع منهم أي ندالة
مع تمنياتي بالتويق للجميع
وفي النهاية أحب ان اوجه رسالة الي جوجل ادسنس وكل فريق العمل الموقر:
** ****