انفق ما في الجيب ياتيك ما في الغيب
هذا مثل مدمر لكثير من الناس اللي ضيعوا فلوسهم في اشياء تافهة ولما تكلم الواحد منهم يقولك يا رجال انفق ما في الجيب ياتيك ما في الغيب
ايش هو الادخار
الادخار ببساطة ان تمتنع عن استهلاك جزء محدد من دخلك بصورة دائمة
للاسف كثير من الناس موظف سنين وسنين ولما تجي تشوف رصيده تلقاه صفر
طيب ليش يا خوي رصيدك كذا يقولك والله ما ادري
مرة جاني واحد من زملاء العمل وقال يا فلان عندك سلف 100 ريال لاخر الشهر قلت له ابشر بسعدك بسيطه
قال تصدق يا فلان والله ما املك من حطام الدنيا الا ريالين فقط
معقول ريالين وانت موظف من 8 سنوات
اكبر مشكلة في مجتمعنا اننا شعب يحب المظاهر وتلقى الواحد يتورط في ديون كبيرة عشان يشتري سيارة ب150 الف ويجلس يقسط 5 سنوات وكان ممكن يشتري سيارة ب60 الف ويدخر باقي المبلغ اللي كان راح يدفعه ويخليه لنوائب الدهر وازمات الزمان
فتحت هذا الموضوع لاني اشوف ناس كثيرة حولي متورطين هذه الايام وكلهم يقول الراتب مع مصاريف رمضان والعيد ما بقي منه شيء ومحنا عارفين كيف راح ندبر امورنا لاخر الشهر موعد نزول الراتب
بالله معقول الواحد ما يدخر اي مبلغ من راتبه ويحطه في بنك ويقفل عليه عشان ينفعه في يوم يحتاجه بدل ما يتسلف ويعيش هم الدين
والله اعرف واحد راتبه ما يتعدي 3000 الف ريال ومتقاعد الحين والله انه بنى بيت صغير على قده بالادخار بعد ما شرى باص يوصل فيه الطلاب للمدارس ، ورغم انه فقير في عرف الناس لكن الراجل كافي نفسه وجيبه عمران وعايش بكرامة وفي بيت ملك
بعض الناس يقول الراتب قليل ووش راح ادخر وكم راح ادخر بعد سنوات
تخيل واحد راتبه 4000 ريال ادخر منها 10% شهرياً راح يجمع في عشرين سنة 96 الف ريال
وعاد تخيل لو ادخر اكثر
اخر شي يا ليت كل واحد يقول لنا اش تجربته في الادخار او يقولنا عن اي قصص يعرفها عن المدخرين
وايش اكثر سبب تشوفه مضيع على الناس فلوسها
وسلامتكم