السلام عليكم و رحمة الله و بركاته ...
سلامي لكل عضو جديد و قديم و سلام خاص لاعضاء الشلة ...
شوفو يا جماعة ... بخبركم بسالفة صارت لي ...
شفتو في حياتكم قطو متكبر و شايف نفسه؟ هذا القطو يا جماعة الخير ما يحب يرقد الا في الغرفة و تحت السرير و لازم الكنديشن شغال ...
اسمعو السالفة ...
بيتنا من بين كل بيوت الفريج يحبونه القطاوة و دايما يتيمعون صوبنا .. مسوين عصابات ... عاد وين لما يتظاربون ..ماشي الا كل قطاوة المنطقة يتيمعون في فريجنا و بالتحديد صوب بيتنا ...ما ادري حد قايل لهم انا نوزع سمك بلاش .. و لا يمكن حد قايل لهم ان ابوي سماك ... ؟؟؟ حلاته عاد يوم اخوي الصغير اشترا له حوض سمك و يا اليوم الثاني لقا القطاوة ماكلينهم ...و كل ما يشوف قطوة يركض وراها يبا ينتقم ... اخوي صعيدي ...
عاد من كثر ما هم ماخذين علينا .. صارو ما يخافون ... و دايما يتنقلون في البيت .. اللي يقول بيت ابوهم هالقطو ...
و في وحدة منهم (القطاوة يعني) عينها قوية .. ما تخاف .. و ياماحصلت ظربات و رفسات من اخواني لكن ما تتوب ... هذي القطوة تدخل الصالة و احيانا نحصلها تحت الدرج او في الميلس ..
المهم ...
في يوم من الايام ... حسيت بالتعب ... و طبيعي اني اروح ارقد .. دخلت الغرفة .. قفلت الباب ... شغلت الكنديشن .. و رقدت ...لحد الان السالفة ماشية تمام ..
الساعة 5 و ربع الفجر ... سبحان الله ما ادري شو اللي صحاني . فتحت عيني و تخيلو شو شفت يدامي ؟...
شفت قطوة ... قلت هذا جني ... ما في مجال اكيد جني .. و سميت و تعوذت من ابليس و ماخليت دعاءالا ودعيته .. عاد القطوة كانت يدام السرير و مشت صوب الباب تبا تظهر .. الظاهر بنت الذين شبعت رقاد ... مديت ايدي صوب الدريشة قلت سبحان الله يمكن نطت منها ... لكن الدريشة مقفولة ... بعد شوي لما شافتني ردت مكانها تحت السرير .. و انا كنت ميتة من الخوف .. قمت من على السرير و شوي شوي ... بحركة بطيئة جدا فتحت الباب و ركظت صوب غرفة امي .. دقيت الباب بكل قوتي .. طلعت لي امي ... خير انشالله شو في ... قلتلها ... قطوة قطوة في غرفتي ما ادري كيف دخلت ... يت امي الغرفة وياي دورنا مني مناك ما في شي .. بعدين خبرت امي انها تحت السرير ... امي عاد يابت البروش و يلست تسوي حركات لين ما ظهرت القطوة ... فتحنا للشيخة الباب و راحت عند اهلها تتفاخر بانها رقدت في فندق خمس نجوم ( بالنسبة لهم طبعا) ...
انا عاد قمت و صليت و رديت مرة ثانية للـ ... خخخخخخخخخ ... للرقاد ....
زيـــــــــــــــن ... هذي مو المرة الوحيدة اللي تدخل فيها القطوة غرفتي ...
مرة ثانية اختي كانت بترقد وياي ... دخلنا الغرفة ... اختي راحت تصكر الدريشة ... و انا عطيتها ظهري عشان اقفل الباب .. فجأة سمعت اختي تصرخ ... يماااااااااااااااااااااااااااا .. بسم الله الرحمن الرحيم .. شو صار ..؟ اختي فاتحة عينها ... و مصدومة ... لما التفت وراي شفت القطوة ... اللعنة عليها .. عاد هالمرة غيـــــر .. الحلوة معصبه ... يلست تتنقز لي في الغرفة .. فوق السرير .. على التواليت و ماخلت شي مكانه .. قلبت الغرفة لزبالة ... و احنا نصرخ .. و ما نروم نبطل الباب لانها تتنقز يمين و شمال حتى الستارة تعلقت فيها ... بعد شوي مديت ايدي للباب و فتحته .. ما صدقت على طول ظهرت ... الباب الثاني عاد و اللي يوصل للصالة كان مصكر ... و هي واقفة تتنقز عالباب عشان يتبطل ( غبية تراها) رحت لها و خوفتها شوي لين ما خازت عن الباب و فتحتة .. و ظهرت .. لكن وين بيتنا متاهة بالنسبة للقطاوة .. الباب اللي في الصالة و اللي يوصل للحوي .. مصكر .. و هم اصلا بابين .. و تتراكض من باب لباب ... اخر شي اختي راحت بطلت لها الباب و ظهرت ... افففففف حشا مو قطوة ابليس ...
شفتو عاد .. هالقطاوة وايد يحبوني ... دوم يالسين في غرفتي ..
و من هاك اليوم و انا حذرة منهم ما اظهر من الغرفة الا و انا متأكدة ان الباب مصكر ...
مياو و مياو ...
على طاري المياو ...
في مرة قطوتين يالسين ياكلون من زبالة موجودة صوب بيت ناس ... و هالناس ظهروا من البيت .. اتفقو القطوتين ان وحدة تاكل و الثاني تراقب و بعدين يتبادلون الادوار ... القطوة اللي يالسة تاكل تقول للثانية .. مياااااااااو ... هذيج ترد عليها .. لا ما ياو ...