انا بالاول وزني 120 كيلو .. لكن مو دب لان طولي 188 .. والوزن ضايع في الطول ..
عموما فيه كرشة صغيرة ودهون متراكمة لكن مو سمنة مفرطة ..
عموما ..
بالنسبة لي أنا الوزن كان يزيد وينقص .. يعني عادي في اسبوع واحد يوصل 126 وعادي ينقص في الاسبوع اللي بعده ..
الشغلة ان فيه الواحد تمر عليه ظروف مثل امتحانات يطب فيها الواحد بالاكل ويتعشى من البيت ويرجع يطلب من برا عشا ثاني .. وينقنق قبل النوم اي شي بالثلاجة ..
فـ لما أوقف العشا لمدة اسبوع واحد بس .. بدون ما العب رياضة ولا اقلل من كمية الاكل ..
اضعف 5 كيلو بالراحة ..
لان العشا هو السبب في السمنة .. انت تاكل سعرات حرارية وتنام بعد ساعه ولا ساعتين وما تحرقها .. واذا حقتها بالرياضة تاكل اكثر .. خصوصا اللي شهيتهم مفتوحة ..
يعني عبي بطنك بالفطور .. وتغدى لا تبخل على نفسك .. اما العشا لا تتعشا ابد .. اذا جعت جعت خذلك حبة فاكهة ..
وبعض النقاط بلخصلك اياها من تجربتي الخاصة بحيث تكون التجربة ممتعة :
- لا تتعشى ابد ( ان طارت مرة بالاسبوع ) ..
- أكثر من شرب الماء .. وين ما تروح اشرب ماي لانه مفيد جدا ويحرق الدهون ..
- بالنسبة لي كنت اخسر الوزن بدون مشي وشغلات .. لكن حرّك في كل مناسبة ممكنة .. مثلا اذا تبي شي من البرادة روح مشي لا تسوي اوردر بالتلفون .. امشي للمسجد بدل ما تروح بالسيارة .. اشياء الخ ...
- طبعا مين منا ما يحب يلعب كورة .. اجتمع مع ربعك يوم الاجازة .. استأجرو ملعب والعبوو .. بدال العزايم !!
- حاول تقلل من كميات الاكل .. مثلا اذا تبي تتعشى هالمرة او المرتين بالاسبوع بدال 4 حبات همبرغر خلهم ثنتين ..
- لا تشرب ببسي عادي اشرب دايت فيه سعرات اقل .. ولا تاكل خبز ابيض اكل خبز قمح .. وهكذا ..
وبالباقي اللي في نفسك سوه ..
بعدين تأكد اذا ما التزمت بالدايت .. تره ما بينفع معك .. لكن اذا ما تبي تسوي رجيم قاسي .. عندكالنصايح اللي فوق علشان تسوي اللي في نفسك وما تقسى على نفسك وبنفس الوقت تخسر وزن .. طبعا اذا بالفعل انت في نفسك تبي تخسر هالوزن الزايد !!