المشاركة الأصلية كتبت بواسطة Maxi-des
طيب اقوللكم حكايتي
ولاني بتاع كمبيوتر ونت ,, وشفت الاعلان ( احجز رقمك المفضل)
وحجزت الرقم (مكانش مفضل ولاحاجة),,
وتاني يوم التوكيل في i2 ولقيت الموظف غاسل سنانه بسيجنال تو وحاطط كولونيا ... ومبسوط وفاتح بقه زي كدا
المهم قاللي بابتسامته العريضة الخط ب25 يافندم + الحجز ب 10 جنيه يافندم يعني كله 35 جنيه يا فندم ...
<< وانا بقي اتغريت بريحة الكالونيا .. ودفعت للاخ ...
ولاني ساكن علي أطراف المدينة ,, حطيت الخط وانا بحلم في الخيال ,, مكالمات فيديو ونت وتلفزيون.... والحياة بقي لونها بمبي ... وداعا يانمرتي العتيقة .. ومرحبا بالاتصال الديجيتال
واحط الخط .. مفيش شبكة ... ,, في الشباك ... مفيش شبكة ... اطلع فوق السطح ... مفيش شبكة !!!!!
.. وتاني يوم اروح للموظف ,, وبرضه كان غاسل سنانه بسيجنال تو ,, وحاطط كولونيا ,, وكان لسه مبسوط وفاتح بقه ..
------- مفيش شبكة بتلقط ليه ؟؟
- طبيعي يا فندم الخدمة حاليا في اماكن تركز المدن الرئيسية فقط يا فندم ...
------ طيب مش المفروض تعرفوني قبل ما اشتري الخط !!!!!
- احنا مش هنسأل كل عميل يا فندم اذا كان من سكان المدن الرئيسية ولا لأ يا فندم .
----- طيب انا دلوقتي عاوز اعرف الشبكة هتكون عندنا امتي ؟؟؟؟
- والله مش وظيفتي يافندم,, ممكن حضرتك تحط الخط وتجرب تتصل بالدعم الفني يا فندم ..
طبعا وانا في قمة الغيظ , ضحكت .... ازاي هحط الخط واتصل بالدعم الفني واقوللهم مفيش شبكة !!!!!
خرجت وانا بضرب كف علي كف ,, ومن يومها وانا بكره سيجنال تو ,, ومش بطيق الكولونيا..
المظاهر خداعة صحيح