السلام عليكم ورحمة الله وبركاته
كيفكم ان شاء الله بخير
حبيت اقولك اللي صار لي قبل يومين "طبعاً ماني من النوع اللي يكتب كثير يعني اسلوبي زي وجهي لا احد يدقق واجد "
قبل يومين كنت فاتح الاب توب وجالس اكمل تطوير مواقعي اللي جلست عليه سنتين وانا اطور فيه في السيرفر الشخصي فجأة علق الجهاز يمين يسار تكفا اشغل الحبيب مايبي يشتغل جيت وسويت حركتنا المعهودة اللي ماتخفى عند الكثير طلعت قفلت الجهاز من الزر
شغلته ثاني جتني رسالة "Hard Disk Not Exist" رقم الخطأ كان 3f0 طبعاً هالرسالة تقول يرحم اهلك وين الهاردسك حقك ماهو موجود
طبعاً انا مصدوم من الموقف افكر باللي كنت اطور عليه والاشياء اللي مسويها بالسيرفر الشخصي والصور يعني بالعربي هالجهاز فيه صور واشغال لي من 15 سنة لأني ناقلهم من جهازي القديم وحذفتهم منه
انا وجهي صار كذا
رحت بحثت بالانترنت عن المشكلة واحصل كل اللي جايتهم المشكلة نفس شركة الجهاز حقي "hp" اعتقد انه ضعف بالهاردسكات الداخلية للشركة وكل اللي طارحين المشكلة تقبلو بالامر وغيرو الهاردسك
رحت بعدها بيوم افرفر بالمحلات واوريهم الجهاز يقولون مالك الا هاردسك جديد ياشباب تكفون مو مشكلة السعر بس ابي ملفاتي ولا حياة لمن تنادي
" لكن لفت انتباهي محل يقول اقدر ارجع لك كل ملفاتك بس عرض علي مبلغ خرافي صراحة "
طبعاً تقبلت الامر وغيرت الهاردسك والحين الجهاز نظيف مافيه شئ ونقول خيره ان شاء الله
الحين السؤال اللي يطرح نفسه :
هل فكرت مرة من المرات انه ينضرب عليك الهاردسك الداخلي للجهاز ؟
هل قمت بعمل نسخة احتياطية لملفاتك المهمه على هاردسك خارجي ؟
كيف تحمي ملفاتك من الضياع ؟
لو حصل لك موقف زي كذا وش ردة فعلك ؟! :nice:
ومعليش على الاطالة :shy: