السلام عليكم ورحمة الله وبركاته
ياشباب من زمان وأنا أطرح على نفسي هالسؤال .. ليش كذا المواقع الحكومية عندنا وعند بعض الدول العربية متخلفة جداً وفيها أخطاء برمجية .. والموقع يستمر لمدة شهر .. شهرين .. بدون تحديث .. يعني الموقع اللي فيه نصّ حركة تلقاه مركب منتدى والحركة بسبب الأعضاء .. حتى الأعضاء قليلين جدًا ..
طبعًا لغتي الإنجليزية ضعيفة ولا أتابع مواقع أجنبية عشان أحكم على مواقعهم الحكومية وغيرها ..
السؤال هذا أعتقد إني لقيت له جواب ..
عملت كمتدرب في مؤسسة تعليمية حكومية ( ماهي جامعة الملك سعود :shy: ) .. واكتشفت إن القائمين على موقع هذه المؤسسة يملكون شهادات في هذا المجال لكن تنقصهم الخبرة .. مثل ماأنتم عارفين .. الحكومة توظف بناءًا على الشهادة .. ومخرجاتنا التعليمية في الغالب سيئة ..
رحت لقسم تقنية المعلومات في أحد الأيام وطلبت من الشخص المسؤول إضافة اسمي بعد حصولي على رقم الملف .. قال معليش انتظر شوي يجي فلان يضيف بيانات .. والله ماعرف !
هذي هي الإجابة على سوء الخدمات والتخلف والكآبة اللي نشعر بها حين ندخل الموقع الحكومي ..
أما التأخير في التحديث .. فحصل معي موقف مشابه آخر .. تم تدشين خدمة جديدة .. وعطونا مساحة على الموقع مشكورين .. فسوينا كل شي .. ثم ودينا عملنا لتقنية المعلومات .. ماطلوا فينا فترة .. ثم قالوا خلاص راجعنا عملكم وبنرفعه ( أفلقني إن كانوا شافوه ) .. بس باقي يوافق العميد على العمل عشان نبدأ ..... وانتظر العميد أسبوعين لين يتكرم ويوقع على الموافقة .. وأخيراً رفعوا الملفات .. وزين إنه كان سكربت يعني نقدر نضيف الأخبار والتحديثات عن طريق يوزراتنا بدون العودة لتقنية المعلومات :eek2: ..
ويافرحة ماتمّت .. جانا اتصال من تقنية المعلومات يقولون لاتضيفون شي على الصفحة إلا بعد موافقة العميد ..
صحيح انصدمنا .. بس قلنا أوكي مافيه مشكلة ..
في أحد الأيام جانا وفد من الصين .. وزاروا القسم اللي أعمل فيه .. صورناهم وجينا نضيف خبر حضورهم ورأيهم في المشروع .. كتبنا الخبر ( الوفد الصيني يزور " .... " اليوم ويبدي إعجابه بمشروع " ....... " ) ..
أرسلنا الخبر على العميد عشان يعتمده .. ولولا متابعتنا له قعد شهر .. بس عشان الشباب مبلشين أهله وكل شوي ناقزين في مكتبه وقع لنا بعد أسبوع .. وصار الخبر ( الوفد الصيني يزور " ... " قبل أسبوع ويبدي إعجابه بمشروع " ... " )
وطالما إننا محتاجين مليون توقيع قبل أن نضيف أي شي أو نجري أي معاملة .. فلا نستغرب من تأخر الخدمات .. وموت المواقع الحكومية ..