من فترة وأنا أرغب فى إنشاء منتدى يكون متخصص وليس تقليد لباقى المنتديات ويكون تخصصه فى شيئ يفيد الجميع بإذن الله , فكان لابد لى من عمل رؤية شاملة للمنتديات العربية ومضمونها ورؤية شخصية لى متضمنة تساؤل هام ماذا ينقص لأفعله؟
فى البداية وجدت أن المبدأ الأغلب المنتشر فى المنتديات العربية هو التعميم , بمعنى خليك عام مش متخصص فى شيئ وشوية مواضيع من هنا على شوية من هناك المنتدى هيمشى ويشتغل
بصيت على المنتديات المميزة والمتخصصة لقتها معدودة بس رائعة بجد وتخلى كل واحد فينا يتمنى إنه يكون عنده منتدى متخصص فى شيئ وده نقلنى للسؤال الأهم
إيه اللى لما بكون على النت بيبقى نفسى ألاقيه ومش لاقيه؟
إجابة السؤال ده فكرة منتدى أو موقع جديد متخصص , لأنك معنى إنك مش لاقى شيئ على النت وكل ماتيجى سيرته تقول جواك يااااه ياسلام لو فيه موقع بيهتم بالشيئ ده أو ألاقى بس موقع ولو بيشرح ده
إنت كده هايل ! قطعت أول خطوة ووصلت لشيئ مش منتشر على النت وبتتمنى إنك تلاقى مواقع متخصصة فيه تقدر تفيدك
نيجى للجزء الثانى
تقدر إنت تعمل ده أو تبتدى فيه وتعمل أول خطوة وتحط منتداك أو موقعك المتخصص فيه وبما إن الشيئ ده مش منتشر على النت يبقى أكيد إنت فتحت المجال لناس تانية هتيجى وتساعدك لأنهم هايلاقوا المكان اللى هيقدروا يتكلموا فيه عن الشيئ ده
طبعا هتقول ياعم أنا لوحدى والموضوع صعب أنت عايزنى أبتدى فى حاجة مش موجودة أو نادرة أو فكرة جديدة وأقدر أعملها لوحدى , أكيد إنت بتحلم
هاقولك لأ مش بتحلم , فكر معايا كده دقيقة , ناس كتير غيرك أكيد كانوا عايزين نفس الشيئ ده وكلهم فكروا بنفس تفكيرك ده بس كام واحد فيهم فكر ياخد خطوة إيجابية وحط أول خط وينفذ الفكرة , ولما تنفذها ثق إنك هاتلاقى شخص كمان أنضم ليك وعجبته فكرتك لأنه كان بيدور على نفس الشيئ ومش لاقيه ولقاك إنت حطيتله أول الطريق ويوم وأتنين وهايجيلك التانى والتالت والعشرين والمائة وموقعك أو منتداك بيكبر كل يوم وبيتشهر أكتر والناس أبتدت تعرفه لأنه مع كل يوم بيعدى عليه بتبدأ فكرته تتبلور أكتر وتظهر أكتر ومواضيعك المميزة بتكتر وأنت بتاخد خبرة أكتر والناس أبتدت تشاركك وأبتدوا يجوا لك بالأسم لأنهم عايزين تخصصك ده
بس لازم تعرف نقطة مهمة جدا
أوعى تستعجل النجاح , وأوعى تتخيل أنك هاتنط من أول درجة لنهاية السلم فيوم ولا اتنين ولا حتى عشرة , لازم تعرف إنك هتتعب فى الأول وهتطلع السلم درجة درجة , ومع كل درجة بتطلعها بتحقق نجاح وشهرة وثقة بالنفس إنت أكتر واحد بتحس بيهم
غداً إن شاء الله الجزء الثانى من المقال