اوك يا مان طالما انت قولت الريفو بتاعك اسمحلى انا كمان اقول الريفو بتاعى وانا من مشترى النصباية دى
انا فاتح التقرير دلوقتى وحبدأ معاكم بالترتيب
فى البداية شويه كلام جميل
بعد كده اول تطبيق ( انا والتطريز )
التطبيق طبعا مجرد مثال ل اللى عمله محمد عبد التواب وهو مش بيطلب من حد يدخل فى التطريز
دى حاجه مفهومه
المطلوب بس نفهم الفكره مش اكتر بس ليا ملاحظة سبق لصاحب الموضوع ابداءها وهى الخاصه باداه تحليل الكلمات الخاصه بجوجل ادوردز
الاداه دى فاشله بكل المقاييس
يكفى انى اقول انى مسكت لفتره شهرين كلمه رئيسية وقبل ما امسكها بصيت فى اداه الكلمات دى لقيت ان عدد الباحثين عنها شهريا يتجاوز النصف مليون ولكن بعد ما مسكتها مكانش بيدخل من الكلمه دى غير الفين بس بالكتير اوى
محدش يجى ويقول ان المقصود بالاداه هو اعطاءك نسبه متوسط البحث الشهرى لان حتى لو كان متوسط السحب عمرها ما كانت حتوصل من نصف مليون لالفين بأى حال من الاحوال
اذا فالبداية غلط فى غلط من محمد عبد التواب وتدل عن جهل وعدم علم بادوات تحليل الكلمات
ندخل فى تانى تطبيق خاص بمنتج الحجاب اللى قبل كده احمد محى الدين عرض صاحبه ايام الاعلان عن الفريق 501 لو فاكرين وكانت صورة ارباح صاحب منتج المحجبات موجوده فى صفحه الاعلان
يعنى محمد عبد التواب اخد فكره المنتج وجاء ليعرضها لنا فى كتاب
ماشى جميل يا عبد التواب حنبقى نطور الفكره وننزل بمنتج بس
يا ريت تبقى تقول الكلام ده لنفسك لان صاحب منتج الحجاب مجابش كورسات اجنبية وحطها فى حزمه على كام ورقه بالعربى وقال اهو منتج المحجبات
وانما زى ما شوفت فى الفيديوهات هوه عامل المنتج من الصفر بايده وعامل فيديوهات ومظبط الكلام على الاخر يعنى عامل منتج محترم وبسعر كويس جدااااااااااا كمان
تطبيق تالت خاص بمحمد عبد التواب وهو انه كان قاعد بيقلب فى مكتبه ال PLR اللى قاعد طول حياته بيشترى فيهم قال ليه مش اجمع شويه منهم فى حزمه كورس تدريبى واعرضها للاجانب وطبعا
سعادته مقالش ازاى حيعرضها للاجانب او ايه الطرق الفعاله لتسويقها للاجانب وواضح اصلا انه لا عرضها على الاجانب ولا حاجه وانما اى كلام وخلاص بدليل انه محطش اى صورة شيك فى الجزئية دى وانما ذكر ان مرفق مع الفلاش ميمورى كورس كامل عن كيفية التعامل مع منتجات الريسيل رايتس وطبعا الكورس بالانجليزى وطبعا برضه سعادته تلاقيه واخدهم فى حزمه اشتراها قبل كده وجاى يصرفهالنا
مش كان الاجدر بيه يترجم الكورس الانجليزى ده او على اقل تقدير يكتب كام صفحه بالعربى عن الطرق المذكوره فيه ؟ ولا هوه رأيه ان انا اشتريت يبقى لازم اتعب واترجم علشان اوصل لان مش كل حاجه بالساهل
طب ما انا يا محمد عبد التواب دافع فلوس ومش دافعها علشان اترجم بنفسى
ما كان زمانى روحت اى موقع من بتوع الواريز او حتى ديجيتال بوينت حالاقى الكورسات دى بدولار واتنين وكنت ريحت دماغى من دفع الف جنيه اونطه فى اونطه
رابع تطبيق وخامس تطبيق دول اللى حيرحقوا دمك لان كل صور الشيكات اللى حضرته بيعرضهم عليكم من قديم الازل
ليست الا عن طريق العرب وخاصة المشترين منه وكمان المتابعين له فى المدونة وحتى محمد عبد التواب ذكر فى اخر مقال له موضوع فى برامج نت واشار الى انه موضوع اهبل وبمجرد دخولى للموضوع لقيت اخ هنا شارح رسالة من عبد التواب بخصوص استضافه وكانت فيها روابط ايفيليت
طبعا انا مش بقول ان حرام انه يحط روابط ايفيليت
لا عيب ولا حرام وحقه
لكن مش يجى بعد كده يتنطط بصور الشيكات اللى بيعملها مننا ويقولك كما فعلتها انا تستطيع ان تفعلها وبيطلب منى انى اعمل مواقع زيه واخاطب عرب و و و
هوه قال ان تطلع من كلامى بأفكار
جميل على عينى وراسى
يعنى المفروض اقل حاجه اطبق اسلوبه مع الاجانب
طب ليه هوه مطبقش اسلوبه مع الاجانب بدل العرب وجه يورينى النتايج ؟
طب لو طبق مع الاجانب ليه خبى ومجاش يقول ؟
ليه عاوز يرمينى وسط العرب وهوه عارف ان محدش فيهم بيشترى بل ومتعبين وعلشان ابيع ليهم لازم اقعد فتره ابنى سمعه زى ما هوه عمل ؟
طب معنى كده ان حضرته عايش حياته كلها على العرب ولا بيعرف يبيع لاجانب ولا حاجه وجاى يبيعلنا كورس بسعر خرافى الناس بتستلف فلوس علشان تشتريه
بعد كده جاى يقولك الخطه الرهيبة وهى
محتوى منقول اوتوماتيكى وارمى عليه زوار من ادوردز عن طريق تحديد سعر النقره بقرش وواضح انه مكانش فايق وهوه بيكتب التقرير لان موضوع سعر النقره بقرش ده اتلغى من شهر يناير وهوه نفسه ذكر كده فى احد مواضيعه اللى كاتبها تحت اسم ( اسعار جوجل ادوردز الجديده وكيف تتجاوز تأثيراتها ) على هذا الرابط
http://www.mtwab.com/archives/%D8%A3...7%D9%88%D8%B2/
بل ونزل كتاب اليكترونى بالعنوان ده كاتب فيه عن الموضوع والاسعار ولينك ايفيليت جميل له لشركه قوائم بريدية اشتراكها الشهرى 18 دولار لكل 500 واحد فقط يسجل قى قائمتك البريدية
يبقى ازاى بيقولك فى اى بيزنس اللى صدر من حوالى شهرين تجيب زوار من ادوردز بقرش فى حين ان موضوع القرش ملغى من شهر يناير ؟؟؟ وهوه نفسه اللى ذكر كده ؟؟؟
وطبعا بخطه المحتوى المنقول اللى ذاكرها عمرك ما حتجيب زوار من السيرش بل ومعرض للطرد
يعنى لا زوار من السيرش ولا زوار بسعر قرش من ادوردز يعنى الخطه كلها مضروبه
يجى بعد كل ده ويقول انا مش بقولك تاخد الخطه زى ما هيا وانما بقولك طور الخطه واطلع ولو بفكره
بالذمه خطه ايه اللى اطورها او اطلع منها بفكره وهيا من اولها لاخرها غلط فى غلط
ما بنى على باطل فهو باطل
وخلصت السبعين ورقه من القطع الكبير وخلص اى بيزنس
وبلاش حسين يجى ويقول انت اتكلمت عن السبعين ورقه بس دون الحديث عن المنتج ككل
واحب اقوله من دلوقتى ان استاذك
قال بنفسه ان المنتج هو السبعين ورقه والفلاشه اما برنامج ارباحى ده حاجه كده بونس فوق البيعه علشان يحاول يحلل ثمنها
والفلاشه نفسها كل اللى فيها شويه منتجات ريسيل رايت على كام اكشنز على قوالب و و و
الاستفاده الوحيده من الكورس ده هو انى على الاقل كسبت سعر الفلاشه ال 8 جيجا
سعرها فى السوق دلوقتى عامل حوالى 60 جنيه
اهو طلعت بيهم احسن من مفيش
توضيح مهم بقى فى الاخر
الكلام اللى قولته ده كله الغرض منه لا تشهير ب محمد عبد التواب ولا قطع عيش ولا اى تبرير من التبريرات السخيفه
انا واحد وقعت فى حفرة جاى احذر غيرى منها ومش انا لوحدى اللى وقعت فى حفره عبد التواب
هوه شخص قاعد يجيب فى منتجات PLR ويعمل منهم مكتبه
قال يعمل حزمه تدريبية
اخد كميه من المنتجات دى حطهوملك فى الحزمه مع كام ورقه عربى من كتابته واشترى كل الكورسات العربية القديمه المطروحه قبل كده والحزمه خلاص بقت جاهزه
وبعد كل فتره يقولك اطلاق اتنين واطلاق تلاته واطلاق وعد واطلاق تظبيط وكل اطلاق من دول يحط فيهم منتجات ريسيل رايتز زيادة وكلمتين عربى زيادة وخلصت على كده ويبيعلك الحوار ب 300 دولار غير ال 95 دولار العمولة اللى حياخدها من ليونار باجيز يعنى انت حتشرب الحزمه وهوه حياخد 400 دولار زى الفل
علشان كده هوه بيقولك بيزنس ثابت للبيع
فعلا نقدر نقول بيزنس ثابت
البيزنس ده هو عمل حزمه للبيع
وكل فتره ترمى فيها كام منتج ريسيل رايت وتبقى الحزمه اتطورت وتبيعها تانى لمشتريين جدد وحتى المشتريين القدامى تقولهم ادفعوا فرق سعر والحسابه بتحسب
نفسى اعرف ليه محمد عبد التواب مش يجيب كورس من كورسات كبار المسوقيين الاليكترونيين فى امريكا ويقوم مثلا بترجمته كاملا ويبيعه بدلا من الكورسات الريسيل رايتز اللى مكانها الطبيعى هو الزبالة لان اصحابها مش كاتبينها للافاده وانما لتسويق نفسهم ومواقعهم ومنتجاتهم
ليه مش يعمل كده بدل ما يفضل يرمينا فى دوامة كورسات غبية وتافهه
عامه الحقيقة كلها قدامكم قمت بعرضها ولو حد عنده اعتراض يا ريت اسمع صوته
محمد عبد التواب شعر بالخطر خلاص وان سمعته بتضيع وبسرعه وان الناس مش هبله زى زمان وان خططه وطرقه كلها قديمه فقال يهرب من المركب ويبيع الليلة على 28 الف جنيه واهو تبقى اخر فلوس يطلعها من العرب والمشترى بقى يشرب الليلة