بسم الله الرحمن الرحيم
السلام عليكم ورحمة الله وبركاته
الموضوع: تجربة خدمة زوار نت من قبل المواقع الكبيره.
بداية احب ان اوضح انه هذا الخطاب موجه لأصحاب المواقع الكبيره, لذلك التفاصيل الغبيه والمفهومه على الطيار ما شرحتها, ومفعل الرسائل الخاصه في سوالف سوفت يعني اي استفسار خاص تقدروا ترسلوا رساله خاصه او تشرفونا في نظام الدعم الفني الخاص بنا من هنا. للمستعدين للمشاركه لدينا, نقدر نوفر طرق تواصل مثل الماسنجر وغيرها عشان متابعه لكم بكامل احتياجاتكم.
اذا ما هي خدمة زوارنت؟ بكل بساطه هي خدمة تبادل فتحات اجباريه تحت معاير معينه تساعد على مضاعفة زوارك خلال 24 ساعه ولكن في نفس الوقت تحافظ على زوارك الاساسين ولا تنفرهم من موقعك. طبعا كمجموعة اصحاب موقع عملاقه نحن ناس غير متفتحين لهذي السوالف لانه للأسف الشديد تعلمنا بالطريقه الصعبه انه عالم الويب ماستر غابه لا ترحم, بس هالمره انت غلطان احنا هذاك النور الساطع الي يمثل الامل لأصحاب المواقع الكبيره في تلك الغابه الموحشه(متأثر بالافلام وبالتحديد مسلسل لوست!).
قبل ما نبدء بالاثباتات وهالسوالف انا خايف انك تمل خاصه اني اتكلم كثير لذلك خلني اعدد لك الاشياء الي اضمنها لك من البدايه:اللحين نبدء دراستنا المكثفه لنظريات ونتائج خدمة زوارنت على عدة مواقع, واعتذر اذا قلت نكت بايخه خلال التقرير (عندي حس فكاهي غريب).
- اخذ حقك كامل بدون تلاعب من قبلنا اطلاقا.
- مضاعفة زوارك بشكل مخيف.
- زيادة ارباح موقعك من ادسنس واخوانه.
- بعد مرور اكثر من شهر وقررت تنسحب من الخدمه, بتلاحظ معدل زوارك الاساسين زادوا بشكل ملحوظ لانه الزوار الي من الفتحات بيتحولوا جزء منهم لزوار اساسين.
- راحه نفسيه لما تشوف انه صاير مثل الجبل في احصائياتك.... جبل ما ينزل....
- عضوية VIP كونك صاحب موقع كبير, وتتيح لك استهلاك نقاطك بسرعه اكبر بكثير من العاده.
المفهوم العام لزوارنت:
هذي الصوره بالضبط تشرح شو يصير, مستخدم واحد بيدخل اكثر من موقع في اليوم, وبالمقابل تلك المواقع بترسل له زائر, يعني شخص واحد يمكن يجيب لك 10 زوار (الحد الاقصى 40). اللحين نفترض انه زوارك 20,000 ألف زائر وطلعت لكل هذيلا الـ 20 ألف.... 5 فتحات... يعني بتجمع 20×5 = 100 ألف نقطه.... وكل نقطه = زائر, بمعنى انك ربحت 100 ألف زائر غير 20 ألف زائر اساسي, وبكذا الزياده بتوصل 500%.
طبعا يا جماعة الخير احنا ناس فاهمه ونعرف انه هالكلام في حالات مثاليه فقط تحصل ونادر انه من 20 ألف يتحولوا لـ 120 ألف, لكن هذا هدفنا النهائي, بسبب تنوع سلوكيات المستخدم والعوامل الخارجيه الكثيره بينتهي المطاف انه من 20 ألف شخص تربح حوالي 15 ألف نقطه اي ما يعادل 15 ألف زائر, وفي نهاية اليوم بيكون عندك 35 زائر بنسبة زياده تصل لـ 75% والي تعتبر نتيجه خرافيه خلال يوم واحد فقط.
انا واثق, فهل بتخاطر شوي معي؟
انا انسان ما امشي الا بالمنطق, والفلسفه اختصاصي بس اكره ما عندي انه تطلع فلسفتي (او Theories) غلط, يعني لا اقول شيء وبكل هذي الثقه الا و 70% متأكد من كلامي ووعودي, لانه عندي فرصه واحده ومافي غيرها لأصحاب مواقع بمستواكم.
وهذي احد الاسباب اني ما جيت وكتبت هالكلام اول ما بدئت الخدمه, لاني اريد الخدمه تكون مستقره وجاهزه لكم واخذنا كل احتياطتنا, ولو كان الاخ حازم (المبرمج) مشغول في هالفتره ما كنت نزلت هالتقرير لانه احنا نريد نتابع مواقعكم شخصيا ونستمع الي مطالبكم والاشياء الي ما تعجبكم في الخدمه لانكم انتو هدفنا الرئيسي.
3 ايام تجربه, ما عجبك الوضع امسح الخدمه.
هذي عباره مشهوره جدا معي, لاني قدرت اقنع ناس كثيره تجرب الخدمه بهذي العباره, وبالفعل انا ما اطلب منك كثير, 3 ايام جرب الخدمه ما عجبك الوضع امسح الكود وكأنه ما صار اي شيء. بس لاني انا واثق بتمر 3 ايام وما بتحذف الكود . لانه بتشوف ارقام احتمال ما شفتها من قبل خلال اخر 3 اشهر من موقعك وبالتحديد اليكسا يمكن توصلوا ارقام ما جالكم وصلتوها من قبل لانه هذا الي صار انا معي. موقعي اول مره يوصل لـ 20 ألف زائر كان بسبب زوار نت (لاني ما اسوي اعلانات) وترتيب اليكسا اول مره يوصل اقل من 8,000 كان بسبب زوار نت.
الاعذار الواهيه الي بتجي في بالكم:
1- أنا زواري ما تعجبهم الفتحات الاجباريه وبصراحه انا ما احب ازعجهم.
انا صاحب موقع كبير نوعا ما, وترتيبه حاليا 15 ألف ونازل, وانا مثلكم ما احب الفتحات الاجباريه وتزعجني, لذلك واحنا نبرمج ونضبط الخدمه حاطين اهم شيء في الحسبان وهو كيف نخلي الزائر يفيدنا بس ما نطفشه, لانه في النهايه اذا طفشنا الزائر الخدمه بتفشل وبتسوي خسائر فادحه للمشتركين, واحنا ما هدفنا نجاح لشهر شهرين وبعدين تفشل الخدمه احنا مخططين لأستمرار طويل جدا. لذلك وفرنا خصائص كوكيز متنوعه انت تقدر تحدد عدد الفتحات والفترات الي بينها وكل شيء, وايضا تقدر تخليها لزوار فقط مو الاعضاء وتحط تنبيه الي يبي الاعلانات تختفي يسجل وبكذا تحفز زوارك بدون حجب الروابط او المواضيع وتأثر على ارشفتك.
2- أنا جالس اوهم نفسي انه في زوار, وهم اصلا الا ناس تدخل وتقفل النافذه وخلصنا ومافي فايده حقيقه.
ما اعتقد انه صاحب موقع كبير بيقول هالكلام بس هالسوال كاتبه عشان اوضح نقطه, احنا مثل التلفزيون نعطيك فرصة ظهور منتجك لمدة زمنيه لجمهور كبير عاد هذي مشكلتك اذا انت رحت وصممت دعايه فاشله وكأنه انتاجها تم في الثمانينات.
احد الادله انك صاحب موقع خبير انك تستطيع الاستفاده من هالنوعيه من الزوار عن طريق جذبهم الى موقعك واجبارهم لتصفح موقعك, بعد فتره طبعا لا بد انه موقعك يطلع لنفس الشخص الي تصفح موقع بعد كم يوم وبيتذكر الشخص الموقع وبيدخل فيه واحتمال يسجل ويتحول كزائر اساسي وليس زائر من الفتحه, وطبعا هالزائر الاساسي بتطلع له الفتحه مثل غيره من الزوار العادين وبيجيب لك زوار زياده, يعني نظريا زوار موقعك مع الوقت بيبدء يزيدوا بشكل مستمر ولن يتوقفوا على مستوى معين والي هذا صار في موقعي. يعني كصاحب موقع يكسب 20 ألف زائر من خدمة زوارنت مستحيل محد من الـ 20 ألف يعجبه موقعك ويسجل فيه يعني على الاقل الاقل 100 – 1000 يعجبهم الموقع وهذا الكلام قد يكون يوميا.
3- هذا الانسان وراه شيء, واكيد جالس يستفيد منا واحنا الاغبياء مصدقين فيه.
الشيء الغريب في العالم الانترنت, انه كل ما الواحد كان صريح ويشتغل بشفافيه كل ما نشك فيه اكثر واكثر, لانه بالفعل هذي قد تكون صفقة الاحلام (ادري مبالغ في كلمة الاحلام) احنا نسوي كل شيء وانت تركب سطرين جافا سكربت وزوارك يتضاعفوا في ليله واحده, من يوم بدء المشروع هذا وكل تكاليف تشغيل والسيرفرات وغيرها تم دفعها من جيبي ونسبة الارباح بشكل مباشر من زوارنت 0. (الي يبي يسلفني تراه ما عندي مانع لاني متورط )
حاليا لا نستفيد من زوارنت ماديا اطلاقا, واذا في بالكم انه بنستغل جزء من زواركم فهذا استنتاج غلط, نظامنا عباره عن ارسل لنا زائر = اكسب نقطه = استلم زائر منا = تخصم نقطه. مافي انه على كل 10 زوار احنا ناخذ منك زائرين والا هالخرابيط, اذا شو يعني هذا ؟ هذا يعني انه مافي واسطه في نظامنا او تفضيل مواقع على غيرها بزيادة نقاطها لانه النظام ما بيقدر يصرف تلك النقاط من الاساس. تبي تعرف السبب الحقيقي, وراء هالخدمه الجواب في اخر التقرير.
4- متورط؟ وتدفع تكاليف سيرفرات؟ ولا تكسب من زوار نت ولا منا اي فلس؟ هذي ما تركب.
انا بنفسي اعتبر قصة نجاح لزوارنت, كيف؟ انا صاحب موقع متواضع زواره حوالي 10 – 12 ألف زائر يوميا, موقعي ذو استهلاك خيالي وسيرفري في سوفت لاير واسعار التجديد الشهري احر من الجمر وبالعافيه ادفع التكاليف بشكل شهري للموقع وفوقها ادسنس حجبت موقعي.
لكن بعد فتح مشروع زوارنت تغير الوضع بأكمله واشدد على كلمة "مشترك عادي", اشتركت في موقع زوار نت كمشترك عادي بدون اي صلاحيات اضافيه او مميزات تختلف عن اي شخص اخر والحمدالله احصائيات قبل امس وصلت 20,000 زائر والمعلنين زادوا لدي, واستفادة المعلنين ايضا تحسنت بشكل كبير, وها انا امامكم كـ "مشترك عادي" في زوار نت استطيع تحمل تكاليف سيرفرين وليس سيرفر واحد مع اني فاشل في الاستفاده من موقعي ماديا.
5- ناس حاجزه الفتحه الاجباريه, وهذا ظلم لجميع المعلنين – او – ابي اجر الفتحه الاجباريه.
غلطان يابو الشباب في احد الامثله الي برويك, بتشوف كيف صاحب الموقع وكيف المعلن زوارهم زادوا بشكل عجيب, حيث انه الفتحه من الاساس بالكوكيز فبتطلع لزائر مره وحده خلال فتره زمنيه ومع الرفرش الي بعده بتطلع فتحت معلنك يعني ما خسران شيء هو وظهور فتحته اكثر بكثير من فتحتنا.
6- انا مقتنع بمستوى موقعي.
هذي تصريفه وابو التصريفه, احنا ناس تحب لما نشوف الارقام تزيد, مهما تكون فلوس زوار زيارات باندويدث كله يعجبنا, اذا من جد انت مقتنع جربنا وبنرويك انه الي انت مقتنع فيه ولا شيء يعتبر في عالم الامكانيات الضخمه مع زوار نت.
7- خلاص بفكر بالموضوع وارد عليك.
ههههه على الاقل لا تهين مستوى ذكائي واصرف بشيء مثل الناس والعالم, انزل تحت وشوف الامثله.
منتديات قلب الخليج – اول دراسه:
قلب الخليج الله يسلمكم موقعي الحبوب الحليو الي الصراحه هاليومين طايح سوقه لانه تخصصه موسمي (تقول ازرع موز والا مانجا, قال موسمي قال) وعلى هالوقت الموقع يموت وبقوه بعد, والترتيب اليومي ينزل لمرات يوصل لـ 40 – 60 ألف في اليكسا بس هالمشكله المزعجه اختفت مع زوار نت, بالعكس موقعي ترتيبه بدء يتحسن شوي والزوار وصل الضعف 100% تقريبا. وهذي صوره من احصائيات جوجل عشان تشوفوا:
ادري لاحظتوا النزله القويه قبل ثلاث ايام, هذي تجاهلوها لانه السيرفر الحبوب الي صار ما يستحمل زوار موقعي توقف ولا دريت عنه الا بعد 6 ساعات و النزله الي صارت في حدود 17 May هذي سببها اني مسحت الكود واليوم الي بعده لتقريبا 9 ساعات كـ تجربه علميه وبصراحه ندمت عليها هالتجربه لانهم مثل ما تشوفوا موقعي نزل بقوه خلال هذيك اليومين. ركزوا على اخر اخر يوم في الاحصائيات, هذاك اليوم الي كنت ما مركب فيه كود الفتحه الخاص بزوار نت وشوفوا كم كانت الاحصائيات:
قبل شهر كامل, كانت الاحصائيات 10,861 وقبل يوم 20,140 والي تقريبا تحتسب مضاعفه 100%.
اللحين خلونا نشوف ترتيب اليكسا, الي هو نفس الوقت الي كانت الاحصائيات فيه 10,861 وخلونا نشوف كيف الترتيب كان:
المسافه الصفراء, هي الوقت الي كان فيها ترتيب الموقع تعبان جدا جدا, وشوفوا كيف بدء يطلع بعد تركيب الكود, تشوفوا الدائره الخضراء المعوقه؟ هذيك اعلى نقطه وصل فيها الموقع خلال اخر 3 اشهر وفقط بسبب زوار نت.
اللحين خلونا نشوف الاخ الي معلن معاي, وعلى فكره هذا الموقع بعد شهرين بيكمل ماخذ الفتحه 12 شهر, يعني الزياده مو سببها انه معلن معي, الزياده سببها انه زواري الاجمالي (الاساسين) زادوا:
شو رايكم؟ اقتنعتوا انه الفائده ليست فقط لأصحاب الموقع بل المعلنين ايضا, وهذا يتيح لك انه تزود اسعار اعلاناتك اذا تبي.
منتديات عرب ليونز الترفيهية – دراسة رقم 2:
منتديات عرب ليونز ترتيبها في اليكسا حاليا 3,800 ما اعرف هل احنا محظوظين بتسجيله في نظامنا والا هو المحظوظ انه عرضت عليه يجرب الخدمه لـ 3 ايام واذا ما عجبه يحذفها؟ حاليا عرب ليونز صار له اكثر من اسبوع مشترك معانا ولأول مره خلال ثلاث اشهر ترتيبه في اليكسا نزل لـ 2,550 واستمر تحت 3000 لأكثر من 5 ايام بس هو راح خربها على نفسه هع السالفه تحت.
تشوفوا الي باللون الاصفر؟ تعرفوا شو انا هذا اسميه ؟ اسميه معجزه زوار نت من ترتيب 3,800 عملنا له جبل ووصلناه 2,550, طبعا تسجيل عرب ليونز كان فرصه ذهبيه وخياليه لنا, وعملنا تطوير يعتبر عملاق من ناحية محرك النقاط والاستهلاك, لانه قدرنا ندرس تصرفات النظام مع كميات ضخمه من الزوار وقدرنا نضبطه عشان لو وصلنا لـ 10 اضعاف هالكميه النظام ما ينهار علينا, العجيب في الامر انه النظام صار اخف من قبل وهذا عرب ليونز يرسل لنا كميه ضخمه من الزوار.
للأسف الشديد صح نظامنا يقدر يواكب الضغط لكن لانه النظام نفسه ما فيه زوار كثار يقدروا على تغطية موقع مثل عرب ليونز, فـ حطينا اعدادات عرب ليونز لأقل شيء ممكن والنتيجه كانت 30 ألف زائر يوميا, الفتحه تطلع لزائر فقط مره واحده خلال 24 ساعه فقط, يعني الزبده شو؟ الزبده الله يسلمكم انه هذي النتيجه فقط 15% من امكانيات زوار نت لموقع عرب ليونز ولو حطينا الاعدادات الكامله له كنا نزلنا ترتيبه لأكثر من 1500 وزودنا زواره فوق 100 ألف (زواره هو فوق 100 ألف تقريبا يعني المجموع ربع مليون زائر يوميا)
الموضوع الي يضحك في كل هذا شو؟ انه ضايفني يعلن في قلب الخليج لانه ناوي على حمله اعلانيه تكلفتها 10,000 ريال عشان ينزل ترتيبه لـ تحت 3000 وانا سويته له هذا ببلاش. طبعا صاحبنا بدء يشكك وقال مافي موقع يسوي كل هذا خلال كم يوم, اكيد اكيد انا زواري زادوا بشيء داخل المنتدى (الزوار الي يجو من زوار نت يحتسبوا ضمن الـ Direct وليس الـ Referr) ومسح الكود حوالي 16 ساعه وخلونا نشوف شو صار:
هذي احصائيات زوار نت لموقعه تاريخ 25 والي اطلع كم نقطه ربح وكم نقطه تم استهلاكها.... وخلونا نشوف شو صار في اليكسا تاريخ 25 بالتحديد:
الترتيب نزل 600, وكان بينزل اكثر لو لا الـ 9000 زائر الي كسبهم, احنا احد مميزاتنا انه عندنا كميه محترمه مركبه تول بار اليكسا وتعمل فرق السماء والارض لما يتم ارسالها للمشتركين.
وهذي ايضا نتائج موقع المعلن لديه في رئيسية موقعه ولاحظوا الزياده الاجماليه:
بين 17 و 24 اكبر معدل نمو خلال الشهر.....
عالم الزيرو – دراسه رقم 3:
هذا الموقع ما عندي معلومات كثيره لانه ما كمل 3 ايام عن تسجيله, بس خلوني ارويك الجبل الي سويناه له:
عادي مو بذيك القوه الارتفاع صح؟ خلونا نشوف احصائيات 3 اشهر:
خلال 3 اشهر لا يوجد منافس للجبل حقنا, مو مقتنع؟
خلال سنتين, مافي منافس للجبل الي احنا سويناه خلال 24 ساعه فقط, ما اعتقد احد يقدر ينكر, زوارنت يحقق احلام اي صاحب موقع.
ليش نبيك تسجل معنا؟
يوجد Grand Scheme (خطه عملاقه) وراء هالخدمه, واللحين احنا في مرحله نريد نكسب ثقتكم كبدايه بعدين نطلب منكم تأمنونا على شيء اكبر من زواركم, اخ بس لو تعرفوا شو مجهزين لكم بتتعجبوا من مشروع بدء بفكره ساذجه ووصل لشيء يتمناه الجميع, في النهايه انتو بتسجلوا معانا 100% في هالمرحله والا المرحله الجايه وهذا شيء مفروغ منه, بس نريدكم من اللحين عشان نفهم متطلباتكم اكثر ونكون الخدمه التي ترتقي بمستواكم ومستوى مواقعكم وليس فقط بديل "يمشي الحال".
الصور غير واضحه لذلك ارفق ملف الورد الي كاتب فيه التقرير الاصلي .... لصور ادق واوضح وترتيب للكتابه افضل..