السلام عليكم ورحمة الله وبركاته
أول شي, انا يديد وياكم في سوالف وحاب اخبركم كيف نقدر نقيم الدومينات (عالميا مب عربيا) لأنه بصراحه ماحصلت وايد مواضيع وطرق تقييم الاعضاء فقط بديهي
أول شي هم فئات "الاكستنشنز"
الكوم والنت والاورج والانفو .. والخ
com net org info biz us... etc
في كل فئه فيه شي مشترك *انه لو ثنائي يكون هو الاغلى بس له شروط هالثنائي , انه يكون حرفين فقط بدون ما يكون فيه رقم وهو هذا اغلى شي وعقبها اييك اللي يكون رقمين** وآخر شي اييك حرف ورقم,
* يكون اعلى ثمن في فئته مثال AB.org بيكون اغلى دومين دوت اورج
** بالعاده يكون النوميرك (الارقام) أغلى من الحروف ويعتمد بالنهايه عالend user اللي هو مب ريسلر اللي هو المنتفع بالدومين يعني اللي يشتريه ويستخدمه
نروح للثلاثي
وانا اتكلم بشكل عام عن الثلاثي
اول شي هل الدومين ثلاث حروف فقط؟
ثلاث ارقام؟
حرفين ورقم؟
رقمين وحرف؟
بالترتيب من الاول الاعلى ثمن
انيي الحينه للثلاث حروف بعد تنقسم
الحروف مثل ما نعرف تكون ثلاث فئات
الفئه الأولى:
بريميم ليترز يعني حروف هاي كواليتي ولها قيمه وتقدر تزيد قيمه الدومين الى 600%:
A, B, C, D, E, F, G, H, I, L, M, N, O, P, R, S, T
والفئه الثانيه الفئه المتوسطه يعني ينزل من قيمه الدومين اشوي لو صادف وجودها بالدومين:
J, K, U, V, W
والفئه الثالثه اللي هم ال cheap letters , junk letters يعني الحروف اللي تعبانه اشوي وهذي تنزل من قيمه الدومين:
Q, X, Y, Z
تلخيص الثلاثيات
L = حرف
N = رقم
يعني يوم ينكتب
LLN يعني حرفيم ورقم ومهما كانوا الاحرف
ألخصلكم اللي فوق من الاعلى ثمن
LLL
NNN ( ملاحظه, مرات يكون اغلى من الثلاث حروف في حالة انه الثلاث حروف من الفئه التعبانه اللي هي جنك ليترز)
LLN( LNL - NLL)
NNL (NLN - LNN)
هذي القاعده تنطبق على كل الاكستنشنز "كوم نت اورق نفو"
وتعرف متى تكون انت سعيد حظ؟؟
يوم يكون عندك ثلاثي ثلاث حروف وتكون شركه لها اختصار على شكل هالثلاث حروف يعني يدفعون اي شي عشانه.
مثال: UOS.net باعوه بثمن والله مب ذاكر بس ثمن وايد كبير قرب ال80,000$ ولاحظ انه عالنت
واشتراه بنك United OverSeas Bank
وهذي آخر مبيعات شهر ابريل 2007 دومينات نت واورج يعني ابا ارويكم انه مب بس كوم انه هو اللي يسوى
ملاحظه بآخر الموضوع بذكر لكم آخر مبيعات شهر يوليو هالشهر بمزاد ترافك بنيويورك
هذي المبيعات متفرقه بالشهور الاربع اللي طافوا بمزادات مختلفه
يبت من فئات مختلفه عشان تاخذون فكره
V-chip.org - $10,750
انباع بمزاد سناب نيمز
WomenToWomen.com - $9,000
بمزاد سيدو
Horoscopes.info - $7,250
صفقه خاصه مب معلنين عنها
Catalunya.net - $6,610
سناب نيمز
Stumble.net - $6,000
باي نيمز
CarInsurance.biz - $3,801
سناب نيمز
ويعني هي تضرب وياك, وبالنسبه للسوق العربي( لأني كنت اتكلم عن السوق العالمي)
السوق العربي نفس السوق الصيني بالدومينات
يحبون شي مكرر ومايدفعون عالدومينات وايد =)
H9h9.comمثال عالمكرر ... وإلخ
ملاحظه: الصيني يتميز انه يحبون بعد الارقام مثل (022.com)
ألحين نروح لأسعار الدومينات بالسوق
ومن خلال البيع والشراء
الثلاثي ثلاث حروف دوت نت "اذا ما كان له معنى لأي شركه يعني محد بيدفع"
متوسط ثمنه من 750$ الى 1000$
ودوت كوم ثلاثي حروف
LLN.com
يكون متوسط سعره 4000$ بأسوأ الاحوال , الى 9000$
وبالنسبه للأورج ثلاثي الحروف
متوسط السعر الثلاثي "ماله معنى لأي شركه يعني ينباع لريسلر"
من 200$ الى 500$
والinfo والbiz و us
اسعارهم متفاوته
تبدا بالنسبه للinfo من 120$ الى 250$
biz حسب اللي شايفنه بمزادات "اي باي" متوسطه 70$ الى 120$
و us تبدا من 70$ الى 160$
كل اللي فوق فقط امثله على الثلاثي حروف
اما الثلاثي ارقام
ثلاث ارقام دوت كوم
متوسط 5000$-$10000
ثلاث ارقام دوت نت
متوسط من $800 - 1200$
الا المميزات مثلا
حاليا في هاللحظه فيه مزاد على 777.net بموقع اي باي وموصل $4500
ثلاث ارقام دوت اورج
ا250$ - 550$
ثلاث ارقام دوت انفو
$90 - 160$
ثلاث ارقام دوت يو اس
$80 - 150$
ثلاث ارقام دوت biz
$100 - $180
اما الباقي
الثلاثيات حرفين ورقم دوت كوم
$150 - $250
دوت نت
$12 - $50
دوت اورج
RegFee يعني رسوم التسجيل للأسف!
دوت يو اس
RegFee
دوت انفو
$2 - $5
دوت biz
RegFee
وهذا اللي اشوفه كل يوم بالسوق بحسب نظرتي وكلها متوسطات اسعار
والحين كلنا طبعا نعرف شركه مونيكير لحجز الدومينات وللخدمات
شركه مونيكير تنظم كل فتره مزادات حيه وكل مزاد يتميز بشي
Internext Las Vegas هالمزاد للدومينات اللي هي تصنيفها للبالغين والعياذ بالله Adult Domains
وكان بدايه هالسنه بشهر يناير وبتاريخ 15 - 17
استمر يومين, وكانه بلاس فيجاس(نيفادا)
T.R.A.F.F.I.C. West هالمزاد كان مزاد عام للدومينات ويحليله هالمزاد اعلى دومين كان Families.com 650.000$
العوائل كان اغلى دومين, وهالمزاد بعد كان بلاس فيجاس(نيفادا) واكان بتاريخ 3-5 شهر مارس من هالسنه
Casino Affiliate Convention هالمزاد كان مختص بدومينات القامبلنج اللي هي القمار ودومينات الكازينو والالعاب كان بشهر مايو هالسنه وبتاريخ 5-7 يعني استمر يومين و كان بأمستردام
Moniker's T.R.A.F.F.I.C. NYC هالمزاد للدومينات البريميم يعني المميزه وكان قبل ايام وانتهى كانت مدته من 19 - 22 من شهر يونيو 2007
كنت مصمم احضر هالمزاد بس للأسف ماقدرت للضروف, وكان مكانه نيويورك واذا تبي تحضره فيه شروط اشوي تعجيزيه ولازم تحجز بنيويورك 14 يوم مثل ما وصلني وبفندق معين
ملاحظه مبيعات الدومينات بالمزاد وصلت 10.8$ مليون
هالمزادات الحيه, ترويكم كيف عالم الدومينات عالم ثاني يا اخواني ومب بس بيع وشراء وهي بعد هوايه وفرص للأستثمار فيها
مصادري:
دومين جورنال
مونيكير ترافك
ثري تشاركترز - برايس قايد
نصائح مني لكم:
1- اذا تبي تبيع وتشتري مع اجانب يفضل انك تستخدم Escrow
2- يكون عندك حساب باي بال تستقبل منه وترسل وحاول بكل الطرق انك تفتح حساب لأنه هو بالنهايه واحد من الاسس
3 - العالم ثقتها اشوي مهتزه في E-Gold يعني لا تفكر تبيع احد بإي قولد الا اذا كنت بمصر وماعندك حل
ابحث ودور وهالعالم وايد حلو ودور اصدقاء من كل مكان وبيفيدونك وتفيدهم
والصراحه وايد زعلان لأنه هالقسم فقط اييب كم خبر والباقي فقط تقييم والاساس نفسه للدومينات مب معروف =(
وأعتذر منكم لأني طولت بالموضوع
ويا اخوان الحقوق ترد لي لأني انا كاتـ بـ نـ ها وتعبت عليها
وراح اضيف المبيعات بردود لاحقه ان شاء الله
اتمنى اني افدتكم اخواني
حياكم الله بملاحظاتكم وردودكم
اخوكم
محمد بن هادي المنصوري
DomainZ