رحلتي إلى تايلند (بالصور)
في العام الماضي قررت ان اسافر انا واثنين من اخوياي ..
وكما هي عادتنا منذ مبطي السفر دايم لبلدان الطبيعه .. ( لاتحسبوننا شيبات تونا شباب )
فكانت رحلة العام المنصرم إلى (تايلند) بلد المليون ابتسامة ..
مدة الجلوس : 15 يوم
تحديد السفر كان في شهر 6 من عام 1425هـ وحتى متأخرين لأسباب خاصة
حاولنا نحجز لتايلند لكن الحجز فوووول .. وبعد طول عناء من الحجوزات لقينا ، السفر كان (ترانزيت ) (الرياض - البحرين - بانكوك )(مؤكد) والعوده ( بانكوك - ابوظبي - البحرين - الرياض ) (غير مؤكد انتظار)
مدة الرحلة طيران من البحرين لبانكوك (7 ساعات وشوي )
مالكم بطولة السالفه ..
------ بانكوك العاصمة ------
** تمتاز بكثرة الأسواق العالميه .. مثل MBK وهذا أشهرها ويعتبر من اكبرها تقريباً فكل مايحتاجه الشخص موجود .. مقهى انترنت وكوفي وملابس ومطاعم ومنتجات يدويه وصناعية ولوحات روعه رخيصه وايضاً فندق وحتى ان هذا السوق مربوط بجسر مع سوق قريب منه نسيت اسمه ..
** ابتساماتهم لاتفارقهم لذلك يلقبون ببلد المليون ابتسامه .. فتتعجب منهم ..
** يمتازون ايضاً بوجود شرطه للسياحه ويقبعون في كل شارع وان عبس فيك واحد من السكان رح اشتكه ويمرمطون ابو اللي جابه
** اما صناديق العباده حقتهم فهي بكل شارع .. وكل لفه وكل محل وكل خمس امتار تلقى عقد ورد وحرمه ورجال قاعدين يهزون بالخشب اللي بيديهم قدام البوذا حقهم ..
** يعيبها كثرة السيارات فيها وانها عاصمة فالعمائر وناطحات السحاب بكثره عندهم ..
** عادي جداً ان شاهدت شوارع السيارات لديهم اربع مسارات متجهه لليمين ومسار واحد في الأخير متجه لليسار وكلها في سيد(side)واحد هذا اللي عجزت افهمه للحين
** لديهم ناقلات صغيره وممتازه للتمشي اسمها عندهم (توك توك) اركبه وتمشى على كيف كيفك فيها ورخيصه
** تستطيع استئجار دباب فهم يهتمون فيها .. واجارها على ما اعتقد 100 بات (2.5$) باليوم
** توجد لديهم نوعين من الحافلات للتنقل (مكيفه وغير مكيفه ) واحد لونه اخضر والثاني ازرق على ما اعتقد <ياكثر يعتقد نساي الولد بس ما انصح بالركوب فيها .. ماودي اوهقكم
** يوجد خدام -جمع خادم- لـ(بوذا) وهم يلبسون اللون البرتقالي ويسيرون بالشارع يجمعون اي شي كأنها صدقه للبوذا فلا تعطيهم شي لأنه مايجوز كأنك تطلب البركه والتوفيق من عند بوذا وهذا شرك ولباسهم يستكون من قطعتين من اللون البرتقالي وعليهم وشم وكأنه حرام (ويكرم الحرام عنهم)
** المنتجات التقنيه عندهم غاليه جداً مثل الكاميرات والجوالات (الموبايلات) والكمبيوترات ..
** يوجد لديهم قطار يسير فوق جسر المشاه الفاصل بين الشوارع لكن لاتراه الا اذا مشيت بجسر المشاه وهذا للتنقل الداخلي
** عندهم ستيكرات على كل محل مكتوب عليه ( حلال ) تهاوشت انا واخوياي واحد يقول شركه اسمها حلال وواحد يقول لا الاكل اللي فيها حلال .. واصلاً حنا مانتعشى الا بالمطاعم العربيه والهنديه والباكستانيه .. فيه مطعم اسمه دبي اماراتي وفي مطعم اسمه بيروت لبناني واللي يشتغلون فيه مصاريا ..
** الكلاب اعزكم الله اكثر من القطاوه عندنا .. يعني بالشارع الواحد ممكن تلقى 20 إلى 50 كلب والقطاوه محجوره بأقفاص لكن غير مفترسه يعني يهتمون بالكلاب (اعزكم الله)
**
------
اول وصولنا لبانكوك كان صباحاً مما جعلنا ناخذ راحتنا بالتمشي ..
حجزنا في فندق (باتوناما بارك) وهذا الفندق يقع في قلب البطحا حقتهم بمعنى في وسط الأسواق الشعبيه .. وما يميزه ايضاً انه خالي من (البارات واللوابيات - والمسبح ) يعني يصلح لعوائل .. وايضاً فخم .. وسعر اليوم 2000 بات يعني 50$ تقريباً للغرفه
نزلنا وشرينا مقاضي لأنها رخيصه مره .. طبعاً مليئه (Family Market)و(seven 11).. ثم رحنا لشارع نانا والغالب اللي فيه خليجيين (والدوله تخلو تماما من السياح السعوديين او يعدون بالأصابع) وتعشينا وحجزنا بعد يومين على رحله سياحيه لجزيرتين
1- (chang mai) وهي الغابات الجميله وبلد الزهور ..
2- جزيرة (phukit) وهي جزيرة الشواطئ الخضراء والمناظر الخلابه ..
------ جزيرة شانق ماي ----عدد الأيام : خمس أيام
البعد عن بانكوك : تقريباً 500 إلى 1000 كيلو .. لأن بالطياره ساعتين تقريباً
مميزات الجزيره :
1- اكثر القادمين إليها عوائل وخصوصاً العرب
2- تمتاز بالغابات والمزارع والطبيعه الخلابه
3- يمتازون بالأشغال اليدوية والحرف وكذلك يمتازون بالرسم الدقيق جداً فهم حقاً مبدعون
4- على ماسمعت من أحد المسلمين التايلنديين انه يوجد فيها 7 جوامع ونسبة المسلمين فيها كثير والحمد لله وكذلك متحشمين
* أطلب رحلة إلى شانق راي (بالقرب من نفس الجزيرة شانق ماي) وكذلك إلى اللي ارقابهم ورجولهم طوال (اللي فيها حلقات) وكذلك السوق المائي ولا تنسى النهر الذي يطل على أربع دول (لاوس - تايلند - الصين - برقواي ) ويتطلب منك احضار جواز السفر لانك ستدخل الدوله (لاوس ) وهي صغيره جداً يمكن 5 كيلو فقط
وأفضل شي انك تحجز القروب عند الوصول إلى بانكوك ويشمل (سكن - تذاكر الجزر - الغدا - الفطور - الرحلات )
إليكم الصور ..
أحد الأنهار في جزيرة شانق ماي
معبد بوذا رفضنا الدخول وصورناه من بعيد
جزيرة لاوس من بعيد قبل الوصول لها باليخت وهي ماتبعد 400 متر بين الدولتين
داخل دولة (جزيرة) لاوس
طفل في احد القرى بشانق ماي وهي تضرب مطر وجالس يلعب
عرض للفيله
وحنا راكبين على فيل
وهنا فوق الفيل مصورينها
بداية الطريق لدخول الغابة بالفيله طبعاً انا وخويي
يتبع>>