والله انا مبسوط اليوم النهاردة اجازة عيد يوم التحرير 25 ابريل حاجة حلوة الواحد يحس انه حر صح والا غلط تحرير الارض والعرض والشرف
مع انى حسيت النهاردة انى مش حر بس عرفت كان التحرير دا لصالح مين
عارفين طبعا مين دا اليوم اللى بيخلونا نحتفل بيه علشان رئيسنا كان عمل تقريبا حاجة فيه
رفع العلم واستلم الارض وخلى الشعب يبقى حر هو دا اللى عمله الريس بتاعنا بس كان نفسى اليوم دا يبقى اسم على مسمى
كان نفسى يبقى تحرير فعلا مش حاجة تانية دا حتى يوم ما الناس فكرت تقول رايها بصراحة خلوها ضلمة وولعوا فى البلد بيفكرونى بالتاريخ يوم ما القاهرة ولعت ايام الملك كانوا برضه عايزينها تولع لسبب ما
والنهاردة اهم دول كمان عملوا كده ولعوها يوم 6 ابريل ناس قاعدة فى بيوتها عاملين اضراب من اللى هما شايفينه
عايزين الحاجة اللى بيشتروها ترخص شوية
عايزين عيش نظيف وموجود
عايزين ياكلوا لحمة فى الاسبوع مرة
عايزين مياه نظيفة
عايزين هوا نظيف
عايزين مواصلات سهلة
عايزين فاكهة طبيعية
عايزين نيل وخضرا
عايزين طرق محترمة
عايزين يتعلموا صح
عايزين يعيشوا صح
والنهاية ايه طيب حصل ايه الحكومة قامت عليهم وورتهم العين الحمرا جرجرتهم ونرفزتهم وخلتهم يعملوا اللى هيا عايزاه شوفوا الحكاية دى غريبة شوية بس انا طول عمرى اسمع حاجات زى دى ان الحكومة دايما بتعمل كده علشان تحقق اهداف لها بتعمل كده علشان كل حاجة تبقى فى صالحها الحاجة الوحيدة اللى ما نفعتش معانا يوم ما قالوا حا نعمل انتخابات حرة ونزيهة وحا نعملها على 3 مراحل وفى اول مرحلة لما الناس راحت انتخبت الاخوان المسلمين رجعوا فى كلامهم على طول وقفلوها على الاخر من تانى وندمت الحكومة على اللى عملته وقال ايه حرية سلام يا حرية اما نشوف حا يحصل ايه فى 4 مايو بيقولوا من دلوقتى وباقول معاكم انا قاعد فى البيت ولو نزلت حالبس اسود وحا علق علم اسود
لانى مش لاقى الحرية انا مسجون جوة سجن كبير قوى زى كل الناس فى بلادى
وبيقولوا تحرير وبيقولوا حرية هاهاهاها شيلااااه يا حرية والله ما فى حرية ولا يحزنون دى اغانى بس ولا تحرير ولا يحزنون
دى شعارات وبس احنا سابنا استعمار ومسكنا استعمار تانى كان اجنبى بقى وطنى شيلاااااه يا وطن
مشاعر اخرى
ط£ظٹط§ظ…ظ‰